وڭ ويلاۋ ارقىلى جەتىستىككە جەتۋ: 7 كەڭەس

نۇر-سۇلتان. قازاقپارات - ءسىزدىڭ قانشالىقتى كوڭىلدى ءارى باقىتتى ەكەندىگىڭىز، باسقا فاكتورلارمەن سالىستىرعاندا، تىكەلەي ءپوزيتيۆىڭىزدىڭ دەڭگەيىنە بايلانىستى.

دۇرىس تاماقتانۋ دەنساۋلىق پەن ەنەرگياعا اسەر ەتەدى. ەگەر ساپالى جانە پايدالى ونىمدەردى تۇتىنىپ، زياندى ازىقتان باس تارتساڭىز، وندا ءسىزدىڭ قۋاتىڭىز البەتتە مولايا تۇسەدى. اعزاڭىز كوپتەگەن اۋرۋلارعا توتەپ بەرە باستايدى. ۇيقىڭىز تىنىش بولىپ، ءوزىڭىزدى ساۋ ءارى باقىتتى سەزىنەسىز.

اقىل-ويعا بەرىلگەن ازىقتىڭ ساپاسى دا ايتارلىقتاي مىنەزىڭىزگە، دارالىعىڭىزعا جانە جالپى ايتقاندا ءسىزدىڭ ومىرىڭىزگە قاتتى اسەر ەتەدى.

ميىڭىزدى ءپوزيتيۆتى وي مەن دۇرىس اقپاراتتار، پايدالى كىتاپتار جانە بولىمدى ادامدارمەن اڭگىمەلەسۋ ارقىلى قانىقتىرساڭىز، وندا تۇلعالىق قاسيەتتەرىڭىز كونسترۋكتيۆتى ءارى ءپوزيتيۆتى دامىپ، ىقپالدى ءارى سەنىمدى ادامعا اينالاسىز. وزىڭىزگە سەنىمىڭىز ارتىپ، ءوزىڭىزدى باعالاي باستايسىز.

ساناڭىزدى تولىق ءوز باقىلاۋىڭىزعا الۋ، ءسىزدى وتكەن شاقتا ۇستاپ تۇرعان جاعىمسىز ويلار مەن ەموتسيالاردى جويۋ جانە تولىقتاي ءپوزيتيۆتى ادام بولۋ ءۇشىن ناقتى ءارى سالماقتى شەشىم قابىلداعان بولساڭىز، تۇلعاڭىزعا وزگەرىستەر جاساۋعا مۇمكىندىگىڭىز تۋادى. ءسىزدىڭ مىندەتىڭىز - ءوز نۇسقالارىڭىزدىڭ ەڭ ۇزىدىگى بولۋ.

اقىل-وي جاتتىعۋلارى دەنە جاتتىعۋلارىنا ۇقسايدى. ءسىز ءبىلىم الۋ جانە ونى پراكتيكادا قولدانۋ ارقىلى، ءوزىڭىزدى جوعارى باعالاۋ جانە وڭ ويلاۋ رۋحاني كوڭىل-كۇي سەزىمىن دامىتاسىز. تولىقتاي ءپوزيتيۆتى ادام بولۋعا كومەكتەسەتىن 7 پايدالى كەڭەس.

1. جاعىمدى ىشكى ديالوگ

وزىڭىزبەن جاعىمدى ىشكى ديالوگ جۇرگىزىڭىز. ءوزىڭىزدىڭ ىشكى ديالوگىڭىزدى قاداعالاپ، وڭ ءارى شىن مانىندە بار مالىمدەمەلەردى وسى شاقتا ايتىڭىز. مىسالى: «مەنىڭ قولىمنان كەلەدى»، «مەن ءوزىمدى جاقسى سەزىنىپ تۇرمىن»، «مەن جاۋاپتى اداممىن». بۇل جەتىستىككە جەتكەن ادامداردىڭ ۋاقىتتارىنىڭ كوپ بولىگىندە ويلايتىن ويلارى مەن سوزدەرى.

پسيحولوگتار كوڭىل-كۇيدىڭ %95 ىن كۇنى بويى ءوزىمىز جايلى ايتاتىن سوزدەرىمىز انىقتايتىنىن بىلدىرەدى. ول ىشكى ديالوگ دەپ اتالادى. بۇل كۇنى بويى قالىپتاساتىن وي مەن سەزىمدەردىڭ اعىنى، ولار ساناڭىز ارقىلى وتەدى. ەگەر ءسىز بىلە تۇرا وزىڭىزبەن جاعىمدى ديالوگ جۇرگىزبەسەڭىز، وندا اۆتوماتتى تۇردە ءسىزدى باقىتسىز ەتىپ، ۋايىمداۋعا ماجبۇرلەيتىن نارسەلەردى ويلاي باستايسىز.

ەسىڭىزدە بولسىن، ءسىزدىڭ ساناڭىز بوس كەڭىستىك ەمەس. ول ەشقاشاندا بوس بولىپ قالمايدى. ەگەر ءسىز ونى دۇرىس ويلارمەن تولتىرماساڭىز، وندا ول تەرىس ويلارعا تولى بولادى. ساناڭىزدى باقشا دەپ الساق. وسى باقشاعا نىسانالى تۇردە گۇل ەگىلمەسە، ول جەردە ارامشوپتەر وسە باستايدى. ەگەر ءسىزدىڭ ويلارىڭىز وڭ بولماسا جانە ولاردى باسقارا الماساڭىز، وندا تەرىس ويلار اۆتوماتتى تۇردە ساناڭىزدى جاۋلاپ الادى.

2. جاعىمدى ۆيزۋاليزاتسيا

قازىرگى ۋاقىتتا سىزدە بار ەڭ مىقتى قابىلەتتىڭ ءبىرى - ۆيزۋاليزاتسيا جاساۋ جانە الدىڭىزعا قويعان ماقساتتارىڭىزدى ورىندالىپ قويعان، جەتىپ قويعان تۇرىندە كورۋ. ءومىرىڭىزدىڭ ۇيلەسىمدى ءارى ءمىنسىز بولىپ قويعان ءساتىن ەلەستەتىپ كورىڭىز. بۇعان قول جەتكىزۋ ءۇشىن قاجەت بولعان بولىمدى مىندەتتەرىڭىز بەن ماقساتتارىڭىزدى جانە ءمىنسىز ءومىرىڭىزدى ەلەستەتىپ كورىڭىز. جانە بۇل كورىنىستى ساناڭىزدا ءجيى ويناتىڭىز.

مۇنىڭ ءمانى، ءسىزدىڭ سىرتقى ومىرىڭىزدە بولاتىن وڭ وزگەرىستەردىڭ بارلىعى ىشكى الەمىڭىزدەگى بەينەنى جاقسى جاققا وزگەرتكەننەن باستاۋ الادى. جانە ساناڭىزداعى بەينەنىڭ ماعىناسى (وڭ/تەرىس) تەك ءسىزدىڭ عانا تولىقتاي باقىلاۋىڭىزدا. ءسىز ىشكى الەمىڭىزدە ءوزىڭىزدى قالاي ەلەستەتسەڭىز، سىرتتا دا سونداي بولىپ قالىپتاسىپ، جەتىستىكتەرىڭىز دە سونداي دەڭگەيدە بولادى.

3. پوزيتيۆتى ادامدار

ءومىر سۇرەتىن، ارالاساتىن جانە بىرگە جۇمىس ىستەيتىن قوعامدى تاڭداۋىڭىز، باسقا اسپەكتىلەرمەن سالىستىرعاندا ءسىزدىڭ سەزىمدەرىڭىز بەن جەتىستىكتەرىڭىزگە ءوز اسەرىن كوبىرەك تيگىزەدى. سەبەبى ءسىزدىڭ ىشكى ديالوگىڭىز بەن وي قالىپتارىڭىز تىكەلەي قوعامعا تاۋەلدى. بارىنشا نەگاتيۆتى ادامداردان اۋلاق ءجۇرىڭىز. ويتكەنى ولار ومىرىڭىزدەگى باقىتسىزدىقتىڭ ەڭ باستى سەبەبى بولىپ تابىلادى.

4. اقىلعا دۇرىس قورەك بەرۋ

دەنىڭىزدىڭ ساۋلىعى اعزاڭىز ءۇشىن پايدالى، ساپالى ازىق بەرۋمەن تىكەلەي قاتىسى بار. سول سياقتى ساناڭىزدىڭ ساۋلىعى دا ونى نەمەن قورەكتەندىرەتىنىڭىزگە بايلانىستى. سىزگە جىگەر، ءبىلىم، شابىت بەرەتىن كىتاپتار مەن ماقالالار وقىڭىز.

كولىكتە نەمەسە بوس ۋاقىتىڭىزدا كونسترۋكتيۆتى، پوزيتيۆتى اۋديو جازبالاردى تىڭداڭىز. ءبىلىم جانە ءنار بەرەتىن باعدارلامالاردى، ونلاين كۋرستاردى، موتيۆاتسيا بەرەتىن ماتەريالداردى قاراڭىز.

ءار جاڭا نارسە ۇيرەنگەن سايىن، ميىڭىز باقىت گارمونى سانالاتىن ءەندورفيندى بولەدى.

5. دۇرىس ءبىلىم الۋ مەن دامۋ

بۇل ومىردە كوپتەگەن ادامدار ىستەرىن شەكتەۋلى قاراجاتپەن باستايدى. كەيدى ءتىپتى اقشاسىز دا. ادەتتە كەز كەلگەن بايلىق قاراپايىم قىزمەت كورسەتۋدەن باستالادى. بۇگىنگى كۇندە بيىكتەن كورىنگەن ادامداردىڭ كوبى نولدەن باستاۋ العان.

ءبىلىم بەرۋ مەكەمەلەرىنەن العان ستاندارتتى ءبىلىم، بىزگە ومىردە اقشا تابۋعا عانا مۇمكىندىك بەرەدى، ال ستاندارتتى بىلىممەن شەكتەلىپ قالماي، ءوزىڭىزدى ارى قاراي جەتىلدىرۋ ءسىزدى بايلىققا يتەرمەلەيدى.

ءوزىڭىزدى بىلىمگە، ءوز-ءوزىڭىزدى دامىتۋعا، جەتىلدىرۋگە ارناپ، ءىس-ارەكەتىڭىز بەن ويىڭىزدى ساپالى ءارى ءتيىمدى ەتسەڭىز، ءومىرىڭىزدى تولىقتاي باقىلاۋعا الىپ، جاڭا بەلەستەردى باعىندىرۋ ءۇشىن، شىڭعا ۇمتىلۋ جىلدامدىعىڭىزدى ۇدەمەلى تۇردە كوبەيتە الاسىز.

6. ءپوزيتيۆتى ءارى ساۋ ادەتتەر

دەنساۋلىعىڭىزعا قامقورلىق جاساڭىز. ءوزىڭىز ءۇشىن 80, 90 نەمەسە 100 جىل ءومىر ءسۇرىپ، سونىڭ وزىندە ومىرگە قۇشتار ءارى ءال- اۋقاتى قۋاتتى ادام بولامىن دەپ شەشىم قابىلداڭىز. دۇرىس ۇيلەسىمدى تاماقتانۋ مەن كۇندەلىكتى دەنە جاتتىعۋلارىن جاساۋ، ءسىزدىڭ سەزىمدەرىڭىز بەن ويلارىڭىزعا وڭ اسەر ەتەدى.

بۇل قاربالاس ومىردە ءبىر مەزگىل دەمالۋعا دا ۋاقىت تابىڭىز. ءوزىڭىزدى قۋاتتاندىرىپ تۇرۋىڭىز كەرەك. اسىرەسە قيىنشىلىققا تاپ بولىپ، كۇيزەلىسكە تۇسكەن كەزىڭىزدە بۇل وتە ماڭىزدى. جۇمىس پەن دەمالىستىڭ اراسىندا بالانس تابا ءبىلىڭىز.

7. وڭ ءۇمىت

بۇل ءپوزيتيۆتى تۇلعا بولىپ قالىپتاسۋ ءۇشىن، قورىتىندىلار وڭ بولىپ، ومىردە ەڭ ۇزدىك ناتيجەلەرگە جەتۋ ءۇشىن قولداناتىن ەڭ مىقتى ءادىس بولىپ تابىلادى. ءۇمىتىڭىز جەكە جول باستاۋشىڭىزعا اينالادى.

جەتىستىككە كەنەلەتىنىڭىزدى، تانىمال بولاتىنىڭىزدى... كۇتىڭىز. ۇلكەن بەلەستەردى باعىندىرىپ، بيىك ماقساتتارىڭىزعا جەتىپ، وزىڭىزگە كەرەمەت جاعداي جاسايتىنىڭىزعا سەنىڭىز.