قازاقستاندىق كاسىپقوي بوكسشى قارسىلاستارىن 7 رەت نوكاۋتقا جىبەرگەن امەريكالىقپەن كەزدەسەدى
«قازاقستان كاسىپقوي بوكسى» ۆكونتاكتە پاراقشاسى حابارلاعانداي، اۋىر سالماقتاعى قازاقستاندىق بوكسشى امەريكالىق نەيت حەۆەنمەن (9-2, 7 ك و) قولعاپ تۇيىستىرەدى.
ايقاس سەگىز راۋندقا ەسەپتەلىپ وتىر. جەكپە-جەكتىڭ 12- شىلدەدە وتەتىنى بەلگىلى بولعانىمەن، ناقتى قاي جەردە ۇيىمداستىرىلاتىنى ءالى بەلگىسىز. ءاۋ باستا دىچكو برازيليالىق رافاەل زۋمبانومەن (39-16-1، 31 ك و) كەزدەسەدى دەپ حابارلانعان بولاتىن، الايدا بۇل ايقاس وتپەيتىن بولدى.
ەسكە سالا كەتسەك، جەڭىلىپ كورمەگەن قازاقستاندىق كاسىپقوي بوكسشى يۆان دىچكو سوڭعى ايقاسىندا امەريكالىق رەي ءوستيندى ءۇشىنشى راۋندتا تىزە بۇكتىرگەن بولاتىن. ايقاس ءۇش راۋندقا عانا سوزىلدى. وزىنەن 20 جاس ۇلكەن، سالماعى 29 كەلى اۋىر رەي وستين كوپكە بارعان جوق. وزىنەن جاس ءارى قايراتتى يۆاننان ءۇشىنشى راۋندتا تەحنيكالىق نوكاۋت الدى.
يۆان دىچكونىڭ مەنەدجەرى زيا اليەۆ بوكسشىنىڭ بيىلعا قۇرعان جوسپارى تۋرالى ايتىپ بەرگەن ەدى.
«12- شىلدەدەگى جەكپە-جەكتەن كەيىن يۆان تامىزدا تاعى ءبىر كەزدەسۋ وتكىزەدى. ءبىز ونى قايتا بابىنا كەلتىرۋگە ارەكەت ەتىپ جاتىرمىز. يۆان بيىلدىڭ سوڭىنا دەيىن ءۇش جەكپە-جەك وتكىزەتىنى انىق. وسى جىلدى يۆان 11:0 نەمەسە 12:0 رەكوردىمەن اياقتايدى دەپ وتىرمىز. كاسىپقوي بوكستا، اسىرەسە امەريكادا نوكاۋتتاردىڭ ماڭىزى زور. ول گونورارعا دا، ايقاستىڭ قىزىق بولۋىنا دا، تەلەۆيدەنيەگە دە اسەر ەتەدى. يۆان الداعى كەزدەسۋلەرىنىڭ بارلىعىن نوكاۋتپەن اياقتاسا ەكەن دەپ تىلەپ وتىرمىز»، - دەيدى اليەۆ.