الەمدە 7 ميلليون بالا باس بوستاندىقتارىنان ايىرىلعان – ب ۇ ۇ

None
None
نۇر-سۇلتان. قازاقپارات - بۇگىندە 7 ميلليوننان استام بالا بوستاندىقتارىنان ايىرىلعان. ولار تۇرمەدە، يمميگرانتتاردى قابىلدايتىن ورتالىقتاردا جانە وزگە دە جابىق مەكەمەلەردە وتىر، دەپ حابارلايدى قازاقپارات ب ۇ ۇ- نىڭ رەسمي سايتىنا سىلتەمە جاساپ.

بىرىككەن ۇلتتار ۇيىمى Global Campus of Human Rights ۇيىمىمەن بىرلەسىپ وتكىزگەن زەرتتەۋ ناتيجەسى قالىپتاسقان احۋال بالا قۇقىقتارى جونىندەگى كونۆەنتسيانىڭ پرينتسيپتەرىنە كەرەعار ەتەتىن كورسەتكەن. بۇل حالىقارالىق كەلىسىمشارتتىڭ قابىلدانعانىنا قاراشا ايىندا 30 جىل بولادى.

ساۋالنامالار بارىسىندا انىقتالعانداي، جابىق مەكەمەلەرگە كوبىنە حالىقتىڭ كەدەي ساناتىنان، ءدىني ازشىلىق توپتاردان شىققان بالالار، ميگرانتتار، بوسقىندار مەن مۇگەدەك-بالالار تۇسەدى. دەنىن اتا-انالارى تاستاپ كەتكەن نەمەسە ولاردان تارتىپ العان. ساراپشىلار اتاپ وتكەندەي، كوشەگە تۇسكەن ولار زورلىق-زومبىلىق قۇربانىنا اينالادى نەمەسە ەڭبەك قۇلدىعىنا اينالادى.

«كەم دەگەندە 410 مىڭ جاس ءوسپىرىم مەن بالالار زورلىق-زومبىلىق قالىپتى جاعداي سانالاتىن تۇرمەلەردە نەمەسە تەرگەۋ يزولياتورلارىندا وتىر. ولاردىڭ كوبىنە ساباقتان قاشۋ، تارتىپكە باعىنباۋ جانە الكوگول ءىشۋ كىنالارى تاعىلعان. تاعى ميلليون بالا قانداي دا ءبىر ءمان-جايدى انىقتاۋ ءۇشىن پوليتسيا ۋچاسكەلەرىنە جەتكىزىلگەن. ودان بولەك، جىل سايىن 80 ەلدەن 330 مىڭ بالا ميگرانتتاردى قابىلدايتىن ورتالىقتاردى پانالايدى. بەس ميلليوننان استامى ءتۇرلى ۇلگىدەگى جابىق مەكەمەلەرگە توعىتىلعان. سونىمەن قاتار، سوڭعى ۋاقىتتا قارۋلى قاقتىعىستارمەن بايلانىستى نەمەسە ۇلتتىق قاۋىپسىزدىكتى قورعاۋ تۇرعىسىندا تۇرمەگە تۇسەتىن كامەلەتكە تولماعانداردىڭ سانى ارتۋدا»، - دەلىنگەن ب ۇ ۇ سايتىندا.

ءمالىم ەتىلگەندەي، بوستاندىقتان ايىرۋ دەنساۋلىعىنداعى كىناراتتاردى ءورشىتىپ، جاڭا پروبلەمالار تۋىنداتادى: دەپرەسسيا، تراۆمادان كەيىنگى سيندروم، سۋيتسيد تۋرالى ويلار. «عالىمدار انىقتاعانداي، بالالاردى تۇرمەدە ۇستاۋ مەن بوستاندىققا شىققاننان كەيىنگى ءولىمىنىڭ اراسىندا بايلانىس بار»، - دەدى ۇيىمنان.

زەرتتەۋ بارىسىندا بۇل ماسەلەدە ازداعان وڭ وزگەرىس بارى انىقتالعان. ءبىراق بالالاردى جابىق مەكەمەلەردە ۇستاۋ شارالارىنا التەرناتيۆا تابۋ قاجەتتىگى اتاپ وتىلەدى.

سوڭعى جاڭالىقتار