ناۋرىزدا جاياۋ جولعا شىققان 72 جاستاعى اقساقال ەلورداعا دەيىن 4 مىڭ شاقىرىم ءجۇرىپ ءوتتى
7 شىلدە 16:02

ناۋرىزدا جاياۋ جولعا شىققان 72 جاستاعى اقساقال ەلورداعا دەيىن 4 مىڭ شاقىرىم ءجۇرىپ ءوتتى

نۇر- سۇلتان. قازاقپارات - 72 جاستاعى سارسەنباي قوتىراشوۆ قازاقستاندى جاياۋ ارالاپ ءجۇر. ساپارىن « ۇلىتاۋعا باردىڭ با؟» دەپ اتاپ، جولعا بيىل 31-ناۋرىزدا شىققان. بۇگىن ساياحاتشى اقساقال ەلورداعا جەتتى، دەپ حابارلايدى قازاقپارات ءتىلشىسى.

«مەنىڭ جاياۋ ساپارىم بيىل 31-ناۋرىزدا ۇلىتاۋدان باستالدى. ەلدى جاياۋ ارالاۋداعى ءۇش ماقساتىم بار. بىرىنشىدەن، ۇلىتاۋدىڭ قازاق تاريحىندا ەرەكشە ءرول اتقاراتىنىن كوپشىلىككە ناسيحاتتاۋ. ەكىنشى ماقساتىم - قازاقستانداعى قولونەر شەبەرلەرىنىڭ ءتىزىمىن جاساقتاۋ. ولارمەن كەزدەسىپ، باس قوسۋ. ءۇشىنشى، ۇمىت بولىپ بارا جاتقان ۇلتتىق قىمىزمۇرىندىق مەيرامىن قايتا دارىپتەپ، ەلگە ماڭىزىن ءتۇسىندىرۋ. اللانىڭ بەرگەن قۋاتى مەن حالىقتىڭ قولداۋىنىڭ ارقاسىندا كۇننەن كۇنگە شيراپ كەلەمىن»، - دەدى سارسەنباي قوتىراشوۆ.

72 جاسار اقساقال ەلورداعا دەيىن 4 مىڭ شاقىرىمدى جاياۋ باعىندىرىپ وتىر. ناۋرىزدان بەرى قىزىلوردا، تۇركىستان، شىمكەنت، تاراز، الماتى، قونايەۆ، تالدىقورعان، اياگوز، سەمەي، وسكەمەن، پاۆلودار، قاراعاندى قالالارىندا بولعان.

«بەينەتسىز ەڭبەك جوق دەيدى. جول- جونەكەي ازداعان قيىنشىلىقتار بولدى. اربام سىنىپ قالىپ، اياق كيىمىم توزىپ قالدى. سىنىپ قالعان اربانى سۇيرەتىپ كەلە جاتقانىمدى كورگەن ءبىر كىسى ۇيىنە شاقىرىپ، اربامدى دانەكەرلەپ، قوندىرىپ، قوناق ەتىپ شىعارىپ سالدى. بۇل اربامەن شاتىر، توسەك- ورىن، كەرەك- جاراق قۇرالدار جانە تاماعىمدى الىپ ءجۇرمىن. جالپى سالماعى - 60 كەلى. جولدا تاماقتان قينالعان ەمەسپىن. قازاق حالقى دارحان عوي. جول- جونەكەي كەزدەسكەن ازاماتتار تاماعىڭ، سۋىڭ بار ما دەپ سۇراپ، سالىپ بەرىپ جاتتى. اللا قۋات بەرسەك، الداعى ماقسات - مەككەگە جاياۋ بارۋ»، - دەيدى ول.

سارسەنباي اتامىز ەلدى جاياۋ ارالاۋدى بۇرىننان جوسپارلاعان. «باسىندا جاقىندارىم «جاسىڭ بولسا 70 تەن استى، نە ىستەيسىڭ جاياۋ ءجۇرىپ، ودان دا دەنساۋلىعىڭدى كۇت» دەدى. كەيىن ءۇش ماقساتىمدى ايتقان سوڭ، ولار رۇقساتىن بەرىپ شىعارىپ سالدى. جولدا قاراڭعى تۇسپەي ەلدىمەكەنگە جەتسەم، سوندا قونىپ ءجۇردىم. ال يەن دالادا قالىپ قويسام تىگەتىن شاتىرىم بار»،- دەدى جولاۋشى.

الدا ساياحاتشى اتامىزدى تاعى 4 مىڭ شاقىرىم جول كۇتىپ تۇر. اتاپ ايتقاندا، ەلوردادان كوكشەتاۋ، پەتروپاۆل، قوستاناي، اقتوبە، ورال، اتىراۋ، ودان ءارى اقتاۋعا جەتىپ، سوندا ساپارىن اياقتاماق. جولاۋشى اقساقالدى ەلوردادا ءبىر توپ قولداۋشىلارى كۇتىپ الدى. ولار شاشۋ شاشىپ، اتاعا شاپان جاۋىپ، ودان ءارى ساپارىنا ساتتىلىك تىلەدى. ايتا كەتسەك، سارسەنباي قوتىراشوۆ بۇگىن كەشكە ەلورداداعى «قازاقكونتسەرت» ورتالىعىندا وتەتىن كونسەرتكە قاتىسىپ، سول جەردە جەرگىلىكتى قولونەر شەبەرلەرىمەن كەزدەسۋ وتكىزەدى.

ەسكە سالساق، بۇعان دەيىن ۇلىتاۋلىق 72 جاستاعى قارتتىڭ جاياۋ مارافونعا اتتانعانىن حابارلاعان ەدىك.

جاڭالىقتار