ورتالىق ازياداعى شەتەل ينۆەستيتسياسىنىڭ 75 پايىزى قازاقستانعا تيەسىلى - مەملەكەت باسشىسى
«جاقىندا باۋىرلاس ەلدەرمەن بىرلەسىپ، تۇركى كەڭەسىن تولىققاندى ۇيىمعا اينالدىردىق. وسىلاي تۇركى تىلدەس مەملەكەتتەر ىنتىماعىنىڭ جاڭا كەزەڭى باستالدى. قازاقستان الىپ قۇرلىقتىڭ ءدال ورتاسىندا تۇر. بۇل گەوگرافيالىق تۇرعىدان ءتيىمدى. ءبىزدىڭ توڭىرەگىمىزدە بەيبىتشىلىك بەلدەۋ قالىپتاستى. ەل ىشىندەگى احۋال تۇراقتى. سىرتى ەكونوميكالىق قارىم- قاتىناسقا بارىنشا اشىقپىز. مۇنىڭ ءبارى ينۆەستورلار ءۇشىن وتە قولايلى جاعداي. بۇگىندە ورتالىق ازياداعى شەتەل ينۆەستيتسياسىنىڭ 75 پايىزى قازاقستانعا تيەسىلى»، - دەدى مەملەكەت باسشىسى.
ونىڭ ايتۋىنشا، قازاقستان وسىنىڭ ارقاسىندا وڭىردەگى ەكونوميكالىق كوشباسشىعا اينالىپ وتىر. «ۇكىمەتتىڭ جانە ديپلوماتتاردىڭ الدىندا تۇرعان اسا ماڭىزدى مىندەت - ايماقتىڭ كوشباسشىلىق ءرولىن ودان ءارى نىعايتۋ. وسى جۇمىستىڭ قارقىنىن باسەڭدەتۋگە بولمايدى. بۇكىل الەمدى پاندەميا جايلاعانىنا 2 جىلعا جۋىقتادى. ونىڭ سالدارى قازاقستانعا دا وڭاي تيگەن جوق. ءبىزدىڭ ديپلوماتيالىق كورپۋس وسى كۇردەلى كەزەڭدە جوعارى دەڭگەيدە قىزمەت ەتتى. شەتەلدەگى مىڭداعان ازاماتىمىزعا كومەك كورسەتتى»، - دەگەن قاسىم- جومارت توقايەۆ وسىناۋ كۇردەلى كەزەڭدە ديپلوماتتاردىڭ تىنىمسىز ەڭبەك ەتكەنىن اتاپ ءوتتى.
«سىرتتا قالىپ قويعان وتانداستارىمىزدى ەلگە الىپ كەلۋ ءۇشىن ولار ءتيىستى جۇمىستى اتقاردى. ديپلوماتتارىمىزدىڭ ارقاسىندا قازاقستانعا گۋمانيتارلىق كومەك جەتكىزىلدى. ءبىز دە ءبىرقاتار مەملەكەتتەرگە قولداۋ كورسەتتىك. ۆاكسينالىق ديپلوماتيانىڭ ارقاسىندا ورتالىق ازياداعى ىندەتكە بايلانىستى احۋالدى تۇراقتاندىرۋعا ۇلەس قوستىق. ءتۇرلى قيىندىققا قاراماستان، سىزدەر الدىمىزدا ستراتەگيالىق مىندەتتەردى ورىنداپ كەلەسىزدەر»، - دەدى مەملەكەت باسشىسى.
قاسىم- جومارت توقايەۆ ينۆەستيتسياعا جاۋاپتى ۆەدومستۆوعا تاپسىرما بەردى.
مەملەكەتتەر اراسىندا شەتەل ينۆەستيتسياسىنا تالاس كۇشەيدى. ەكونوميكالىق ديپلوماتيانى قايتا جاندىرۋ ماسەلەسىنە توقتالعان پرەزيدەنت: «الەمدىك ساياساتتا كليمات پەن تەحنولوگيا ماسەلەلەرى ايرىقشا وزەكتى. پاندەميادان كەيىن ەكونوميكانى قالپىنا كەلتىرۋ ءۇشىن مەملەكەتتەر اراسىندا شەتەل ينۆەستيتسياسىنا تالاس كۇشەيدى. سىرتقى ىستەر مينيسترلىگى - ينۆەستيتسيا تارتۋ جونىندەگى مەملەكەتتىك ساياساتتى ىسكە اسىراتىن ۋاكىلەتتى ورگان. ءبىز مينيسترلىككە وسىنداي ەرەكشە مارتەبە بەردىك. سوندىقتان، بۇل مۇمكىندىكتى تولىققاندى پايدالانۋ قاجەت»، - دەدى.
وسى ورايدا مەملەكەت باسشىسى قازاقستان ەكسپورتىن ىلگەرىلەتۋگە بارىنشا قولعابىس ەتۋ تاعى ءبىر ماڭىزدى مىندەت ەكەنىن اتاپ ءوتتى.
«ەلىمىز شىعىس پەن باتىستى، سولتۇستىك پەن وڭتۇستىكتى جالعايتىن كۇرە جولداردىڭ بويىنداعى ترانزيتتىك- لوگيستيكالىق حابقا اينالۋعا ءتيىس. «نۇرلى جول» باعدارلاماسى جانە كورشى ەلدەردىڭ ينفراقۇرىلىمدىق باستامالارى وسىعان نەگىز بولادى. بۇل جۇمىستا مينيسترلىككە ايرىقشا مىندەت جۇكتەلەدى»، - دەدى ق. توقايەۆ.
اۆتور: رۋسلان عابباسوۆ