مۇقاعاليعا ارنالعان 7 ونەر تۋىندىسى

نۇر-سۇلتان. قازاقپارات - قازاق پوەزياسىنىڭ «مۇزبالاعى»، اقيىق اقىن مۇقاعاليعا قانداي ونەر تۋىندىسىن ارناسا دا ارتىق ەتپەيدى.

سەبەبى ول، كوزى تىرىسىندە- اق قارا ولەڭنىڭ «حان ءتاڭىرى» اتانىپ كەتتى. ءار اقىن پوەزيا تاۋلارىنداعى «مۇقاعالي» دەپ اتالاتىن الىپ شىڭعا ءبىر تاعزىم ەتپەي وتپەيدى. وعان ولەڭ ارناماعان اقىن كەمد- كەم شىعار. سوندىقتان ماسساگەت پورتالى اقىنعا ولەڭنەن بولەك ارنالعان ونەر تۋىندىلارىن ءتىزىپ شىقتى.

مۇقاعاليعا ارنالعان مۋرال

2021 -جىلى مۇقاعالي ماقاتيەۆتىڭ 90 جىلدىعىنا وراي الماتىدا «ش. ايمانوۆ» اتىنداعى «قازاق فيلم» كينوستۋدياسىنىڭ باستاماسىمەن الماتى اكىمدىگىنىڭ قولداۋىمەن اقىننىڭ بەينەسى قابىرعاعا سالىندى. مۋرالدىڭ اۆتورلارى - نۇربولات امانقۇل مەن اباي سۇلتان.

مۋرال ءادي ءشارىپوۆ پەن مۇقاعالي ماقاتايەۆ كوشەلەرىنىڭ قيىلىسىنداعى ءۇيدىڭ قاسبەتىنە سالىندى. سۋرەتتىڭ كولەمى 190 شارشى مەتر. مۋرالدى سالۋ ءۇشىن اۆتورلار 5 كۇن، قابىرعانى دايىنداۋعا 1 اپتا ۋاقىت جۇمساعان. سونىمەن قاتار، سۋرەتشىلەر مۋرالدى سالۋ ءۇشىن 50 ليتر بوياۋ مەن 100 اەروزول باللونىن قولدانعان.

مۇقاعاليعا ارنالعان فيلم

مۇقاعالي ماقاتايەۆتىڭ 90 جىلدىعىنا وراي ق ر مادەنيەت جانە سپورت مينيسترلىگىنىڭ تاپسىرىسى بويىنشا شاكەن ايمانوۆ اتىنداعى «قازاقفيلم» ا ق جارىققا شىعارعان فيلم اقيىق اقىن، اتى اڭىزعا اينالعان مۇقاعالي ماقاتايەۆ ءومىرىنىڭ سوڭعى 4-5 جىلىن باياندايدى.

كينوتۋىندىنىڭ سەناريىن بەلگىلى جازۋشى جۇسىپبەك قورعاسبەك، بولات قالىمبەتوۆ جانە عازيز ناسىروۆ جازعان.

فيلم وقيعالارى وتكەن عاسىردىڭ 60-70 -جىلدارىن سۋرەتتەيدى. سوندىقتان ەرمەك وتەگەنوۆ باستاعان سۋرەتشىلەر توبىنىڭ ەڭبەگى زور. ولار سول ۋاقىتتىڭ بەينەسىن جيناپ، تۇرمىسىن، ينفراقۇرىلىمىن ءدال كورسەتكەن. فيلمنىڭ قويۋشى وپەراتورى ەدىگە نۇسىپبەكوۆ.

«مۇقاعالي. بۇل عاسىردان ەمەسپىن» سەريالى

اقيىق اقىننىڭ 1973 -جىلدان 1976 -جىلعا دەيىنگى ءومىر كەزەڭىنە ارنالعان. وسى ۋاقىت ارالىعىنداعى اقىن ءومىرىنىڭ ەڭ كۇردەلى جانە قىزىقتى ساتتەرى مەن فاكتىلەرى اشىلادى.

رەجيسسەرى - ازامات ساتىبالدى، دارحان ساركەنوۆ. سەناريىن قانات رامازان جازعان. مۇقاعالي ءرولىن بەلگىلى تەاتر جانە كينو اكتەرى ازامات ساتىبالدى سومدايدى.

سەريال 4 بولىمنەن تۇرادى. تۋىندىدا قالامگەر تاعدىرىنىڭ قيىن- قىستاۋ كەزەڭىندە شىعارماشىلىعىن مويىنداپ، جانىنان تابىلعان ۇلت تۇلعالارى - باۋىرجان مومىش ۇلى، اسقار سۇلەيمەنوۆ، توقاش بەردياروۆ، نۇرعيسا تىلەنديەۆ، فاريزا وڭعارسىنوۆانىڭ بەينەلەرى بار.

مۇقاعاليعا ارنالعان پورترەت

مۇقاعالي ماقاتايەۆتىڭ سۋرەتىنىڭ اۆتورى جاس سۋرەتشى - سۇلتان امانجول. كەنەپ، مايلى بوياۋ. كولەمى 1م х 90 س م.

سۋرەتشى بۇل تۋىندىنى سالاردا كوپ ويلانىپ، اقىننىڭ جاس كەزىن بەينەلەگىم كەلگەنىن ايتادى.

«كوبىنەسە سۋرەتشىلەر مۇقاعاليدىڭ 40-تان اسقان شاعىنداعى وبرازىن بەينەلەسە، مەن جاس، جالىنداپ تۇرعان كەزىن سالدىم. سۋرەت سالاردا الدىمەن بەينەسىن ەلەستەتىپ، ويىڭدا پىسىرەسىڭ. تولىق كوڭىلىمنەن شىعۋ ءۇشىن ونى 3 اپتا سالدىم. حان ءتاڭىرى ەكەۋىن بىرگە سالۋىمنىڭ دا ماڭىزى زور. سەبەبى، مۇقاعالي وسى تاۋداي بيىك تۇلعا عوي. ونىڭ حان تاڭىرىندەي بيىك ەكەنىن، ءوز اۋىلىندا، ويلانىپ وتىرعانىن كورسەتكىم كەلدى. «، - دەيدى سۋرەتشى.

سۋرەتكە قاراپ وتىرساڭىز جارقىن، اشىق بوياۋلار از. كۇڭگىرت، بۇلىڭعىر. سۋرەتشىنىڭ ايتۋىنشا، ونىڭ دا وزىندىك سىرى بار.

«جارقىن بوياۋلاردى ادەيى قولدانبادىم. مۇقاعالي پورترەتىندە جاس اقىننىڭ جانايىن دەسە جانا الماي تۇرعان كەزى سۋرەتتەلگەن. سەبەبى، اقىندى تىرىسىندە كورە الماعان ادامدار، توبىقتان قاققاندار كوپ بولدى»، - دەيدى اۆتور.

مۇقاعاليعا ارنالعان ەسكەرتكىش

نارىنقولدىڭ ورتالىق الاڭىندا مۇقاعالي ماقاتايەۆتىڭ ەسكەرتكىشى 2021 -جىلى اشىلدى.

ەسكەرتكىش قولادان قۇيىلعان، تۇعىر گرانيتتەن جاسالعان. ەسكەرتكىشتىڭ جالپى بيىكتىگى 8,2 مەتردى قۇرايدى. اۆتور- ساۋلەتشى - رۇستەمبەكوۆ، ءمۇسىنشى - كاكىموۆ.

بۇدان بولەك مۇقاعالي ماقاتايەۆقا ارنالعان ەسكەرتكىشتەر كوپ. سونىڭ ءبىرى الماتى قالاسىنداعى اقىننىڭ ءوز اتىنا بەرىلگەن كوشەدە ورنالاسقان.

ەسكەرتكىش 2002 -جىلى 16-جەلتوقساندا اشىلدى. اۆتورى - ن. دالبايەۆ.

بيىكتىگى ءۇش مەتردەن اساتىن قولا ەسكەرتكىشتە اقىن ورىندىقتا ويلانىپ وتىرعانى بەينەلەنگەن. ءمۇسىنشى نۇرلان دالبايدىڭ ايتۋىنشا، اقىن بەينەسى ونىڭ جان دۇنيەسىندە بۇرىننان بار، سوندىقتان ەسكيزدەرى تەز اياقتالىپ، ەسكەرتكىش رەكوردتىق مەرزىمدە قۇيىلعان.

مۇقاعاليعا ارنالعان پەسا

«مۇقاعالي» دراماسىنىڭ اۆتورى «الاش» ادەبي سىيلىعىنىڭ لاۋرەاتى، اقىن سەرىك تۇرعىنبەك ۇلى. دراما العاش رەت 2004 -جىلى ساحنالانعان. سودان بەرى كورەرمەندەر تاراپىنان جوعارى سۇرانىسقا يە قويىلىمنىڭ ءبىرى. قويۋشى رەجيسسەرى - بولات ۇزاقوۆ.

قويىلىم اقىننىڭ ومىرىنەن ءبىر ۇزىك سىردى باياندايدى. ونىڭ ءتىرى كەزىندە باعالانباي، قوعامنان كورگەن قياناتى مەن جان كۇيزەلىسىن بايقاتادى. ءبىر عانا اقىن ءومىرى ارقىلى ءومىر ءسۇرىپ وتىرعان ورتانىڭ حال- احۋالىن كورسەتەدى. ماقسات - ءومىرىن پوەزياعا ارناعان ۇلى تۇلعانىڭ بەينەسىن تەاتر ونەرى ارقىلى كورەرمەنگە ناسيحاتتاۋ.

«ءتاڭىر تاۋ» پوەماسى

«ءتاڭىر تاۋ» پوەماسىنىڭ اۆتورى بەلگىلى اقىن، دراماتۋرگ يسرايل ساپارباي. اقىن بۇل تۋىندىنى جازۋعا كورگەن ءتۇسى سەبەپ بولعان. كەيىن ونى پوەما ەتىپ جازىپ شىققان.

پوەمادا تاۋ ىسپەتتى مۇقاعالي سۋرەتتەلەدى. ول تاۋعا اينالىپ الماتىعا جىلجىپ كەلەدى.

«ءبىر كۇنى تۇسىمە الاتاۋ كىردى. تاۋدىڭ باسىندا - بۇلت، اسپان - اشىق، اۋا - ءموپ- ءمولدىر، تاپ- تازا ءبىر كەرەمەت كورىنىس. سول كورىنىسكە قىزىعا قاراپ تۇر ەدىم، تاۋعا جان ءبىتىپ، قالاعا قاراي جىلجي باستادى. تاۋ قالاعا ءتونىپ كەلە جاتىر!.. جۇرت تىم- تىراقاي قاشا باستادى. بىرەۋ جاياۋ جۇگىرىپ بارادى، بىرەۋ ماشينامەن. بىرەۋ اۋزى اشىلىپ نە ىستەرىن بىلمەي، ءوز كوزىنە ءوزى سەنە الماي، تاۋعا قاراپ اڭقيىپ تۇر. ناعىز حاوس باستالدى. جانى جوق تاۋعا جان ءبىتىپ، ۇستىڭە ءتونىپ كەلە جاتقان عالاماتتى كىم كوردى دەيسىڭ...»- دەيدى اقىن پوەماسى تۋرالى.

اقپارات دەرەككوزى: massaget.kz