سولتۇستىكتە 7 اۋىل مەكتەبى جابىلىپ قالدى
6 قازان, 11:50

سولتۇستىكتە 7 اۋىل مەكتەبى جابىلىپ قالدى

پەتروپاۆل. قازاقپارات - سولتۇستىك قازاقستان وبلىسىندا بالا سانىنىڭ ازدىعىنان بيىل 7 مەكتەپ جۇمىسىن توقتاتتى، دەپ حابارلايدى قازاقپارات ءتىلشىسى.

س ق و ءبىلىم باسقارماسى باسپا ءسوز قىزمەتىنىڭ مالىمەتىنشە، وڭىردە جاڭا وقۋ جىلىنىڭ الدىندا 7 مەكتەپ جابىلدى. مۇندا 1-3 وقۋشىدان عانا قالعان. ولار: ايىرتاۋ اۋدانىندا ۆەرحنەبۋرلۋك ەلدى مەكەنىنىڭ باستاۋىش مەكتەبى، ەسىل اۋدانىندا الابيە اۋىلىنىڭ باستاۋىش مەكتەبى، ماعجان جۇمابايەۆ اۋدانىنداعى زولوتايا نيۆا نەگىزگى مەكتەبى، قىزىلجار اۋدانىنىڭ نوۆونيكولسكوە باستاۋىش مەكتەبى، جەلياكوۆ ەلدى مەكەنىندەگى باستاۋىش مەكتەپ، عابيت مۇسىرەپوۆ اۋدانىنداعى ليتۆينوۆكا باستاۋىش مەكتەبى جانە تايىنشا اۋدانىنداعى كراسنودولسكيي باستاۋىش مەكتەبى.

قازىر س ق و-دا 465 مەكتەپ بولسا، سونىڭ %75 شاعىن كومپلەكتىلى. وسى 351 ءبىلىم ورداسىنىڭ شامامەن 160 تان استامىندا بالا سانى تالاپقا ساي كەلمەيدى.

«ق ر ءبىلىم جانە عىلىم ءمينيسترىنىڭ «حالىقتىڭ تىعىزدىعىنا جانە ەلدى مەكەندەردىڭ قاشىقتىعىنا قاراي ءبىلىم بەرۋ ۇيىمدارى جەلىسىنىڭ كەپىلدىك بەرىلگەن مەملەكەتتىك ءنورماتيۆىن بەكىتۋ تۋرالى» بۇيرىعىنا سايكەس باستاۋىش مەكتەپ جاسىنداعى بالالاردىڭ سانى 5 جانە ودان كوپ بولعاندا، مەملەكەتتىك باستاۋىش ءبىلىم بەرەتىن ۇيىمنىڭ جۇمىس ىستەۋىنە كەپىلدىك بەرىلەدى. ال نەگىزگى ورتا مەكتەپ جۇمىس ىستەۋى ءۇشىن بالا سانى 41 دەن اسۋى ءتيىس. جالپى ورتا ءبىلىم بەرەتىن مەكتەپ ءۇشىن بالا سانى 81 دەن كەم بولماۋى ءتيىس. جابىلعان مەكتەپتەردىڭ وقۋشىلارىنا ودان ءارى وقۋ ءۇشىن جاقىن ماڭداعى مەكتەپتەرگە جەتكىزۋ ۇيىمداستىرىلدى»، - دەيدى وبلىستىق ءبىلىم باسقارماسىنىڭ باسپا ءسوز حاتشىسى اسەل ورازبايەۆا.

جالپى بيىل 306 ەلدى مەكەننەن 2785 بالا جاقىن ماڭداعى اۋىل مەكتەپتەرىنە تاسىمالدانىپ جاتىر. سونىڭ شامامەن 1,7 مىڭىن كۇندەلىكتى اپارىپ- اكەلىپ تۇرۋ قاجەت. وسى ماقساتقا 160 قا جۋىق ارنايى اۆتوكولىك الىنعان، بيىل قاتارى تاعى 29 اۆتوبۋسپەن تولىقپاق.

س ق و-دا مەكتەپتەر سانى جىلدان-جىلعا ازايىپ كەلەدى. مامانداردىڭ ايتۋىنشا، وسىدان 10 جىل بۇرىن وڭىردە 596 جالپى ءبىلىم بەرەتىن مەكتەپ بولسا، وسى ارالىقتا شامامەن %25 كەمىگەن.


جاڭالىقتار