ەلباسى دەگەن ەكەن... نەمەسە قازاقستان پرەزيدەنتىنىڭ 7 ءازىلى

نۇر-سۇلتان. قازاقپارات - «قازاقپارات» حالىقارالىق اقپارات اگەنتتىگى وقىرمان قاۋىمنىڭ نازارىنا ەلباسىنىڭ ەستەلىككە اينالعان ەڭ ۇزدىك ازىلدەرىن ۇسىنادى.

1) تەمىرتاۋ قالالىق تاريحي- ايماقتىق مۋزەيدىڭ ديرەكتورى ناتاليا سكوريكوۆانىڭ نۇرسۇلتان ءابىش ۇلىنا: «سىزگە 8 ميلليون ايەل عاشىق!» دەگەنى بار. نۇرسۇلتان ءابىش ۇلى دا تىڭ ماقتاۋعا توسىلىپ قالماي: «وندا سۇلەيمەن سۇلتان دەمالا تۇرسىن» دەگەن ەكەن. (2015 -جىلدىڭ 24 - ساۋىرىندە قازاقستان حالقى اسسامبلەياسىنىڭ ХХІІ سەسسياسىندا ايتىلعان ءسوز).

2) نۇرسۇلتان نازاربايەۆ ا ق ش- قا ءىس ساپارى بارىسىندا امەريكانىڭ پرەزيدەنتى دجوردج ۋوكەر بۋشقا كىرمەي تۇرىپ، ونىڭ اكەسى امەريكانىڭ 41- پرەزيدەنتى دجوردج گەربەرت ۋوكەر بۋشقا باس سۇعادى. نۇرسۇلتان نازاربايەۆ ارداگەر ساياساتكەردىڭ ۇيىندە ءبىر ءتۇن قوناق بولىپ، ەرتەسىندە ويانسا دجوردج گەربەرت تەڭىز جاعاسىندا وتىرعان ەكەن. نۇرسۇلتان ءابىش ۇلى سول جولعى ساپاردى بىلايشا ەسكە الادى: «ول ماعان «سەن قازىر ۆاشينگتونعا باراسىڭ. وندا رەسمي ساپارىڭ، جۇمىسىڭ باستالادى. مۇمكىن ماعان قويار ساۋالىڭ بولار؟» دەپ سۇرادى. مەن ەشقانداي ساۋالدىڭ جوقتىعىن، تەك ەسكى دوسىما قوناققا كەلگەنىمدى ايتتىم. دجوردج گەربەرت «ەلدىڭ كوبى مەن ونىڭ اكەسى بولعاندىقتان، قولىما تاياق الىپ، ونى اق ءۇي اينالا قۋىپ جۇرەدى» دەپ ويلايتىن شىعار. ال مەن قازىر تەك امەريكانىڭ قاراپايىم ازاماتىمىن. دەسە دە، ءبىر شارۋاڭا كومەكتەسە الامىن. سەن اق ۇيگە كىرگەن كەزدە وعان 41-پرەزيدەنت الداعى سەنبىدە 43-پرەزيدەنتتىڭ اكەسىنىڭ كىم ەكەنىن تانىتاتىنىن ايت»، - دەدى». نازاربايەۆ «ىڭعايسىزداۋ بولادى عوي» دەگەنىنە قاراماستان، دجوردج بۋشتىڭ اكەسى «ءسوزىمدى قاز- قالپىندا جەتكىز. سودان كەيىن ارالارىڭدا جايلى احۋال قالىپتاسادى» دەگەنىنەن تايماپتى. اقىرى، ءبارى دە ۇلكەن دجوردج بۋشتىڭ ايتقانىنداي بولادى. نۇرسۇلتان ءابىش ۇلىنىڭ اۋزىنان اكەسىنىڭ سوزبە- ءسوز سالەمىن تىڭداعان ا ق ش پرەزيدەنتى دجوردج بۋش قارقىلداپ كۇلىپ جىبەرگەن ەكەن.

3) تاتارستان پرەزيدەنتى رۋستام ميننيحانوۆ: «ءبىزدىڭ دەلەگاتسيا وتە جوعارى دەڭگەيدە سابانتويدى وتكىزدى. سىزگە راحمەت! قازاقستاندا ءبىزدىڭ 220 مىڭ تاتار ءومىر سۇرەتىنىن بىلەمىز...» دەي بەرگەندە نۇرسۇلتان ءابىش ۇلى: «ولار ءسىزدىڭ ەمەس، ءبىزدىڭ تاتارلار!» دەپ ازىلمەن ءبىر-اق كەسىپتى.

4) ءبىزدىڭ ۇكىمەت تولىق قۇراممەن جاڭا جىلدى ۇكىمەت ۇيىندە قارسى العالى وتىر. ويتكەنى: «جاڭا جىلدى قايدا قارسى الساڭ، ءبىر جىل بويى تۋرا سول ورىندا قالاسىڭ» دەگەن ىرىم بار (نۇرسۇلتان نازاربايەۆتىڭ 2016 -جىلدىڭ 29-جەلتوقسانىندا استانادا وتكەن جاڭاجىلدىق بالدا سويلەگەن ءسوزى).

5) ادىلبەك جاقسىبەكوۆ: «العاشقى جىلدارى استانادا نۇرسۇلتان نازاربايەۆ جانار- جاعارماي بەكەتىن اشۋدى تاپسىردى. مۇناي كومپانيالارىنىڭ باسشىلارىنىڭ ءبارىن جيناپ الدى دا «تىم بولماعاندا جانار- جاعارماي بەكەتىن اشىڭدار» دەپ تاپسىرما بەردى. كاسىپكەرلەر اشتى» . نۇرسۇلتان نازاربايەۆ: «ويتكەنى، قالا قاپ- قاراڭعى ەدى. ال جانار- جاعارماي بەكەتى ءاردايىم سولاردىڭ ەسەبىمەن جارىقتاندىرىلاتىن. بارلىق جەردە بەكەتتىڭ ءبارى - قالانى جارىقتاندىرۋ ماسەلەسىن دە شەشەتىن ەدى».

6) نازاربايەۆ 2014 -جىلى پاۆلودار وبلىسىنىڭ قىمىز وندىرەتىن شاعىن زاۋىتىنا باس سۇعادى. زاۋىتتىڭ باسشىسى ايەل ەكەن. ەلباسىمەن تۇڭعىش كەزدەسىپ تۇرعاندىقتان، ازداپ تولقىپ كەتسە كەرەك: «تاۋلىگىنە ءبىر توننا قىمىز وندىرەمىز. ءسىزدىڭ شاعىن جانە ورتا بيزنەستى دامىتۋعا قوسقان قولداۋ مەن كومەك كورسەتىپ جاتقانىڭىزعا شىن كوڭىلىممەن راحمەت ايتامىن. سىزگە قاراپ كوڭىلىم جاي» دەپ ۇنىندە ءدىرىل پايدا بولادى. كاسىپكەردىڭ ءسوزىن ءىلىپ اكەتكەن نۇرسۇلتان ءابىش ۇلى «سوزىڭىزگە قاراپ قىمىز ىشكىمىز كەلىپ كەتتى عوي» دەپ اينالانى دۋ كۇلدىرىپتى.

7) «جۋىردا مەنەن شەتەلدىك ساراپشىلار «الماتىدا قار جاۋماي قالسا قايتەمىز» دەپ سۇراپ جاتىر. مەن ەركىن عانا «استانادان اكەلەمىز» دەپ جاۋاپ بەردىم. قۇدايعا شۇكىر، الماتىدا قازىر قار جەتكىلىكتى» . (الماتى، 2017 -جىلدىڭ 29 -قاڭتارى، بۇكىلالەمدىك قىسقى ۋنيۆەرسيادانىڭ اشىلۋىندا سويلەگەن ءسوزى).

دايىنداعان: ريزابەك نۇسىپبەك ۇلى