قازاقستاندىقتاردىڭ 76 پايىزعا جۋىعى اتا زاڭعا تۇزەتۋلەر ەنگىزۋدى قولدايدى - قوعامدىق ساياسات ينستيتۋتى
AMANAT پارتياسى جانىنداعى قوعامدىق ساياسات ينستيتۋتى «الەۋمەت» جوباسى اياسىندا جۇرگىزىلگەن Referendum: Halyq üni زەرتتەۋىنىڭ قورىتىندىسىن جاريالادى، دەپ حابارلايدى قازاقپارات ءتىلشىسى.
ۇيىمنىڭ مالىمەتىنشە، ەل تۇرعىندارىنىڭ %67,9 كونستيتۋتسيالىق رەفورما ەلدىڭ دامۋىنا وڭ اسەر ەتەدى دەپ ەسەپتەيدى.
سونداي-اق الەۋمەتتىك دەرەكتەر ازاماتتاردىڭ كوپشىلىگى قولدانىستاعى كونستيتۋتسيانى وزگەرتۋ بويىنشا رەفەرەندۋم وتكىزۋگە وڭ كوزقاراس تانىتىپ وتىرعانىن كورسەتتى.
«سوڭعى الەۋمەتتىك زەرتتەۋلەردىڭ ناتيجەسى قازىرگى قوعامدىق-ساياسي ۇدەرىستەردىڭ وڭ باعالاناتىنىن دالەلدەدى. ازاماتتاردىڭ %87,5 بەلگىلى ءبىر دارەجەدە ەل ومىرىندەگى وزگەرىستەردى قالايدى. سۇرالعانداردىڭ %55,4 بەلسەندى ازاماتتىق ۇستانىمعا يە. زەرتتەۋگە ەلىمىزدىڭ بارلىق وڭىرىنەن 1700 دەن استام رەسپوندەنت قاتىستى»، - دەدى قوعامدىق ساياسات ينستيتۋتىنىڭ ديرەكتورى ءمادينا نۇرعاليەۆا.
ايتا كەتەيىك، جۇيەلى الەۋمەتتانۋدى قالىپتاستىرۋ ماقساتىندا «الەۋمەت» جوباسى تۇراقتى نەگىزدە زەرتتەۋلەر جۇرگىزەدى.