ۇرلانعان ءاميان 75 جىلدان كەيىن يەسىنە قايتارىلدى
ا ق ش تۇرعىنى، 89 جاستاعى بەتتي سيسسوم (Betty Sissom) كوپ جىل بۇرىن ۇرلانعان ءاميانىن قايتارىپ الدى، دەپ جازدى CNN.
قىزىقتى وقيعا يللينويس شتاتىندا شىركەۋ ۇيىمى ساتىپ العان بۇرىنعى مەكتەپتى جوندەۋ كەزىندە بولدى. جۇمىسشىلار ۋنيتازدىڭ ارتىنان فوتوسۋرەتتەر مەن قۇجاتتار سالىنعان بىرنەشە ەسكى ءامياندى تاۋىپ العان.
شىركەۋدىڭ پاستورى تابىلعان ءامياندار مەن ادامداردىڭ اتى-جوندەرىنىڭ سۋرەتىن Facebook اككاۋنتىندا جاريالادى. ونىڭ جازباسىن بىرنەشە مىڭ ادام بولىسكەننەن كەيىن جەرگىلىكتى ب ا ق تىزىمدە اتى اتالعان ايەلدىڭ ءبىرىن تاپتى.
1947 -جىلى مەكتەپتى بىتىرگەن جانە قازىر سەنت-لۋيس قالاماڭىندا تۇراتىن بەتتي سيسسوم 75 جىلدان سوڭ ءاميانىن قايتارىپ العان كەزدە قاتتى تاڭعالدى. سونداي-اق ايەل كوپ جىلدار بويى كورمەگەن سىنىپتاستارىنىڭ سۋرەتتەرىن، سونداي-اق ەكىنشى دۇنيەجۇزىلىك سوعىس كەزىندە قازا بولعان اعاسىنىڭ فوتوسىن كورىپ قۋاندى.
بەتتي سيسسوم مەكتەپتە بىرگە وقىعان باسقا ءاميانداردىڭ يەلەرى ءالى دە ءتىرى دەپ ۇمىتتەنەدى.
قولدانۋشىلار تىزىمدەگى جەتى قىزدىڭ ەكەۋى دۇنيەدەن وزعانىن جازدى. زاتتارى تابىلعانداردىڭ ەكەۋى دە 2012 -جىلى قايتىس بولعان.