ۋحاندا جويقىن داۋىل بولىپ، 7 ادام قايتىس بولدى

نۇر-سۇلتان. قازاقپارات - قىتايدىڭ ۋحان قالاسىندا الاي-دۇلەي قۇيىن بولىپ، سالدارىنان 7 ادام مەرت بولدى، دەپ حابارلايدى Egemen.kz.

ودان وزگە، جويقىن داۋىلدان 200-گە جۋىق ادام ءتۇرلى جاراقات الدى.

قۇيىن ۋحانعا جەرگىلىكتى ۋاقىت بويىنشا كەشەگى 20:40-تا ءدال كەلدى. جەلدىڭ جىلدامدىعى ساعاتىنا 86 شاقىرىمعا جەتتى. سونىمەن بىرگە كايديان وكرۋگىنىڭ ۇكىمەتى داۋىلدىڭ سوققىسىنان ورمان اعاشتارى قۇلاعانى ءمالىم ەتتى.

وسىدان ءبىر جارىم ساعات بۇرىن شانحاي ماڭىنداعى جيانسۋ پروۆينسياسىنداعى شەنجە قالاسىنا تاعى ءبىر قۇيىن ءتۇستى. بيلىكتىڭ ايتۋىنشا، مۇندا 1 ادام اپاتتىڭ قۇربانى بولىپ، 20-دان استام ادام جاراقات الىپتى. جەلدەن بىرنەشە عيمارات زارداپ شەگىپ، ەلەكترمەن جابدىقتاۋ نىساندارى زاقىمداندى.