شىعىس قازاقستاندا 77 اۋىل اكىمى سايلانادى

وسكەمەن. قازاقپارات - شىعىس قازاقستان وبلىسىندا 25- شىلدەدە اۋداندىق ماڭىزى بار قالالار، اۋىلدار، كەنتتەر مەن اۋىلدىق وكرۋگتەر اكىمدەرىنىڭ العاشقى تىكەلەي سايلاۋى وتەدى، دەپ حابارلايدى قازاقپارات ءتىلشىسى.

شىعىس قازاقستانداعى قالالىق جانە اۋداندىق سايلاۋ كوميسسيالارى 25- شىلدە كۇنى وتەتىن اۋىل اكىمدەرىنىڭ سايلاۋىنا دايىندىق جۇرگىزۋدە. بيىل وڭىردەگى 16 اۋداندا 77 اۋىل اكىمى سايلانباق.

وبلىستىق سايلاۋ كوميسسياسىنىڭ ءتوراعاسى ەرسايىن نابييەۆتىڭ ايتۋىنشا، تىكەلەي سايلاۋ وتكىزۋ قازاقستانداعى سايلاۋ جۇيەسىنىڭ دامۋىنداعى ماڭىزدى قادام. بۇل ايماقتىق سايلاۋ ناۋقانىن ۇيىمداستىرۋداعى جاڭا تاجىريبە جيناقتاۋدىڭ بىردەن-ءبىر مۇمكىندىگى.

«بۇرىن اۋىلدىق وكرۋگ اكىمدەرىن جەرگىلىكتى ءماسليحات دەپۋتاتتارى سايلايتىن ەدى. ەندى ناقتى اكىمشىلىك اۋماقتىڭ حالقى اكىمدەردى تىكەلەي سايلاي الادى. مۇنداي وزگەرىستىڭ ارقاسىندا اكىم ءوزى تۇراتىن ەلدى مەكەن جۇرتشىلىعىنىڭ سەنىمى مەن قولداۋىنا يە بولۋ ءۇشىن ناتيجەلى ەڭبەك ەتۋگە تالپىناتىن بولادى»، - دەدى ەرسايىن نابيەۆ.