زەرەندىلىك 74 جىل بۇرىن حابارسىز كەتكەن جاۋىنگەردىڭ توپىراعى تۋعان جەرىنە جەتكىزىلدى

كوكشەتاۋ. قازاقپارات - اقمولا وبلىسىنىڭ زەرەندى اۋدانىندا ۇوس جىلدار حابارسىز كەتكەن جاۋىنگەر قايىرقوجا ءابۋتالىپوۆتىڭ جەرلەنگەن جەرىنەن اكەلىنگەن ءبىر ۋىس توپىراقتى تۋعان جەرى قاراشىلىك اۋىلىنداعى مۇسىلمان زيراتىنا جەرلەۋ ءراسىمى ءوتتى، دەپ حابارلايدى قازاقپارات ءتىلشىسى.

اۋدان ورتالىعى زەرەندى كەنتىندە ۇيىمداستىرىلعان شاراعا اۋدان اكىمى مەرەكە مۇستافين، اقمولا وبلىستىق قورعانىس ىستەرى جونىندەگى دەپارتامەنتىنىڭ باستىعى، پودپولكوۆنيك رۋسلان قاسىموۆ، رەسپۋبليكالىق قورعانىس ىستەرى ارداگەرلەرى قوعامدىق بىرلەستىگىنىڭ اقمولا وبلىستىق فيليالىنىڭ ءتوراعاسى جانات ەرەجەپوۆ، اۋعان سوعىسىنىڭ ارداگەرلەرى وبلىستىق وداعىنىڭ ءتوراعاسى دۋانباي ىبرايەۆ جانە مارقۇمنىڭ ءىنىسى ايدوس ءابۋتالىپوۆ، مايدانگەر مەن تىل ەڭبەككەرلەرى جانە اۋدان تۇرعىندارى قاتىستى.

«بۇگىن زەرەندىلىكتەر تاريحي وقيعانىڭ كۋاسى بولىپ وتىر. وسىدان 74 جىل بۇرىن حابارسىز كەتكەن جەرلەسىمىزدىڭ جەرلەنگەن جەرى انىقتالىپ، ءبىر ۋىس توپىراعى تۋعان اۋىلىنا جەتكىزىلىپ وتىر. وسىنداي يگى ىسكە ۇلەس قوسقان بارشاڭىزعا اۋدان تۇرعىندارى اتىنان شىنايى العىسىمدى بىلدىرەمىن»، دەدى اۋدان اكىمى مەرەكە مۇستافين.

قايىرقوجا ءابۋتالىپوۆ زەرەندى اۋدانى قاراشىلىك اۋىلىنىڭ تۋماسى. 1942 -جىلى مايدانعا اتتانىپ، ۆولحوۆسكي مايدانىندا 286- اتقىشتار ديۆيزياسىنىڭ 986- پولكى 5- اتقىشتار روتاسىندا سوعىستى.

«قىزىل جۇلدىز»، «ەرلىگى ءۇشىن» سياقتى ءبىرقاتار مەدالدارمەن ماراپاتتالعان. 1944 -جىلى قازا تاۋىپ، ەستونيانىڭ اندرەسارە اۋىلى ماڭىندا باۋىرلاستار زيراتىنا جەرلەنگەن. تۋىستارى ونىڭ جەرلەنگەن جەرىن تەك 74 جىل وتكەننەن كەيىن عانا انىقتالىپ وتىر.