باۋىرجان بايبەك: بيىل ەلىمىزدە پارتيانىڭ ۇيىتقى بولۋىمەن 77 ايتىس وتەدى
اتالعان شاراعا قاتىسقان تۇركىستان وبلىسىنىڭ اكىمى ءومىرزاق شوكەيەۆ ايماقتا اتقارىلىپ جاتقان جۇمىستاردىڭ بارىسى مەن پارتيالىق تاپسىرمالاردىڭ ورىندالۋ بارىسىن باياندادى.
ءوز كەزەگىندە ءسوز العان باۋىرجان بايبەك ەلىمىزدىڭ باس پارتياسى تاراپىنان اتقارىلىپ جاتقان جۇمىستاردى بايانداپ، الداعى جوسپارلى تاپسىرمالاردى تىلگە تيەك ەتتى. «Nur Otan» پارتياسى ءتوراعاسى ءبىرىنشى ورىنباسارىنىڭ ايتۋىنشا، بيىل ەلىمىزدە پارتيانىڭ ۇيىتقى بولۋىمەن 77 ايتىس وتەدى.
«ءبىز ايتىس ونەرىن قولداۋ ارقىلى ءوزىمىزدىڭ ماسەلەلەردى اشىق كوتەرەمىز. سول ءۇشىن ايتىسكەرلەردى قولدايمىز. جالپى ايتىس - قازاقتىڭ كونەدەن كەلە جاتقان ءداستۇرى. سوندىقتان ونى قولداۋ كەرەك. حالىق ونى جاقسى كورەدى»، - دەدى باۋىرجان بايبەك.
كەزدەسۋ بارىسىندا ايماقتىڭ بۇگىنگى جاي-كۇيى مەن ءوڭىردىڭ قالىپتاسۋ كەزەڭىندەگى تولايىم تىرلىكتەر، كوپتى تولعاندىرىپ جۇرگەن ماسەلەلەر مەن رۋحانيات، ءتىل، ادەبيەت جايى قامتىلدى. ەلدىڭ ىنتىماعى مەن بىرلىگىن نىعايتۋ تاراپىنداعى ۇسىنىس پىكىرلەر دە ورتاعا سالىندى. ماسەلەن، جازۋشى مارحابات بايعۇت تۇركىستان قالاسىنان «ادەبيەت الەمى» ورتالىعىن اشۋدى ۇسىندى. ەگەر بۇل جوبا جۇزەگە اسسا، بۇگىندە عيماراتسىز جۇرگەن جازۋشىلار مەن جۋرناليستەر وداعىنىڭ فيليالدارى سوندا ورنالاسا الادى. جاڭا وبلىس ورتالىعىنىڭ ادەبي ورتاسىن قالىپتاستىرۋعا ىقپال ەتەتىن ەدى دەپ ەسەپتەيدى جازۋشى.
سونىمەن قاتار، وندا ءتۇرلى ادەبيەت ۇيىرمەلەرى اشىلىپ، جاس ايتىسكەرلەر مەن جازبا اقىندار، جازۋشىلار باس قوساتىن ونەر ورتالىعىنا اينالار ەدى دەپ توقتادى. ەركىن پىكىر الماسۋ فورماتىندا وتكەن باسقوسۋدا ءوڭىر زيالىلارى وبلىس كولەمىندەگى ماسەلەلەرمەن قاتار، جالپى ەل دامۋىنا، مەملەكەتتى وركەندەتۋگە قاتىستى ءوز ويلارى مەن ۇسىنىستارىن دا بۇكپەسىز تالقىلادى.