توپپەن زورلىق جاساعان: شىمكەنتتە كۇدىكتى 7 جىلدان كەيىن ۇستالدى

نۇر-سۇلتان. قازاقپارات - شىمكەنتتە توپپەن بىرگە زورلىق جاساپ، سوت تورەلىگىنەن جاسىرىنىپ جۇرگەن كۇدىكتى ۇستالدى.

ىشكى ىستەر مينيسترلىگىنىڭ باسپا ءسوز قىزمەتى وسىنداي اقپارات تاراتتى، دەپ حابارلايدى قازاقپارات.

بۇعان دەيىن پوليتسيا وسى ءىس بويىنشا كۇدىككە ىلىنگەن ءۇش ادامدى تۇتقىنداپ، قىلمىستىق جاۋاپكەرشىلىككە تارتقان بولاتىن. ولار 2014-جىلدىڭ ناۋرىز ايىندا شىمكەنت قالاسىنىڭ يگىلىك اۋىلىندا «موسكۆيچ-412» اۆتوكولىگىنىڭ سالونىندا 23 جاستاعى قىزدى زورلاعان.

«ءتورتىنشى قىلمىسكەردى ىزدەۋگە رەسپۋبليكانىڭ قالالارى مەن وبلىستارىنىڭ پوليتسيا دەپارتامەنتتەرىنىڭ جەكە قۇرامى باعىتتالدى. كۇدىكتىنىڭ تۇرعان جەرىن انىقتاپ، ۇستاۋ ءۇشىن كورشىلەرى مەن تۋىستارىنان، جاقىن دوستارى مەن تانىستارىنان، بۇرىنعى سەرىكتەستەرىنەن جاۋاپ الىندى. ول بوي جاسىرۋى مۇمكىن مەكەنجايلار تەكسەرىلدى. كەيىن وعان حالىقارالىق ىزدەۋ جاريالانىپ، قىرعىزستان، وزبەكستان، تاجىكستان جانە رەسەي فەدەراتسياسىنىڭ ىشكى ىستەر مينيسترلىكتەرىنە باعدارلار جولداندى. قىلمىس جاسالعانعا دەيىن كۇدىكتى رەسەي اۋماعىنا بىرنەشە رەت بارعانى انىقتالدى. وسىعان بايلانىستى قازاقستاندىق دەتەكتيۆتەر كورشى ەلگە ءىس ساپارعا باردى»، - دەپ جازادى مينيسترلىكتىڭ باسپا ءسوز قىزمەتى.

7 جىل بويى قولعا تۇسپەگەن كۇدىكتى اقىرى، شىمكەنت قالاسىندا ۇستالدى. «پوليتسيا قىزمەتكەرلەرى قاشقىننىڭ ورنالاسقان جەرىن انىقتاپ، ونى شىمكەنت قالاسىنداعى «ەۆريكا» ساۋدا ورتالىعىنىڭ جانىندا تۇتقىندادى. كۇدىكتى بوي تاسالاپ جۇرگەندە تۋىستارىمەن جانە دوستارىمەن ارالاسۋىن توقتاتقان. ءارتۇرلى قالالاردا جالدامالى پاتەرلەردە تۇرىپ، پاتەرلەر مەن ۇيلەردى جوندەۋمەن اينالىسقان. اشكەرە بولىپ قالماس ءۇشىن ۇنەمى قالپاق، قارا كوزىلدىرىك كيىپ، مۇرت پەن ساقال وسىرگەن. ادامدار كوپ جينالاتىن جەرلەرگە، قوعامدىق ورىندارعا بارمايتىن بولعان. قازىرگى ۋاقىتتا كۇدىكتى شىمكەنت قالاسى پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى»، - دەپ جازىلعان رەسمي مالىمەتتە.