قازاقستاننىڭ اۋىل شارۋاشىلىعى ونىمدەرى 72 ەلگە ەكسپورتتالادى
«مينيسترلىك ەلدىڭ ەپيزووتيالىق جانە فيتوسانيتاريالىق سالاۋاتتىلىعىن قامتاماسىز ەتۋ جانە قازاقستاندىق اۋىل شارۋاشىلىعى ونىمدەرىن وتكىزەتىن ەكسپورتتىق نارىقتار اشۋ بويىنشا جۇيەلى جۇمىس جۇرگىزۋدە. «ورتالىق- وبلىس- اۋدان» قاعيداتى بويىنشا ۆەتەريناريالىق باقىلاۋ ۆەرتيكالى زاڭنامالىق دەڭگەيدە قالپىنا كەلتىرىلدى، بۇل باقىلاۋعا جاتاتىن ونىمدەر قوزعالىسىن قاداعالاۋدى كۇشەيتۋگە جانە ءونىمنىڭ «ەگىستىك القابىنان ۇستەلگە دەيىن» قاداعالانۋىن قامتاماسىز ەتۋگە سەپتىگىن تيگىزەدى»، - دەدى مينيستر ورتالىق كوممۋنيكاتسيالار قىزمەتىندەگى ونلاين كەزدەسۋدە.
ونىڭ اتاپ وتۋىنشە، وتكەن جىلى قىتايمەن شوشقا ەتىنە، ءسۇت ونىمدەرىنە، جۇنگە قويىلاتىن ۆەتەريناريالىق تالاپتار، زىعىر تۇقىمىنا، بيداي ۇنىنا، قۇراما جەمگە قويىلاتىن فيتوسانيتاريالىق تالاپتار كەلىسىلدى. وسىدان بىرنەشە جىل بۇرىن قىتاي اۋسىل مەن نودۋليارلى دەرماتيت بويىنشا قويعان شەكتەۋلەردى الىپ تاستادى. بۇل ءوز كەزەگىندە قازاقستاندىق ەت ونىمدەرى ءۇشىن قىتاي نارىعىنا مۇمكىندىك بەردى. سونداي- اق، سويىسقا ارنالعان ءتىرى ءىرى قارا مالدى، سيىر ەتىن، ۇساق مالدىڭ جاناما ونىمدەرىن، تاعامدىق جۇمىرتقانى يرانعا ەكسپورتتاۋعا قويىلاتىن ۆەتەريناريالىق تالاپتار كەلىسىلدى.
«ناتيجەسىندە قازاقستاندىق اگروونەركاسىپتىك كەشەن ونىمدەرىن ەكسپورتتاۋ كولەمى قىتايعا 50,5 پايىزعا، پارسى شىعاناعى ەلدەرىنە 3,2 ەسەگە، ورتالىق ازيا ەلدەرىنە 7,4, ەۋرازيالىق ەكونوميكالىق وداق ەلدەرىنە 8,2 پايىزعا ۇلعايدى. جالپى، وتكەن جىلى قازاقستاندىق ونىمدەر الەمنىڭ 72 ەلىنە ەكسپورتتالدى. بۇل رەتتە، وتكەن جىلدىڭ قورىتىندىسى بويىنشا اگروونەركاسىپتىك كەشەن ونىمدەرىنىڭ ەكسپورتى 6,4 پايىزعا ارتىپ، 3,3 ميلليارد ا ق ش دوللارىنا جەتتى»، - دەدى ساپارحان وماروۆ.
اۆتور: مارلان جيەمباي