قىرعىزستانداعى رەفەرەندۋم: 79 پايىز قىرعىزستاندىق پرەزيدەنتتىك باسقارۋعا كوشۋدى قولدادى
الدىن الا دەرەكتەرگە قاراعاندا، جەرگىلىكتى كەنەشتەر سايلاۋىنا 1 ميلليون 24 مىڭ 891 ادام نەمەسە تۇرعىنداردىڭ %30,89 داۋىس بەرگەن. ال رەفەرەندۋمعا 1 ميلليون 61 مىڭ 591 ادام نەمەسە %29,89 قىرعىزستاندىق داۋىس بەرگەن. ءسال كەيىن قىرعىزستاندا جاڭا كونستيتۋتسيا جوباسى بويىنشا رەفەرەندۋمعا %36,75 ادام قاتىسقان تۋرالى رەسمي مالىمەت تارادى.
بۇل تۋرالى قىرعىزستاننىڭ ورتالىق سايلاۋ كوميسسياسىنىڭ ءتوراعاسى نۇرجان شايلدابەكوۆا ايتتى.
«رەفەرەندۋمعا قاتىسقانداردىڭ %79,25 جاڭا كونستيتۋتسيا جوباسىن قولداپ داۋىس بەرسە، %13,69 قارسى بولعان»، - دەدى ول.
ەسكە سالساق، بۇعان دەيىن قىرعىزستاندا جەرگىلىكتى كەنەشتەرگە سايلاۋ جانە كونستيتۋتسيا بويىنشا رەفەرەندۋم ءوتىپ جاتقانى تۋرالى حابارلاعان بولاتىنبىز. قىرعىزستان ازاماتتارىنا ءتۇرلى تۇستەگى ەكى بلانك، سونداي-اق جەگىلىكتى كەنەش سايلاۋىنا جانە رەفەرەندۋمعا قاتىسۋ ءۇشىن بيومەتريالىق سايكەستەندىرۋدەن وتۋگە ارنالعان ەكى چەك بەرىلدى. جوگوركۋ كەنەش دەپۋتاتتارى «قىرعىز رەسپۋبليكاسىنىڭ كونستيتۋتسياسى تۋرالى» زاڭ جوباسى بويىنشا رەفەرەندۋم (بۇكىل حالىقتىق داۋىس بەرۋ) تاعايىنداۋ تۋرالى» زاڭ جوباسىن ماقۇلداپ، رەفەرەندۋمدى وتكىزۋ مەرزىمىن بەكىتتى.
جاڭا كونستيتۋتسيا جوباسىنداعى باستى ايىرماشىلىق - پرەزيدەنتتىك باسقارۋ نىسانىنا كوشۋ.
سونداي-اق دەپۋتاتتار سانىن 120 دان 90 عا دەيىن قىسقارتۋ ۇسىنىلىپ وتىر.