مەرەكە قارساڭىندا 76 ەلوردالىق وتباسى باسپانا الدى
بۇگىن استانادا 76 وتباسى «نۇرلى جەر» مەملەكەتتىك باعدارلاماسى اياسىندا «قازاقستاننىڭ يپوتەكالىق كومپانياسى» ارقىلى ساتىپ الۋ قۇقىعىمەن جالعا بەرىلەتىن پاتەر يەلەرى اتاندى. تۇرعىن ءۇيدىڭ قۇرىلىسىنا 645,6 ميلليون تەڭگە جۇمسالعان. ونىڭ جالپى كولەمى 4348,9 شارشى مەتردى قۇرايدى. ءار شارشى مەترىنىڭ قۇنى - 201120 تەڭگە. جالعا الۋ مەرزىمى - 20 جىلعا دەيىن. دەگەنمەن، 5 جىلدان سوڭ پاتەردى ساتىپ الۋ مۇمكىندىگى قاراستىرىلعان.
«بۇگىن مىنە، جاڭا جىل مەرەكەسى الدىندا ەلوردالىق 76 وتباسىنىڭ قۋانىشىنا ورتاقتاسىپ وتىرمىز. بۇل باسپانالار ەلباسىنىڭ تىكەلەي تاپسىرماسىمەن «نۇرلى جەر» باعدارلاماسىنىڭ اياسىندا سالىندى. وزدەرىڭىز بىلەتىندەي، استاناعا وڭىرلەردەن كەلۋشىلەردىڭ سانى جىل ساناپ ارتۋدا. باسپاناعا دەگەن سۇرانىس جوعارى. تيىسىنشە، پاتەر كەزەگىندە تۇرعانداردىڭ سانى دا ارتۋدا. بىزگە بەرىلگەن تاپسىرما بويىنشا الدىمەن، ءۇي كەزەگىندە تۇرعان مەملەكەتتىك جانە بيۋدجەتتىك مەكەمە قىزمەتكەرلەرىن تۇرعىن ۇيمەن قامتاماسىز ەتۋىمىز قاجەت»، - دەدى قالا اكىمى باقىت سۇلتانوۆ.
ەلوردا اكىمى جاڭا باسپانا يەلەرىن قۇتتىقتاي وتىرىپ، پاتەر كىلتتەرىن تابىس ەتتى.
«مەن 2001 -جىلدان باستاپ بيۋدجەتتىك قىزمەتكەر رەتىندە، ياعني مەديتسينا سالاسىندا جۇمىس ىستەيمىن. ءۇي كەزەگىنە 2007 -جىلدان باستاپ تۇردىم. مەملەكەت تاراپىنان قاراستىرىلعان وسىنداي باعدارلامانىڭ ارقاسىندا جانە اكىمدىكتە تىركەلگەن باسپانا كەزەگىمنىڭ كەلۋىنە وراي بۇگىن ءۇيلى بولىپ جاتىرمىن. ارينە، قۋانىشىمدى ايتىپ جەتكىزە المايمىن. استانادا باسپانالى بولۋ ءار تۇرعىننىڭ ارمانى. مىنە ءبىزدىڭ دە كوپتەن كۇتكەن ارمانىمىز ورىندالدى»، - دەدى جاڭا پاتەر يەسى جانار كوبەشوۆا.
ەلوردا اكىمدىگىنىڭ دەرەكتەرىنە سۇيەنسەك، ۇستىمىزدەگى جىلى «نۇرلى جەر» باعدارلاماسى بويىنشا استانادا 720 ازامات باسپانالى بولدى، ونىڭ 410 ى ءۇي كەزەگىندە تۇرعاندار. بۇگىندە ءۇي كەزەگىندە تۇرعاندار سانى 45669 ادامدى قۇرايدى جانە بۇل ءتىزىم جىل ساناپ ارتۋدا.
