قازاقستاننان 7 ەلگە اۋە قاتىناسى قايتا جاندانادى
ق ر يندۋستريا جانە ينفراقۇرىلىمدىق دامۋ مينيسترلىگىنەن ءمالىم ەتكەندەي، مۇنداي شەشىمدى قازاقستان رەسپۋبليكاسىنىڭ اۋماعىندا كوروناۆيرۋس ينفەكسياسىنىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيا 11 - تامىزدا قابىلدادى.
«ق ر اۋماعىندا كوروناۆيرۋستىق ينفەكسيانىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ 11 - تامىزداعى شەشىمىنە سايكەس ق ر دەنساۋلىق ساقتاۋ مينيسترلىگىنىڭ ۇسىنىمدارىن، ەپيدەميولوگيالىق جاعدايدىڭ دەڭگەيىن ەسكەرە وتىرىپ، د د س ۇ كارتاسىنا سايكەس 2020 -جىلعى 17- تامىزدان باستاپ بىرىككەن اراب امىرلىكتەرىنە، بەلارۋس رەسپۋبليكاسىنا، گەرمانياعا، نيدەرلاندىعا، ەگيپەتكە، ۋكرايناعا جانە رەسەي فەدەراتسياسىنا حالىقارالىق رەيستەر كەزەڭ- كەزەڭمەن جاڭارتىلادى»، - دەلىنگەن حابارلامادا.
مينيسترلىك جوعارىدا اتالعان ەلدەردىڭ اۆياتسيالىق ورگاندارىمەن بىرلەسىپ تۇراقتى جولاۋشىلار رەيستەرىن قالپىنا كەلتىرۋ ماسەلەسىن الدىن الا پىسىقتادى. وسىلايشا، بۇل ەلدەر سانيتارلىق- ەپيدەميولوگيالىق تالاپتارعا سايكەس (تەرمومەتريا، الەۋمەتتىك ديستانسيا، ماسكا رەجيمى، پ ت ر تەستىلەۋ جانە ت. ب. ) قازاقستانمەن اراداعى اۋە قاتىناسىن قالپىنا كەلتىرۋدى قولدايدى. سونىمەن بىرگە رەسەيگە ۇشۋ ءۇشىن رەسەي تاراپىنان رۇقسات تالاپ ەتىلەتىنىن اتاپ وتكەن ءجون.
حالىقارالىق باعىتتار بويىنشا رەيستەردىڭ سانى اۋە قاتىناسى تۋرالى ۇكىمەتارالىق كەلىسىم نەگىزىندە جانە ءار باعىتتاعى اۋە كەمەلەرىنىڭ كوممەرتسيالىق جۇكتەمەسىنە بايلانىستى ورىندالادى. رەيستەر مەن بيلەتتەردى ساتۋ اۋەكومپانيالاردىڭ سايتتارىندا جاريالانعان كەستەگە سايكەس ازاماتتاردىڭ جوعارىدا اتالعان ەلدەرمەن مەملەكەتتىك شەكارالار ارقىلى وتۋىنە شەكتەۋلەر الىنىپ جانە قازاقستان مەن ءتيىستى ەلدەر بەلگىلەگەن سانيتارلىق قاۋىپسىزدىك شارالارى كۇشەيتىلگەن جاعدايدا ەپيدەميولوگيالىق جاعدايدىڭ جاقسارۋىنا قاراي جۇزەگە اسىرىلاتىن بولادى.
www.24.kz