نەسىپبەك ايت ۇلىنىڭ 7 تومدىق جيناعىنىڭ تۇساۋكەسەرى وتەدى
كوپ تومدىق شىعارمالار جيناعىنىڭ العاشقى 6 تومىنا ن. ايت ۇلىنىڭ تىرناقالدى تۋىندىلارىنان باستاپ، اقىندىق جولىندا جازىلعان تاڭدامالى ولەڭدەرى مەن پوەمالارى ەنگىزىلدى. ال سوڭعى 7- تومىنا اقىننىڭ پۋبليتسيستيكالىق ەڭبەكتەرى مەن ءار جىلدارى بەرگەن سۇحباتتارى قامتىلدى.
ادەبيەت سۇيەر قاۋىمعا، ادەبيەت زەرتتەۋشىلەرگە ايرىقشا كومەك قۇرالى بولا الاتىن جەتىنشى تومداعى ادەبيەتشىلەر، ادەبي ۇردىستەر، ادەبي سىن جونىندە ايتقان سۇبەلى وي، تولعامدى پىكىرلەرى بۇگىنگى قازاق ادەبيەتىنىڭ دە جاي-كۇيىنەن سىر شەرتەدى.
جانە قازىرگى قوعام مەن الەۋمەتتىك احۋال، ونەر مەن مادەنيەت، ادەبيەت توڭىرەگىندە ايتقان سۇحباتتارىنان اقىننىڭ قازاق ۇلتىنا، ونىڭ رۋحانياتى مەن ءتىلى، دىلىنە دەگەن ايرىقشا جاناشىرلىعىن بايقاۋعا بولادى.
كوپ تومدىق كوپشىلىك وقىرمانعا ارنالعان. عيبراتى مول عۇمىر جولىندا كەيىنگى ۇرپاققا بەرەرى مول بەدەرلى جىرلار مەن ساليقالى ماقالالار توپتاستىرىلعان بۇل جەتى توم وقىرماندارىنا وي سالىپ، قازاق ادەبيەتىنىڭ سان سالالى قويناۋىنا جەتەلەرى ءسوزسىز.
سالتاناتتى شاراعا قوعام جانە مەملەكەت قايراتكەرلەرى، اقىننىڭ ادەبيەت سالاسىنداعى ۇزەڭگىلەس دوستارى مەن بەلگىلى قالامگەرلەر، اقىننىڭ ارتىنان ەرگەن اقىن ىنىلەرى، ب ا ق قىزمەتكەرلەرى مەن قازاق ونەرىنىڭ تانىمال وكىلدەرى قاتىسادى.
تۇساۋكەسەر ءراسىمىن تانىمال جۋرناليست، قازاق جۋرناليستيكاسىندا سارا جول سالعان نامازالى وماشەۆ.
«ادەبيەت پورتالى»
