ءوز-ءوزىڭدى تارتىپكە كەلتىرۋدىڭ 7 ءادىسى
بۇل سوزدەردىڭ ماعىنالارى ءبىر: ارەكەتتەردى سانالى تۇردە ورىنداۋ مەن پسيحيكالىق تۇراقتىلىق ءسىزدىڭ ءتىپتى جاساعىڭىز كەلمەگەن ءىستى دە جاساۋعا كومەكتەسەدى.
عالىمداردىڭ پىكىرىنشە، ەرىك كۇشى ءالسىز ادامدارعا قاراعاندا ەرىك كۇشى مىقتى ادامداردىڭ ءومىرى باقىتتىراق بولادى. ولار ءاردايىم تەست، ەمتيحانداردان جوعارى بالل الادى، تابىستارى دا وزگەلەرگە قاراعاندا جوعارى بولادى. سوندىقتان، جەكە ماقساتتاردى ىسكە اسىرۋدا دا كۇش جىگەردىڭ ماڭىزى زور.
ءبىر جاعىنان، ەرىك كۇشى - پايدالانۋعا بەرىلەتىن قور، سونىمەن قاتار، ەرىك كۇشى - جەتىلۋگە بەيىم داعدى. ءبىز سىزدەرگە ىشكى ءتارتىپتى ارتتىرۋعا ارنالعان عىلىمي دالەلدەنگەن 7 تەزيستى ۇسىنعالى وتىرمىز.
1. ەشتەڭەگە الدانباڭىز
ەرىك كۇشىنىڭ دە شەگى بار، سوندىقتان بۇل قوردى بوسقا قۇرتپاۋعا تىرىسىڭىز. بىردەڭەگە الدانعان سايىن ءسىز ەرىك كۇشىڭىزدى السىرەتەسىز جانە ونى تولتىرۋ ءۇشىن تاعى ۋاقىت قاجەت بولادى. سوندىقتان، ەگەر مۇمكىندىك بولسا، ومىرىڭىزدەگى الدانىشتاردى جويىڭىز.
مىسالى، تەلەديداردى كوپ كورەتىن بولساڭىز، ال سىزگە ماڭىزدى جۇمىس جوباسىن ءبىتىرۋ كەرەك بولسا، كابەلدىك تەلەديداردى مۇلدە اعىتىپ تاستاڭىز نەمەسە تەلەديدارىڭىزدى بىرەۋگە سىيلاي سالىڭىز. ەگەر تۇندە شوكولاد جەۋدى ۇناتساڭىز، ءۇيىڭىزدى «شوكولادتان ەركىن كەڭىستىك» ەتىڭىز جانە تاتتىلەر ساتىلاتىن دۇكەندەردى اينالىپ ءوتىڭىز.
2. قانداعى قانت دەڭگەيىن تۇراقتاندىرىڭىز
قانداعى قانت دەڭگەيىنىڭ كۇرت تومەندەۋى ىشكى ءتارتىپتىڭ السىرەۋىنە ىقپال ەتەدى. بۇعان قۇرامىندا قانتى كوپ ونىمدەردىڭ اسەرى مول. ءبالىش، شوكولاد نەمەسە ءتاتتى شىرىنداردان باس تارتۋعا تىرىسىڭىز. بۇل دا كەيدە تىعىرىققا تىرەيدى: تاتتىدەن باس تارتۋ ءۇشىن دە ەرىك كۇشى قاجەت قوي.
3. ۇيقىڭىز قانىق بولسىن
ۇيقىڭىز قانعانشا ۇيىقتاۋعا تىرىسىڭىز. ەرەسەك ادامعا ورتاشا سەگىز ساعات ۇيقى قاجەت. عىلىمي تاجىريبەلەر دالەلدەگەندەي، ەگەر ادام از ۇيىقتاسا، ونىڭ جيناقتالۋ قابىلەتى تومەندەيدى.
4. ومىردەن ءلاززات الىڭىز
وڭ ەموتسيالار مەن قۋانىشتى ساتتەر ءوز-ءوزىڭدى تارتىپكە كەلتىرۋ قۋاتىن تولتىرادى. سوندىقتان، كۇندەلىكتى ومىردەن ءلاززات الۋعا ۋاقىت تابىڭىز.
بوس ۋاقىتىڭىزدا جۇگىرۋ، گيتارادا ويناۋ سياقتى وزىڭىزگە ۇنايتىن ىسپەن اينالىسىڭىز. بۇل دا ءسىزدى قۋانتىپ، جىگەرلەندىرەدى.
5. كۇيزەلىستەن اۋلاق بولىڭىز
كۇيزەلىس ءوز-ءوزىڭدى تارتىپكە كەلتىرۋ كۇشىن السىرەتەدى. كۇيزەلىستىڭ الدىن الۋ ءۇشىن موينىڭا كوپ جۇك ارتا بەرمەۋدى جانە بوساڭسۋدى ۇيرەنۋ كەرەك. مۇندايدا دەمالۋ جاتتىعۋلارى نەمەسە يوگا كومەككە كەلەدى.
6. ناقتى جوسپار قۇرىڭىز
ماقساتقا جەتۋ جولىن جەڭىلدەتۋ ءۇشىن ونى ناقتىلاپ، ارەكەتتەر جوسپارىن جاساڭىز. ەرىك- جىگەرىڭىز ورتايا باستاعاندا بۇل كومەككە كەلەدى.
7. ەرىك كۇشىڭىزدى نىعايتىڭىز
ءوز-ءوزىڭدى تارتىپكە كەلتىرۋ بۇل ءاردايىم ماشىقتانۋدى تالاپ ەتەتىن بۇلشىق ەت. نازارىڭىزدى ءوزىڭىز باسقارا الاتىن كىشىگىرىم تاپسىرمالارعا اۋدارىڭىز، جانە بىرتىندەپ بۇدان دا كوپ تاپسىرمالاردى ورىنداي الاتىن بولاسىز. مىسالى، كۇنى بويى يىعىڭىزدى ءتۇزۋ ۇستاۋعا تىرىسىڭىز نەمەسە ەپسىز قولىڭىزبەن (سولاقاي بولساڭىز وڭ قولىڭىزبەن، وڭقاي بولساڭىز سول قولىڭىزبەن) جازۋ جازىپ كورىڭىز.
دەرەككوزى: "پ ت" توپتاماسىنان