الەمدىك جانە ءداستۇرلى دىندەر كوشباسشىلارىنىڭ 7-سەزىندە قانداي ماسەلەلەر تالقىلانباق
بۇل تۋرالى الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ ⅩⅨ وتىرىسىندا ق ر اقپارات جانە قوعامدىق دامۋ ۆيتسە- ءمينيسترى سەرىك ەگىزبايەۆ ايتتى، دەپ حابارلايدى قازاقپارات ءتىلشىسى.
ونىڭ اتاپ وتۋىنشە، كەشە حاتشىلىق جۇمىس توبىنىڭ وتىرىسى ءوتىپ، وندا الەمدىك جانە ءداستۇرلى دىندەر كوشباسشىلارى 7-سەزىنىڭ جالپى جانە سەكتسيالىق وتىرىستارىنىڭ تاقىرىبى بويىنشا جۇمىس توبى مەن حاتشىلىق مۇشەلەرىنىڭ 49 ۇسىنىسىن جيناقتاۋ جۇرگىزىلدى.
«2022 -جىلى 7-سەزگە شاقىرىلعانداردىڭ ءتىزىمىن قالىپتاستىرۋ جۇمىس جالعاسىپ جاتقانىن ايتا كەتۋ كەرەك. دايىندىق كەزەڭىندە سەزدىڭ ماقساتتارى مەن مىندەتتەرىن ىلگەرىلەتۋ جونىندەگى اقپاراتتىق جۇمىسقا باسا ءمان بەرىلگەن. ماسەلەن، قازىرگى ۋاقىتتا ءىرى حالىقارالىق بۇقارالىق اقپارات قۇرالدارىندا مىڭعا جۋىق ماتەريال جاريالاندى. فەيسبۋك، تەلەگرام، ينستاگرام الەۋمەتتىك جەلىلەلەرىندە 3 مىڭنان استام جاريالانىم ورنالاستىرىلدى. جۇمىس توبىنىڭ مۇشەلەرى مەن سەزد حاتشىلىعىنىڭ قاتىسۋمەن ءبىرقاتار ءتۇرلى فورماتتاعى ءىس- شارالار وتكىزىلدى. سوڭعى ۋاقىتتا عانا ءۇندىستان، پاكىستان، جەنيەۆا، چەحيا جانە ساۋد ارابياسىندا سەزدىڭ ماقساتتارى مەن مىندەتتەرىن ىلگەرلەتۋگە ارنالعان ءىس- شارالار ۇيىمداستىرىلعان. سونداي- اق ارمەنيا، ۆەنگريا، گەرمانيا، يران، كانادا، قىرعىزستان، مالايزيا، تۇركيادا وسىنداي ءىس- شارالاردىڭ جوسپارلانعانىن اتاپ وتكىم كەلەدى»، - دەدى سەرىك ەگىزبايەۆ.
ۆيتسە-ءمينيستردىڭ ايتۋىنشا، جۇمىس توبىنىڭ وتىرىسىندا ءدىنارالىق جانە مادەنيەتارالىق ديالوگتىڭ ءرولى مەن ماڭىزى، رۋحاني- ادامگەرشىلىك قۇندىلىقتار، الەمنىڭ پاندەميادان كەيىنگى جاعدايىندا 7-سەزد جۇمىسىن جاڭا تاسىلدە وتكىزۋ قاجەتتى تۋرالى پىكىر الماسىلعان.
«ماسەلەن، مۋحاممەد بەن ابدۋلۋاحەد ءال-اريفي پاندەميا ادام ءومىرىنىڭ كوپتەگەن سالالارىنا اسەر ەتكەنىن اتاپ ءوتتى. وسىعان بايلانىستى رۋحاني قۇندىلىقتاردى ساقتاۋعا دەن قويۋ قاجەت. ارحيەپيسكوپ يۋريي نوۆگورودوۆ پاندەميا كوپتەگەن جاڭا نارسەلەردى، سونىڭ ىشىندە سيفرلاندىرۋدى اكەلگەنىنە نازار اۋداردى. سوندىقتان ءدىني قوعامداستىقتار مەن ولاردىڭ كوشباسشىلارىن قازىرگى الەمنىڭ شىنايىلىعىندا ادامگەرشىلىك قاعيدالارىن قالىپتاستىرۋداعى ءرولى تۋرالى ماسەلە تۋىندايتىندىعىن ايتتى. قاتىسۋشىلار 7-سەزدىڭ جۇمىسى مەن فورماتى الەمدى ودان دا ءقاۋىپسىز، تولەرانتتى، بولجامدى ەتۋ ءۇشىن سىندارلى ىنتىماقتاستىقتى قامتاماسىز ەتۋ، مادەنيەتتەر، حالىقتار مەن دىندەر اراسىنداعى ءوزارا ءىس- قيمىلدىڭ ءتيىمدى ءتاسىلىن بەلگىلەۋ ءتيىس ەكەندىگىن اتاپ ءوتتى»، - دەدى ول.
ونىڭ سوزىنە قاراعاندا، ءۇندىستاننىڭ «سومايا ۆيدياۆيحار» ۋنيۆەرسيتەتى كونفەسسياارالىق قارىم- قاتىناس جانە ءوزارا تۇسىنىستىك باعدارلاماسىنىڭ حاتشىسى رۋدراكشا ساكريكار ق ر تۇڭعىش پرەزيدەنتى - ەلباسى نۇرسۇلتان نازاربايەۆتىڭ سەزدى جانە ءتۇرلى ءدىن وكىلدەرىنىڭ جەكە كەزدەسۋىن وتكىزۋ جونىندەگى باستاماسىنىڭ ماڭىزدىلىعىن ايتقان.
اۆتور: مارلان جيەمباي