ەۋروپاداعى تۋرنيردە قازاقستاندىق بوكسشىلار 7 «التىن» الدى

استانا. قازاقپارات - سەربيانىڭ ۆرباس قالاسىندا جاس وسپىرىمدەر اراسىندا ەكىنشى رەت وتكىزىلىپ وتىرعان «ۇلتتار كۋبوگى» تۋرنيرى ءوز مارەسىنە جەتتى.

فينالدا 8 قازاقستاندىق بوكسشى ونەر كورسەتتى. بۇل تۋرالى قازاقپارات قازاقستاننىڭ بوكس فەدەراتسياسىنا سىلتەمە جاساپ حابارلايدى.

15 - 20 تامىز ارالىعىندا وتكەن سەربياداعى حالىقارالىق جارىسقا 26 ەلدىڭ وكىلدەرى قاتىسىپ، 200 استام سپورتشى باقتارىن سىنادى. بايراقتى باسەكە دراگو يوۆوۆيچ اتىنداعى سپورت كەشەنىندە جالاۋىن كوتەردى.

تۋرنيرگە 2002-2003-جىلدارى دۇنيەگە كەلگەن بالالار قاتىستى. كوبى ەۋروپا ەلدەرىنىڭ وكىلدەرى. ولار ءۇشىن الداعى ەۋروپا بىرىنشىلىگى الدىنداعى جاقسى دايىندىق بولىپ وتىر. سونىمەن قاتار، جارىستا ا ق ش پەن ماۆريكيا ەلىنىڭ وكىلدەرى، ازيا قۇرلىعىنان قازاقستان، وزبەكستان جانە ينديادان سپورتشىلار بولدى.

حالىقارالىق تۋرنيردە قازاقستاندىق كوماندا تاماشا ناتيجەگە قول جەتكىزدى. جاس بوكسشىلارىمىز بارلىعى 7 التىن، 1 كۇمىس، جانە 5 قولا مەدال جەڭىپ الىپ، كوماندالىق ەسەپتە ءبىرىنشى ورىندى يەلەندى. 60 كەلى سالماقتا ونەر كورسەتكەن سۇلتان باباحانوۆ فينالدا ا ق ش كەلگەن بريون كاروتەرستى جەڭىپ، تۋرنيردىڭ ەڭ ۇزدىك بوكسشىسى اتاندى. ال نۇرجان امانگەلدى (63 كەلى) اقتىق كەزدەسۋدە ا ق ش سپورتشىسى كاسين گولدستوۋندى جەڭىپ، ساپالى ونەر كورسەتكەنى ءۇشىن ماراپاتتالدى.

جاس وسپىرىمدەر كومانداسىن جەڭىستەرىمەن قۇتتىقتايمىز!

جەڭىمپازدار مەن جۇلدەگەرلەر ءتىزىمى:

ەربولات سابىر (50 كەلى) - التىن

الماز ۇزىحانوۆ (54 كەلى) - التىن

سۇلتان باباحانوۆ (60 كەلى) - التىن

نۇرجان امانگەلدى (63 كەلى) - التىن

ءامير بولاتوۆ (66 كەلى) - التىن

ەۆگەني پريحودكو (75 كەلى) - التىن

امانات سابىرعالي (+80 كەلى) - التىن

ەراسىل تانكاي (52 كەلى) - كۇمىس

باۋىرجان ءساتجانوۆ (57 كەلى) - قولا

مەيىرجان ايدار (60 كەلى) - قولا

يليا كيسەليەۆ (70 كەلى) - قولا

ەراسىل جاكپەكوۆ (75 كەلى) - قولا

گەورگي اۋشيەۆ (+80 كەلى) - قولا