سامال ەسلياموۆا: ءبىز بۇعان 7 جىلىمىزدى سارپ ەتتىك
ەسكە سالا كەتەيىك، سامال ەسلياموۆا 71- حالىقارالىق كانن كينوفەستيۆالىندە «ۇزدىك ايەل ءرولى» اتالىمى بويىنشا جەڭىمپاز اتانعان بولاتىن. ول قازاقستاننىڭ تۋماسى، تالانتتى رەسەيلىك رەجيسسەر سەرگەي دۆورەسكويدىڭ «ايكا» اتتى پسيحولوگيالىق دراماسىندا قىرعىزستاندىق ەميگرانتتىڭ ءرولىن سومداعان بولاتىن.
سامال ەسلياموۆا سولتۇستىك قازاقستان وبلىسىندا تۋعان. ونىڭ ءتۇر-تۇلعاسىنان شىنايىلىعى، ەشكىمگە ۇقسامايتىن ەرەكشەلىگى بايقالىپ تۇرادى. ىشكى جان-دۇنيەسى تەرەڭ، باي. بۇل قاسيەتتەر درامالىق كينو اكتەرلارىنىڭ وزگەگە ۇقسامايتىن بولمىسىن قالىپتاستىرادى.
«ايكا» فيلمىنە سامال ءومىرىنىڭ 7 جىلىن ارناعان. كينونىڭ ءتۇسىرىلىمى ءدال وسىنشا ۋاقىتقا سوزىلعان. تۋىندى ەۋروپانىڭ ۇزدىك سىنشىلارىنىڭ جوعارى باعاسىنا يە بولدى. كارتينادا ماسكەۋگە كەلگەن قىرعىز قىزىنىڭ تاۋقىمەتى مول ءومىرى باياندالادى.
- كارتينانى تۇسىرۋگە جەتى جىلعا جۋىق ۋاقىت كەتىپتى. وسى كەزەڭ اراسىندا سىزگە ەڭ قيىن سوققانى نە؟
- فيلمدە كوتەرىلەتىن تاقىرىپ جەڭىل تاقىرىپ ەمەس. بۇل پسيحولوگيالىق دراما، سول سەبەپتى ءتۇسىرىلىم كەزىندە دە قيىنشىلىقتار بولدى. مەن ءوز جۇمىسىمدى وتە قاتتى جاقسى كورەمىن، ماعان ءوز ىسىممەن اينالىسقان رۋحاني ءلاززات سىيلايدى. ءدال وسى قاسيەت جانە رەجيسسەردىڭ شىعارماشىلىق الەۋەتىنە دەگەن سەنىم ماعان كۇش بەردى. بۇل تۋىندىدا مەن سومداعان كەيىپكەر كادردىڭ 99,9 پروتسەنتىندە بولدى.
- سامال، كەلەسى سۇراق ءسىز ويلاعانداي ەرەكشە ەمەس، ءبىراق ونى قويماي وتە المايمىن. قازىر ءوزىڭىزدى قالاي سەزىنىپ وتىرسىز؟
- مۇمكىن، ءالى وسى جۇلدەنى جەڭىپ العانىمدى سەزىنە الماي جاتقان شىعارمىن. ءبارى ءتۇس سەكىلدى. قالاي ايتسام ەكەن، بۇل وتە ءبىر جاقسى سەزىم. ءبىزدىڭ بارلىق شىعارماشىلىق ۇجىم ەڭ جوعارعى جۇلدەنى الۋ ءۇشىن ايانباي ەڭبەك ەتتى، سول ءۇشىن بارىمىزدى سالدىق.
- ءسىز جۇلدە تاپسىرۋ راسىمىندە ۇلتتىق نىشاندارى بار ەرەكشە كويلەكپەن شىقتىڭىز. ونى تاڭداۋعا كوپ ۋاقىت جۇمسادىڭىز با؟
- مەنىڭ وعان ۋاقىتىم مۇلدە بولمادى. ارينە، مەن ۇلتتىق كيىممەن شىققىم كەلدى. ول ءۇشىن قازاقستانعا كەلىپ، ولشەپ كورۋ كەرەك ەدى. قايتالاپ ايتام، بوس ۋاقىت مۇلدە بولعان جوق. ءبىز ءبىزدىڭ وتانداستارىمىزدىڭ - قازاقستاندىق پروديۋسسەرلەردىڭ كومەگىمەن ءتۇرلى وبرازداردى قاراپ كوردىك تە، وسىعان توقتالدىق. بۇل كويلەكتى ماعان ماسكەۋگە اكەلىپ بەردى.
- مىقتى باسەكەلەستەرىڭىز بولعانى ءۇشىن قوبالجىعان ءساتىڭىز بولدى ما؟
- شىنىمدى ايتسام، فەستيۆالگە قاتىسىپ جاتقان بارلىق ءفيلمدى قاراۋعا مۇرشامىز بولمادى. الايدا ءبىز جانكەشتىلىكپەن ەڭبەك ەتتىك، بار جىگەرىمىزدى جۇمساپ، جەڭىسكە جەتۋگە ۇمتىلدىق.
- بارشا وقىرماندارىمىزدىڭ اتىنان ءسىزدى تاريحي جەڭىسىڭىزبەن قۇتتىقتايمىز، سامال. سۇحباتتاسقانىڭىز ءۇشىن العىس ايتامىز.
فوتو Roman Gurochkin-نىڭ Facebook-تەگى پاراقشاسىنان الىندى.