الەمدەگى ەڭ ۇلكەن 7 ءمۇسىن

نۇر-سۇلتان. قازاقپارات - ۇلكەن ءارى بيىك مۇسىندەر ەجەلگى داۋىرلەردە سالىنا باستاعان. مىسالى، ەجەلگى مىسىرلىقتار تۇرعىزعان ۇلى سفينكستىڭ بيىكتىگى 20 مەتردى قۇرايدى.

الايدا سوڭعى ءجۇزجىلدىقتا بيىكتىگى بويىنشا الەمنىڭ ەجەلگى كەرەمەتتەرىن باسىپ وزاتىن بىرنەشە مۇسىندەر تۇرعىزىلدى. تومەندە قازىرگى تاڭداعى ەڭ بيىك 7 ءمۇسىندى كەلتىرمەكپىز.

7. كيەۆتەگى وتان- انا ءمۇسىنى

ۇلى وتان سوعىسىنىڭ قۇرمەتىنە تۇرعىزىلعان بۇل ەسكەرتكىش پاتريوتتىققا شاقىرادى. ءمۇسىننىڭ قۇرىلىسى 1981 -جىلى اياقتالعان، ەسكەرتكىشتىڭ ءوزى 62 مەتر بيىكتىكتى قۇرايدى، ال جالپى قۇرىلىسىن قوسقاندا بيىكتىگى 102 مەترگە جەتەدى. ءمۇسىننىڭ سالماعى - 560 توننا. ءبىر قىزىعى، بۇعان قاراعاندا ۆولگوگرادتاعى وتان انا ءمۇسىنى تانىمالىراق، ءبىراق ونىڭ بيىكتىگى - 54 مەتر.

6. يان مەن حۋان يمپەراتورلارىنىڭ ءمۇسىنى

بۇل ءمۇسىن تاسقا قاشالىپ جاسالعان، ول ءۇشىن ەكى ونجىلدىق قاجەت بولدى. قۇرىلىسى 2007 -جىلى اياقتالدى. ءمۇسىننىڭ جالپى بيىكتىگى - 106 مەتر. ايتا كەتەيىك، بۇل ءمۇسىن قىتايدىڭ ەكى تۇڭعىش يمپەراتورى - يان دي مەن حۋان ديگە ارنالعان.

5. قىتايداعى گۋان ين ءمۇسىنى

108 مەترگە جەتەتىن حۋان ين بودحيساتتۆاسىنىڭ ءمۇسىنى قىتايدىڭ حاينان ارالىنىڭ وڭتۇستىك جاعالاۋىندا ورنالاسقان. ءمۇسىندى جاساۋعا 6 جىل كەتكەن، جۇمىس 2005 -جىلى اياقتالعان.

4. پورتۋگالياداعى كريشتۋ رەي ءمۇسىنى (110 مەتر)

بۇل ءمۇسىن ريو- دە- جانەيرودا 1959 -جىلى تۇرعىزىلعان تانىمال قۇتقارۋشى يسا ءماسىح مۇسىنىنەن شابىتتانىپ جاسالىنعان. ونى قۇراستىرۋعا 10 -جىل كەتكەن، ال ولشەمى ريوداعى مۇسىنگە تولىقتاي سايكەس. مونۋمەنتتىڭ جالپى بيىكتىگى 110 مەتردى قۇرايدى.

3. جاپونياداعى ۋشيكۋ دايبۋتسۋ ءمۇسىنى (120 مەتر)

ۋشيكۋ دايبۋتسۋ ءمۇسىنى اميتابح بۋدداسىنا ارنالعان جانە جاپونيانىڭ ۋشيكۋ قالاسىندا ورنالاسقان. ول 1995 -جىلى قۇراستىرىلعان. بۇل الەم بويىنشا بيىكتىگى جاعىنان ۇشتىككە كىرەتىن ءمۇسىن، ەسكەرتكىشتىڭ جالپى بيىكتىگى 120 مەتردى قۇرايدى. ءمۇسىننىڭ ىشىندەگى ليفت ارقىلى ەڭ بيىككە كوتەرىلۋگە بولادى.

2. ميانماداعى Laykyun Setkyar ۇزىندىعى 130 مەتر

بۇل ءمۇسىن بيىكتىگى جاعىنان الەمدەگى ەكىنشىسى. ول ورتالىق ميانماداعى كاۋنگ دوڭىنە قۇراستىرىلعان. ونىڭ اياق جاعىندا بۋددانىڭ الەمدەگى ەڭ ۇلكەن جانتايعان ءمۇسىنى ورنالاسقان. جانتايعان بۋددا 1991 -جىلى سالىندى.

1. كوكتەم عيباداتحاناسىنىڭ بۋدداسى (153 مەتر)

بۇل الەمدەگى ەڭ ۇلكەن جانە ەڭ بيىك ءمۇسىن. ەسكەرتكىشتىڭ جالپى بيىكتىگى 153 مەتردى قۇرايدى. ءمۇسىننىڭ قۇرىلىسى تەرروريستەردىڭ اۋعانستانداعى باميان بۋددالارىن جارىپ جىبەرگەننەن كەيىن باستالعان. قۇرىلىس جۇمىسى 2008 -جىلى ءبىتتى.