ۇلىتاۋدان جاياۋ شىققان 72 جاستاعى ساياحاتشى پاۆلودارعا جەتتى

None
None
پاۆلودار. قازاقپارات - 72 جاستاعى شەبەر-رەستاۆراتور سارسەنباي قوتىراشوۆ ۇلىتاۋدان پاۆلودارعا جاياۋ ءجۇرىپ جەتتى.

قارت ساياحاتشى وسىمەن قازاقستاننىڭ 9-وبلىسىنا جاياۋ كەلدى، دەپ حابارلايدى قازاقپارات Pavlodarnews.kz-كە سىلتەمە جاساپ.

«بۇل ساپارعا شىعۋىمنىڭ باستى ءۇش ماقساتى بار. بىرىنشىدەن، تۋعان جەرىم ۇلىتاۋدىڭ مادەني-تاريحي مۇراسىن ناسيحاتتايمىن. ەكىنشىدەن، قىمىزدىڭ پايدالى قاسيەتتەرىنە جۇرتشىلىقتىڭ نازارىن اۋدارعىم كەلەدى. ونىڭ ۇستىنە يۋنەسكومەن كەلىسىمىم بار. قازاقستاندى ارالاپ، مىڭنان استام قولونەرشىلەر تۋرالى مالىمەت جيناسام، ولار جەكە سايتقا ەنىپ، سول ارقىلى دۇنيەجۇزىنە تانىمال بولادى»، - دەدى س. قوتىراشوۆ.

ۇلىتاۋدان كەلگەن اقساقال ناۋرىز ايىنىڭ سوڭىنان بەرى جول ءجۇرىپ كەلەدى. وسى ۋاقىت ىشىندە ول بەس جۇپ اياق كيىمدى توزدىرىپ ۇلگەرگەن. ءبىراق ول جاياۋ جۇرگىنشىلەر جولىنا «ءبىر تيىن» جۇمساماعانىنا ريزا.

قاي وڭىرگە كەلسە دە، جۇرت ونى قۇشاق جايا قارسى الىپ، تاماقتاندىرىپ، تەگىن تۇنەتىپ جاتىر.

«قازاقستاندىقتار وتە قوناقجاي، جىلى قارسى العاندارىڭىزعا راحمەت»، - دەدى ساياحاتشى.

سارسەنباي قوتىراشوۆپەن بىرگە دەپۋتات باقتيار قوجاحمەتوۆ ەرىپ ءجۇر.

«ساپارىن اياقتاعان سوڭ سارسەنباي ەلباسىنىڭ قابىلداۋىنا بارىپ، قىمىزدىڭ ەمدىك قاسيەتىن جەكە مىسالمەن كورسەتۋدى، سونىمەن قاتار قىمىز كۇنىن رەسمي مەرەكە رەتىندە بەلگىلەۋدى ۇسىنباق»، - دەدى ب. قوجاحمەتوۆ.


سوڭعى جاڭالىقتار