قازاقستان حالقىنا قورىنا تۇسكەن قارجى 7 بانكتە ساقتالادى
بۇل سۇراققا قور باسشىسى بولات جامىشيەۆ تەلەباعدارلاما ەفيرىندە جاۋاپ بەردى، دەپ حابارلايدى قازاقپارات ءتىلشىسى.
«قورعا تۇسكەن قارجى 7 بانكتە بولادى. بارلىعى دا - وتاندىق بانكتەر. ياعني، قايىرىمدىلىق جاساعان ادام نەمەسە ۇيىم قارجىنى قاي بانك ارقىلى جىبەرەدى، اقشا سول بانكتە بولادى. قور اشىلا سالا العاشقى قارجى Halyk Bank ارقىلى ءتۇستى. ودان كەيىن kaspi.kz جانە تاعى 5 بانككە قايىرىمدىلىق قارجىسى تۇسە باستادى. قارجىعا ءبىز جاۋاپتى بولعاندىقتان، حالىق سەنىمىنە كىرگەن، نەسيە جۇيەسى وڭ جولعا قويىلعان بانكتەر تاڭدالدى. ودان ءارى وتاندىق ءىرى كاسىپورىندارمەن تىكەلەي جۇمىس ىستەيتىن بولامىز. ال ورتا جانە شاعىن كاسىپورىندارمەن «اتامەكەن» ۇلتتىق كاسىپكەرلەر پالاتاسى ارقىلى مەموراندۋم جاسايمىز»، - دەدى ب. جامىشيەۆ.
سونداي- اق، قور باسشىسى قاتىسۋشىلار كەڭەسىنىڭ قۇرىلاتىنىن العا تارتتى. ول كەڭەستە قارجىنىڭ قانشالىقتىڭ ءتيىمدى جۇمسالىپ جاتقانى قارالادى.
«كولەڭكەلى تابىسقا كەنەلىپ جۇرگەندەر قورعا قارجى اۋدارسىن دەگەن ۇسىنىستاردى ەستىپ جاتىرمىن. قارجى حالىق يگىلىگىنە جۇمسالادى. سوندىقتان قورعا ادال جولمەن تاپقان تابىستىڭ تۇسكەنىن قالايمىز. مەن ءۇشىن قايىرىمدىلىق قاراجاتتىڭ قايدا جۇمسالاتىنى وتە ماڭىزدى»، - دەيدى ول.
ودان بولەك، بولات جامىشيەۆ ءوزىنىڭ قور ءتوراعاسى بولىپ تاعايىندالۋىنا قاتىستى ءبىر اۋىز پىكىر ءبىلدىردى. «مەنى ءتوراعا ەتىپ قوردىڭ قامقورشىلىق كەڭەسى مۇشەلەرى سايلادى»، - دەپ قىسقا قايىردى. بۇعان دەيىن «قازاقستان حالقىنا» قورىنا تۇسكەن ءار تەڭگەنىڭ قايدا جۇمسالعانى حالىققا اشىق كورسەتىلەتىنى ايتىلدى.
اۆتور: ءالي يبرايەۆ