جامبىل وبلىسىندا بىلتىر قاتەرلى ىسىكتەن 768 ادام كوز جۇمعان
بۇل تۋرالى بۇگىن وڭىرلىك كوممۋنيكاتسيالار قىزمەتى الاڭىندا جامبىل وبلىستىق كوپبەيىندى اۋرۋحاناسىنىڭ باس دارىگەرىنىڭ مىندەتىن اتقارۋشى قايرات جەتىبايەۆ ايتتى، - دەپ حابارلايدى قازاقپارات ءتىلشىسى.
سپيكەردىڭ ايتۋىنشا، بىلتىر وڭىرلە قاتەرلى ىسىك العاش رەت انىقتالعان اۋرۋلار سانى 1414 ءتى قۇراعان. بۇل 2019-جىلىمەن سالىستىرعاندا 136 ادامعا كەمىگەنىن كورسەتەدى.
«ءولىم كورسەتكىشىنە كەلسەك، وبلىس بويىنشا وتكەن جىلى 768 اۋرۋ قايتىس بولىپ، ءولىم كورسەتكىشى 100,0 مىڭ ادامعا شاققاندا 67,4 قۇرادى. وتكەن جىلى وڭىرىمىزدە قاتەرلى ىسىكپەن العاشقى رەت اۋىرعان 1414 ادامنىڭ 58,2 پايىزى سىرقاتتىڭ I جانە II ساتىسىندا ەكەنى انىقتالدى. بۇل - وسىنشا ناۋقاستىڭ قاجەتتى ەمدى ۋاقتىلى السا، جازىلىپ كەتۋ مۇمكىندىگى جوعارى دەگەن ءسوز. ءولىم-ءجىتىم كورسەتكىشىن تومەندەتۋ ءۇشىن اۋرۋدى الدىن الۋ جانە اۋرۋدى ەرتە ساتىدا انىقتاۋ قاجەت»، - دەدى قايرات جەتىبايەۆ.
وبلىستا وتكەن جىلى وبىر اۋرۋىنىڭ ۇلەس سالماعى بويىنشا ءسۇت بەزى قاتەرلى ىسىگى ءبىرىنشى ورىنعا شىققان. ناقتىراق ايتساق، 12,2 پايىزدى قۇراپ وتىر. ەكىنشى ورىندا 10,0 پايىزبەن وكپەنىڭ قاتەرلى ىسىگى، ال اسقازان قاتەرلى ىسىگى 8,5 پايىز، تەرى قاتەرلى ىسىگى - 7,9 پايىز، جاتىر موينى قاتەرلى ىسىگى 5,2 پايىز، توق ىشەك، تىك ىشەك قاتەرلى ىسىگى - 4,7 پايىزعا اينالعان.
ايتا كەتەيىك، بىلتىر ەلىمىز بويىنشا 190159 ونكولوگيالىق اۋرۋمەن ەسەپتە تۇرادى، ونىڭ ىشىندە رەسپۋبليكا بويىنشا 33537 اۋرۋ العاشقى رەت اۋىرعاندار سانالادى.