ەلىمىزدە 76 ميلليارد توننانى قۇرايتىن مۇناي-گاز رەسۋرستارى بار دەپ بولجانۋدا

نۇر- سۇلتان. قازاقپارات - كاسپي ماڭى باسسەينىنىڭ تەرەڭ قاباتتارىنىڭ الەۋەتى ءالى تولىقتاي باعالانعان جوق.

بۇل تۋرالى بۇگىن ۇكىمەت وتىرىسىندا گەولوگيالىق بارلاۋدىڭ 2021-2025-جىلدارعا ارنالعان مەملەكەتتىك باعدارلاماسىنىڭ تۇجىرىمداماسىن تانىستىرعان ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتتى، دەپ حابارلايدى قازاقپارات ءتىلشىسى.

«كومىرسۋتەگى تۋرالى ايتار بولساق، ەلىمىزدىڭ 15 شوگىندى باسسەيندەرىندە شامامەن 76 ميلليارد توننانى قۇرايتىن مۇناي-گاز رەسۋرستارى بار دەپ بولجانۋدا. بۇل شوگىندى باسسەيندەردىڭ گەولوگيالىق زەرتتەلۋ دارەجەسى ءارتۇرلى. ونىڭ بەسەۋى يگەرىلگەن، بەسەۋى از زەرتتەلگەن جانە بەسەۋىنىڭ پەرسپەكتيۆاسى تومەن. كاسپي ماڭى، ءۇستىرت-بوزاشى، ماڭعىشلاق، وڭتۇستىك تورعاي، زايسان باسسەيندەرىنىڭ تەرەڭ قاباتتارىن گەولوگيالىق ىزدەستىرۋ-باعالاۋ جۇمىستارىنا جەكە ينۆەستيتسيالار تارتۋ جوسپارلانۋدا. از زەرتتەلگەن سولتۇستىك-تورعاي، ەرتىس ماڭى، ارال، سىرداريا، شۋ-سارىسۋ شوگىندى باسسەينى اۋماقتارىندا گەولوگيالىق زەرتتەۋدى مەملەكەتتىك بيۋجەت ەسەبىنەن جۇرگىزۋ قاجەت دەپ ەسەپتەيمىز»، - دەدى ماعزۇم مىرزاعاليەۆ.

ونىڭ ايتۋىنشا، 2019-جىلى مەملەكەتتىك بيۋجەت ەسەبىنەن قاتتى پايدالى قازبالارعا ىزدەۋ جۇمىستارىن جۇرگىزۋ كەزىندە ۇلكەن قاراتاۋدا مۇناي كوزى انىقتالدى. ەندى وسى اۋماقتىڭ پەرسپەكتيۆاسىن انىقتاۋ ءۇشىن گەولوگيالىق بارلاۋ جۇمىستارىن ءارى قاراي جالعاستىرۋ كەرەك.

«90-جىلدارى جۇرگىزىلگەن زاماناۋي سەيسميكالىق زەرتتەۋلەردىڭ ناتيجەسىندە قاشاعان، قالامقاس-تەڭىز، سولتۇستىك ترۋۆا جانە دە باسقا كەن ورىندارى اشىلدى. بۇگىنگى كۇنى ەسكى سەيسميكالىق مالىمەتتەر كوپ بولعانىمەن، ونىڭ ساپاسى مەن ناقتىلىعى قازىرگى تالاپتارعا سايكەس كەلمەيدى. سول سەبەپتى، كاسپي ماڭى باسسەينىنىڭ تەرەڭ قاباتتارىنىڭ الەۋەتى ءالى تولىقتاي باعالانعان جوق. بۇل باسسەين ينۆەستورلار ءۇشىن تارتىمدى ايماق. قازىرگى كەزدە كوپتەگەن وتاندىق جانە شەتەلدىك كومپانيالار وسى باسسەيندە گەولوگيالىق زەرتتەۋ جۇرگىزۋگە دەگەن وزدەرىنىڭ نيەتتەرىن بىلدىرۋدە. سوندىقتان دا، جاڭارتىلعان گەولوگيالىق اقپاراتتى الۋ ءۇشىن زاماناۋي سەيسموبارلاۋ جۇمىستارىن جۇرگىزۋ قاجەت»، - دەدى مينيستر.