جامبىلدىق ورەندەر ەل بويىنشا 7 جىل قاتارىنان «ەڭ ۇزدىك كوماندا» اتاندى
ق ر ءبىلىم جانە عىلىم مينيسترلىگىنىڭ «دارىن» رەسپۋبليكالىق عىلىمي-پراكتيكالىق ورتالىعى ۇيىمداستىرعان ءداستۇرلى بايقاۋدىڭ رەسپۋبليكالىق كەزەڭىنە جامبىل وبلىسىنان 58 وقۋشى قاتىسىپ، باقتارىن سىنادى. رەسپۋبليكالىق كونكۋرستىنىڭ بيىلعى ەرەكشەلىگى - وقۋشىلاردىڭ عىلىمي جوبالارىن قورعاۋدىڭ اشىقتىعى مەن ايقىندىلىعىن قامتاماسىز ەتۋ ماقساتىندا بارلىق سەكسيالار ونلاين-رەجيمدە ءوتتى.
عىلىمي جوبالار بايقاۋى 4 باعىت بويىنشا جۇرگىزىلدى. بايقاۋ قورىتىندىسى بويىنشا، جامبىلدىق 5 وقۋشى التىن، 2 وقۋشى كۇمىس جانە 17 وقۋشى قولا مەدالدى يەلەنىپ، توپ جاردى. سونداي-اق، بيىلعى جىلى دا جامبىل وبلىسىنىڭ كومانداسى 7 جىل قاتارىنان «ەڭ ۇزدىك كوماندا-2019» اتاعىن جەڭىپ الدى.
ايتا كەتەيىك، اتالعان رەسپۋبليكالىق بايقاۋعا ەلىمىزدىڭ استانا، الماتى، شىمكەنت قالالارى مەن 14 وبلىسىنان، ونىڭ ىشىندە، رەسپۋبليكالىق ءبىلىم بەرۋ ۇيىمدارى جانە نازاربايەۆ زياتكەرلىك مەكتەپتەرىنەن 800 دەن اسا دارىندى وقۋشى جالپى ءبىلىم بەرەتىن پاندەر بويىنشا سىنعا تۇسكەن بولاتىن.