قازاقستاندىقتاردىڭ 79,4 پايىزى اتا زاڭعا ەنگىزىلەتىن وزگەرتۋلەردى قولدادى
بۇل جايىندا «دەموكراتيا ينستيتۋتى» عىلىمي- زەرتتەۋ قاۋىمداستىعى» قوعامدىق بىرلەستىگىنىڭ ديرەكتورى تاتيانا باشارينا ايتتى، دەپ حابارلايدى قازاقپارات ءتىلشىسى.
«دەموكراتيا ينستيتۋتى» عىلىمي- زەرتتەۋ قاۋىمداستىعى» قوعامدىق بىرلەستىگى سايلاۋ ۋچاسكەلەرىنىڭ شىعا بەرىسىندە Exit poll وتكىزدى. ساۋالناما الۋ 375 ۋچاسكەدە، ونىڭ ىشىندە 225 قالالىق جانە 150 اۋىلدىق رەفەرەندۋم ۋچاسكەسىندە جۇرگىزىلدى. 15 مىڭنان ادامنان ساۋالناما الىندى. زەرتتەۋ قورىتىندىسىنىڭ قاتەلىگى 2,7 پايىزدى قۇرايدى. دەموكراتيا ينستيتۋتى Exit poll ءبىرىنشى رەت وتكىزىپ وتىرعان جوق. ول قازاقستاندا 2007 -جىلدان بەرگى سايلاۋ ناۋقاندارى كەزىندە بەيىمدەلگەن ادىستەمە ارقىلى جۇرگىزىلدى»، - دەدى بىرلەستىك ديرەكتورى ك ت ك تەلەارناسىنىڭ تىكەلەي ەفيرىنەن.
ونىڭ اتاپ وتۋىنشە، سايلاۋ ۋچاسكەلەرىنىڭ شىعا بەرىسىندە داۋىس بەرۋشىلەرگە بىرلەستىكتىڭ ساۋالناما الۋشىلارى «ءسىز كونستيتۋتسياعا ەنگىزىلەتىن وزگەرىستەردى قولداپ الدە قارسى داۋىس بەردىڭىز بە؟» دەگەن سۇراق قويعان.
سونىمەن قاتار سۇحبات الۋشىلار داۋىس بەرۋشىلەردىڭ بەلسەندىلىگىن دە تىركەگەن.
« Exit poll قورىتىندىسى بويىنشا رەفەرەندۋمعا قاتىسۋ 66,3 پايىزدى قۇرادى. جاقتاپ داۋىس بەرگەندەر - 79,4، ال قارسى بولعاندار - 20,6 پايىز»، - دەدى تاتيانا باشارينا.
بۇدان بۇرىن حابارلانعانداي، رەفەرەندۋم بارىسىندا ەل تۇرعىندارى كونستيتۋتسيامىزدىڭ 33 بابىنا 56 وزگەرىس ەنگىزۋ ماسەلەسىنە قاتىستى ءوز داۋىستارىن بەردى.
5- ماۋسىمدا استانا ۋاقىتىمەن ساعات 21.00-دە ەلىمىزدىڭ بارلىق وڭىرىندەگى رەفەرەندۋم ۋچاسكەلەرىندە داۋىس بەرۋ اياقتالدى. ق ر ورتالىق رەفەرەندۋم كوميسسياسىنىڭ حاتشىسى مۇحتار ەرمان اتا زاڭعا ەنگىزىلەتىن وزگەرتۋلەر مەن تولىقتىرۋلارعا قاتىستى وتكىزىلگەن رەسپۋبليكالىق رەفەرەندۋمدا 8030739 ازامات بيۋللەتەن العانىن ايتتى.
وسىدان تۋرا ءبىر اي بۇرىن ق ر پرەزيدەنتى قاسىم- جومارت توقايەۆ 5- ماۋسىمدا رەسپۋبليكالىق رەفەرەندۋم وتكىزۋ تۋرالى جارلىققا قول قويعان ەدى.
اۆتور: مارلان جيەمباي