قازاقستاندا تىركەلگەن جەڭىل كولىكتەر سانى 73,5 پايىزعا ءوستى

استانا. قازاقپارات - قازاقستاندا 2018-جىلدىڭ قاڭتار-قاراشا ايلارىندا 812536 جەڭىل كولىك تىركەلگەن، بۇل بىلتىر وسى كەزەڭمەن سالىستىرعاندا 73,5 پايىز كوپ، دەپ حابارلايدى قازاقپارات ءتىلشىسى ق ر ۇلتتىق ەكونوميكا مينيسترلىگىنىڭ ستاتيستيكا كوميتەتىنە سىلتەمە جاساپ.

وتكەن جىلعى 1- جەلتوقسانداعى جاعداي بويىنشا، قازاقستاندا تىركەلگەن جەڭىل اۆتوموبيلدەر سانى 4047,8 مىڭ بىرلىكتى قۇراعان. ەسەپتىك كەزەڭدە 14231 جول-كولىك اپاتى تىركەلدى، بۇل بۇعان دەيىنگى جىلعا قاراعاندا 8,4 پايىز از. بۇل رەتتە جول-كولىك اپاتتارىنان 20232 ادام زارداپ شەككەن.

1- جەلتوقسانداعى جاعداي بويىنشا، كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ بويىنشا ساقتاندىرۋ ۇيىمدارى 19,8 ميلليارد تەڭگەگە 53954 ساقتاندىرۋ تولەمىن جۇزەگە اسىرعان.