بۇگىن مۇحتار ماعاۋين 77 جاستا
ⅩⅩ عاسىردىڭ 60-جىلدارى قازاق پروزاسىنا م. ماعاۋين، ءا. كەكىلبايەۆ، و. بوكەي، د. يسابەكوۆ، ت. ابدىكوۆ سىندى اسا دارىندى جاستار لەگى كەلدى. زاڭعار جازۋشى ع. مۇسىرەپوۆ: «مۇحتار ماعاۋين انا ءتىلىمىزدىڭ بايلىعىن، ورالىمدى، استارلى، ءارى وت- جالىندى، ءارى نازىك تە بيازى بوياۋ- سىرلارىن العاشقى ادىمدارىنان باستاپ- اق كورسەتەدى. ءتىلىمىزدىڭ ورالىمدىعىن تەرەڭدەتۋگە قوسقان ۇلەسى از ەمەس»، - دەپ، م. ماعاۋينگە شىنايى انىقتاما بەرگەن دە بولاتىن.
ال ونىمەن قاتارلاس، قالامداس جازۋشى ءا. كەكىلبايەۆ: «مۇحتار ماعاۋين - داعدارىس تىعىرىعىنا قامالعان ادەبيەتىمىزدىڭ ودان ءارى دامۋىنا جاڭا قارقىن بىتىرۋگە تىرىسقان الپىسىنشى جىلدارداعى سەرپىلىستە ايرىقشا كوزگە ءتۇسىپ، سول قارقىنىن ءالى كۇنگە ۇدەتپەسە، باسەڭدەتپەي، جانقيارلىق تانىتىپ كەلە جاتقان كەسەك تۇلعامىز. ونىڭ بۇگىنگى دە، ەرتەڭگى دە وقىرماندار الدىندا سىڭىرگەن ەڭبەگى ۇشان- تەڭىز. قادىم زاماندار تاقىرىبىنا العاش قادام تارتقان عالىم رەتىندە ۇلتتىق كوركەم ويدىڭ ەڭ كەمەل كۇشتەرىنىڭ ءتول تاريحىمىزدىڭ كەندە زەردەلەنىپ كەلە جاتقان كەزەندەرىن كورسەتۋگە جاپپاي جۇمىلۋىنا تۇرتكى بولدى. ءوزى دە سول بايگەدە وزىپ شىعا العان جۇلدەلى جۇيرىك»، - دەپ باعالادى.
م. ماعاۋين ءار جىلدارى «قازاق ادەبيەتىندە»، «جازۋشى» باسپاسىندا، «جالىن» جۋرنالىندا قىزمەت ەتتى. «كەشقۇرىم» اتتى العاشقى اڭگىمەسى 1964 -جىلى «جۇلدىز» جۋرنالىندا جاريالاندى. كەيىنگى جىلدارى ول «اقشا قار»، «ءبىر اتانىڭ بالالارى»، «قيانداعى قىستاۋ»، «كوك كەپتەر» پوۆەستەر مەن اڭگىمە جيناقتارىن، «كوك مۇنار»، «شاقان شەرى» روماندارىن، «الاساپىران» رومان- ديلوگياسىن، «قوبىز سارىنى» اتتى مونوگرافيانى، «عاسىرلار بەدەرى»، «قازاق تاريحىنىڭ الىپپەسى» عىلىمي- زەرتتەۋ ەڭبەكتەرىن، «قازاق حاندىعى داۋىرىندەگى ادەبيەت» وقۋلىقتارىن، حرەستوماتيا جانە باسقا دا وقۋ قۇرالدارىن جازدى.
«الداسپان»، «بەس عاسىر جىرلايدى»، «اي زامان- اي، زامان- اي» اقىن-جىراۋ شىعارمالارى جيناقتالعان انتولوگيانى دا م. ماعاۋين قۇراستىرعان. ونىڭ شىعارمالارى الەمنىڭ بىرنەشە تىلدەرىنە اۋدارىلعان. 1984 -جىلى مەملەكەت سىيلىعىنىڭ لاۋرەاتى جانە 1996 -جىلى قازاقستاننىڭ حالىق جازۋشىسى اتاندى. م. ماعاۋين 2007 -جىلى چەحياعا قونىس اۋداردى. جازۋشى قازىر امەريكا قۇراما شتاتتارىندا تۇرادى. جاقىندا ول جەتى جىل بويى جازعان «شىڭعىس حان» ەپوپەياسىنىڭ سوڭعى، ءتورتىنشى كىتابىن اياقتاعانىن ءمالىم ەتتى.
اۆتور: ايجان سەرىكجان قىزى
