ەشقاشان جەتىستىككە جەتپەيتىندىكتىڭ 7 بەلگىسى

نۇر-سۇلتان. قازاقپارات - ەشكىم ۇيرەتپەيتىن نارسەلەردى ايتىپ بەرەمىن.

كادۋىلگى ءومىر داعدىسىنىڭ شەگىنەن شىعۋعا نە يتەرمەلەيدى؟

اتا-اناڭىزدىڭ ۇيىنەن كوشۋگە، جۇمىستى تاستاۋعا، بارىنە قولدى ءبىر سىلتەپ، باسقا الەمگە اياق باسۋعا باستايتىن نارسە نە؟

ومىردەن الاتىن تاجىريبە مەكتەپتە وقىتاتىن ساباقتاردان مۇلدە بولەك. ءومىر ءسۇرۋدى تەك ءوزىڭىزدى تاپساڭىز عانا جۇيەگە قويا الاسىز.

قولدا باردىڭ ءبارىن تاۋەكەلگە تىگىپ، ەرتەڭ بارىنەن ايىرىلىپ قالام دەگەن ۇرەيمەن بەتپە-بەت كەلسەڭىز عانا - ءومىر ناعىز ءومىر. شىن مانىندە وتە ماڭىزدى نارسەگە بەل بۋىپ، ءبارىن باسكە تىكسەڭىز عانا ءومىردى تۇسىنەتىن قاسيەت پەن قارىم-قابىلەتكە يە بولا الاسىز. ءبىر قاراعاندا مۇنىڭ ءبارى بويىڭىزدان تابىلاتىن سياقتانادى. ءومىر دەگەن ويىندا ءسىزدىڭ بىردە-ءبىر مۇمكىندىگىڭىز جوق. نەگە دەيسىز بە؟

1. جەڭىلىس از بولعاندىقتان

ءوزىڭىزدىڭ دارىنسىزدىعىڭىزعا ريزاسىز. ءتىپتى، تاۋەكەلگە بەل بۋۋعا تالپىنبايسىزدا. جاڭا ءبىر ءتىل ۇيرەنۋ كەرەك دەيسىز. ءبىراق ونى ۇيرەنۋگە ەش ارەكەت جاسامايسىز. نە بولسا دا، تىنىش وتىرىپ ۋاقىت وتكىزەسىز. ياكي، اۋىر جۇمىستى ەرتەڭگە قالدىراسىز. ءوز جۇمىسىڭىزدى جەك كورەسىز.

الايدا جاڭاسىن ىزدەۋگە قۇلىقسىزدىق تانىتاسىز. وسى جەردە تۇك ىستەمەي، ءتىپتى ءبىر رەت كورۋگە جۇرەك داۋالاماي وتىرعان كەزىڭىزدە مەن قاتەلىكتەرىمدى تەرىپ، ءوزىمدى سىناپ، جاڭانىڭ ءبارىنىڭ ءدامىن تاتىپ ءجۇرمىن.

مەن جەڭىلگەن كەزدە كوپ نارسە ۇيرەنەمىن. ءوزىمنىڭ باعىتىمدى وزگەرتەمىن. باعىتىم تەك العا! قۇرىشتى شىنىقتىرعانداي دۇنيە عوي. وتتان ءوتىپ، پىشىنگە يە بولام. ءجۇزى وتكىر، لىپىپ تۇرعان الداسپانعا اينالامىن. بۇل الداسپان ءسىزدى ەش كۇش سالماي-اق تۋراپ تاستايدى.

2. وزگەلەر نە دەيدى دەپ كۇن كورۋ

دەپ ويلاساڭىز، ءسىز سول ادامنىڭ ءسوزىنىڭ ىڭعايىنا قۇلايسىز. سونىڭ ءسوزىن سويلەيسىز. ويتكەنى، باسقا جۇرت ءسىزدىڭ قانداي ەكەنىڭىزدى كورەدى دەپ قورقاسىز. ءسىز نەگە وزگەنىڭ سوزىنە ەرەسىز؟ ويتكەنى، وزگەنى ءسوز ەتكەندى ادەت قىلعانسىز.

بىرەۋدىڭ ءمىنى مەن قاتەلىگىن جىپكە تىزەسىز. وزگەلەر دە ءسىز تۋرالى ءسوز قىلادى دەپ ويلايسىز. ۇساق-تۇيەككە اۋەسسىز. ءىرى ارەكەتكە جوقسىز. بار تاپقانىڭىزدى قىمبات كيىم مەن كولىككە، تاماق پەن قىدىرۋعا جۇمسايسىز. ال، مەن ءوزىمدى تانۋعا تىرىسىپ ءجۇرمىن. ءسىز سىرتقى الەمگە ەلىكتەپ جۇرگەندە، مەن الەم ماعان ەلىكتەيتىندەي ەتۋگە تىرىسىپ ءجۇرمىن. مەن سەنىمدى تۇردە بار كۇمان-كۇدىكتى سەرپىپ تاستاپ، الەمگە ءوزىمنىڭ شىنايى بولمىسىمدى كورسەتەمىن. وزگەنىڭ پىكىرىنە يممۋنيتەتىم كۇشتى. مەن تەك يدەيالاردان قورعان سوعامىن. ءسىز تۇرمىسقا تابىنساڭىز، مەن قورشاعان الەم عاجايىپتارىن زەردەلەي بەرەم.

3. بولمىسىڭىزدان ارتىق اقىلدىمىن دەرسىز

شىن مانىندە وزگەلەر نە ىستەسە، سىزدە سونى ىستەدىڭىز. ولار نە وقىسا، سونى وقىدىڭىز. تەك ەمتيحان تاپسىرۋ ءۇشىن وقىعانىڭىزدان اقىلدى بولىپ كەتتىم دەپ ويلايسىز با؟ ءبىلىم نە وقىعانىڭدا ەمەس، ءومىردى قالاي سۇرەتىنىڭدە. كەرەك بولسا، سول ەمتيحانعا دا باسىم جەتەدى. ال، ءومىر مەنىڭ الدىما قويعان قيىندىقتاردى ءسىز جەڭە الاسىز با؟ مەن وتەتىن ومىرلىك ەمتيحاندار بالدىق جۇيەمەن دە، پايىزبەن دە ەسەپتەلمەيدى. ونىڭ باعاسى بىرەۋ عانا: ول ءتىرى قالۋ.

4. كىتاپ وقىمايسىز

كەرەك ساباقتى عانا وقيسىز نەمەسە مۇلدە ەشتەڭە وقىمايسىز. تاريح ءسىز ءۇشىن ءىش پىستىرارلىق، ءپالساپا توپاس ءپان. وزگەنىڭ ويىن قۋالاپ، ونىڭ دەگەنىن تۇسىنۋگە تىرىسىپ، الەمدى دۇرىس قابىلداۋعا جۇرەك اشقاننان گورى تەلەشوۋ قاراپ، ۋاقىت ولتىرەسىز. ءومىردىڭ كۇشى بۇل فانيدەن وتكەن عۇلامالاردىڭ سوزىندە دەگەنگە سەنبەيسىز. بار قاجەتتىنى قولجەتىمدى بولعان قالىڭ كىتاپتاردان تاباتىنىڭىزعا بەيجاي قارايسىز. بۇل ماقالانى دا كوزبەن سىدىرتىپ شىعاسىز، اشەيىن. مۇنى وقىپ وتىرعانداردىڭ بارلىعى ونسىزدا شىندىقتى بىلەتىن بولسا كەرەك. جىلقىنى سۋاتقا ايداپ اكەلۋگە بولادى، ءبىراق زورلىقپەن سۋ ىشكىزە المايسىز.

5. تانىمىڭىز تەرەڭ ەمەس

ويتكەنى جاڭالىقتى مەملەكەت تۇمشالاپ وتىرعان ب ا ق-تان عانا بىلەسىز. «مۇنىڭ بارلىعى وتىرىك بولسا شە؟» دەگەن سۇراقتى وزىڭىزگە قويمايسىز. ونداي ەركىن ويعا جول بەرمەيسىز. ب ا ق-تىڭ باستى ماقساتى ءسىزدىڭ نازاردى ەڭ نەگىزگى، ماڭىزدىدان باسقا جاققا اۋدارۋ.

مەن نە نارسەنى دە ءبىلىپ، ءوزىم كوزىممەن كورىپ، ءوز قولىممەن جاساعىم كەلىپ تۇرادى. ءسىز تەلەفوننان ويىن ويناپ وتىرعاندا مەن پەرنەنىڭ پايدا بولۋى مەن كۆانت مەحانيكا تەورياسىن وقىپ تاستادىم.

ويتكەنى، ءوزىمنىڭ كەلتىرگەن ۋاجدەرىمە ءتۇرلى باعىتتان قاراپ، ولاردىڭ كەمشىلىگىن ءوزىم ءبىلىپ وتىرامىن. ءسىز قالاي قارسى پىكىر ايتاتىنىڭىزدى الدىن الا ەسەپتەپ وتىرامىن. داۋلاسقان ەكى جاقتىڭ دا ءۋاجىن تۇسىنەمىن. ءبىراق ەگەر مەن ءسىزدىڭ ءسوزىڭىزدى قوستاسام، وندا مەن جەڭىپ شىعامىن. جاڭا عانا سىزبەن وسى تاقىرىپتا تاجىكەلەسىپ، باسقا قىرىنان ءسىزدى جەڭىپ تۇرسام دا.

6. ءسىز سۇراق قويمايسىز

تۇلعا كورسەڭىز، ءلاپپاي تاقسىر دەيسىز. ولاردىڭ بولمىسىنا شاك كەلتىرمەيسىز. وزىڭىزگە سۇراق قويمايسىز. قۇرمەتپەن قويىلار سۇراقتار بولادى. ءبىراق ءسىز ولاردى قويا المايسىز. ويتكەنى، قالاي سۇراق قويۋدى بىلمەيسىز. شىنايى ءومىر تۋرالى سۇراق تۋمايدى سىزدە. ءوزىڭىزدىڭ ءبىرسىدىرعى ومىرىڭىزدەن قول تيمەيدى. بۇل ومىرگە دەگەن سۇراقتارىڭىزدى رەتتەۋ كەرەك.

7. شىندىق شىمبايعا باتادى

شىن مانىندە ەشتەڭە بىلمەيتىنىڭىزدى مويىنداڭىزشى. وسى جازعان نارسەلەر اشۋعا ءتيدى مە؟ ينتەرنەتتە جاريالانعان ماقالانى وقۋعا جىبەرگەن ۋاقىتتى ودان دا ۇتىمدى جۇمساۋىڭىزعا بولار ەدى. اينالاڭىزدا بولىپ جاتقان نارسەگە بەيجاي قاراپ، نە ءۇشىن ەكەنى بەلگىسىز مۇرنىڭىزدى ءشۇيىرىپ ءومىر سۇرەسىز. قورشاعان ورتاداعى اقيقاتتىڭ ءدامىن بىلۋگە تىرىسپاستان، تىنىش قانا ءومىر سۇرگەنگە ءمازسىز. شىندىقتى ىزدەڭىز. سوندا ومىردە لايىقتى نارسەنى جاساۋعا سىزگە تەك ءوزىڭىز عانا كەدەرگى ەكەنىڭىزدى تۇسىنەسىز.

اۆتور: رەيمار تيرادو

(اۋدارعان شىنار ءابىلدا)

blogtime