شىمكەنتتىك شەنەۋنىك جولعا بولىنگەن 747 ميلليون تەڭگەنى جىمقىرعان
بۇل تۋرالى سىبايلاس جەمقورلىققا قارسى ءىس- قيمىل اگەنتتىگى الدىن الۋ قىزمەتىنىڭ باسشىسى سايان احمەتجانوۆ ونلاين بريفينگىدە ايتتى، دەپ حابارلايدى قازاقپارات ءتىلشىسى.
«2021 -جىلى سىبايلاس جەمقورلىققا قارسى قىزمەتى 18 سوتقا دەيىنگى تەرگەۋ اشقان بولسا، بيىل جارتىجىلدىقتىڭ وزىندە عانا 15 سوتقا دەيىنگى تەرگەۋ ءجۇرىپ جاتىر. مۇنىڭ ءبارى - قىلمىستىق ىستەر. ونىڭ كوبى اقشا جىمقىرۋ، پاراقورلىق لاۋازىمدىق وكىلەتىن پايدالانۋ باپتارىمەن بايلانىستى»، - دەگەن اگەنتتىك وكىلى بىرنەشە مىسال كەلتىردى.
«مىسالى سىبايلاس جەمقورلىققا قارسى قىزمەتتىڭ وندىرىسىندە باتىس قازاقستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسى باسشىنىڭ ۇستىنەن قوزعالعان ءىس جاتىر. ول جالپى سوماسى 180 ميلليون تەڭگەدەن اساتىن جۇمىستاردىڭ ورىندالعانى تۋرالى جالعان اكتىگە قول قويدى دەگەن كۇدىككە ءىلىندى. كۇردەلى جوندەۋ نىسانى - «نۇرلى جول» باعدارلاماسانىڭ اياسىندا قارجى بولىنگەن «ءبورىلى- اقساي- جىمپيتى» باعىتىنداعى جول.
سونداي- اق شىمكەنت قالاسىنىڭ جولاۋشىلار كولىگى جانە اۆتوموبيل جولدارى باسقارماسى باسشىسى مەن وزگە تۇلعالاردىڭ ۇستىنەن دە قىلمىستىق ءىس تەرگەلىپ جاتىر. ولار بىلتىر قازان ايىندا مەملەكەت بيۋدجەتىن ىسىراپ ەتۋ ارقىلى 747 ميلليون تەڭگەدەن استام قاراجاتتى جىمقىرعان. مۇندا دا قاراجات «نۇرلى جول» باعدارلاماسى ارقىلى بولىنگەن»، - دەدى سايان احمەتجانوۆ.