ادام اتاۋلىسىنا ورتاق تازالىقتىڭ 7 ەرەجەسى

استانا. قازاقپارات - 1. «قول تازالىعى». بۇل ەشكىمىڭ الا ءجىبىن اتتاماۋ، ارتىق زاتىن الماۋ دەگەن ءسوز.

مۇنىمەن قاتار اينالامىزداعى جاعدايى جوق ادامدارعا 1/40 نەمەسە 1/10 ۇلەسىمىزدى بەرۋىمىز كەرەكتىگى جايىندا ايتىلادى.

2. «قۇلاق تازالىعى». وسەك، ماقتان، وتىرىك ءسوزدى، قورقاق، اشۋشاڭ جانە جىگەرسىز ادامداردى تىڭداۋدان باس تارتۋىمىز كەرەك. التىن ۋاقىتتى بوس ءسوز ولتىرەدى.

3. «كوز تازالىعى». كوزدى كورەالماۋشىلىقتان، كەكتەن، قىزعانىشتان امان ساقتاۋ.

4. «ءتىل تازالىعى». ءتىلىمىزدى جامان، بىلاپىت، بوس سوزدەردى ايتۋدان ساقتاندىرعانىمىز ابزال. ۇنسىزدىك التىنمەن تەڭ.

5. «ءتان مەن كيىم تازالىعى». بۇعان گيگيەنالىق تازالىقتىڭ دا قاتىسى بار. ياعني ءتان مەن كيىمدى ءاردايىم تازا ۇستاۋ.

6. «وي تازالىعى». بۇل - ويىمىزدى جاماندىقتان ارىلتۋ. ءاردايىم پوزيتيۆتى ويلاۋعا شاقىرۋ. وزىمىزگە جاناشىرلىقپەن قاراۋدى دوعارۋ. ودان ءبىز نە ۇتامىز؟ ورنىنا جارقىن بولاشاققا جاقسى باستامالارمەن اتتانعانىمىز ءجون.

7. «جان مەن جۇرەكتىڭ تازالىعى». رۋحاني قۇندىلىقتارىمىزدى جوعارى قويۋمىز كەرەك. وزگەنى ءسۇيىپ، قايتارىمىنا ەش نارسە سۇراماڭىز. ماحاببات پەن سۇيىسپەنشىلىك - ناعىز باقىت.