ادامنىڭ جانارى جايناپ تۇرسا، عۇمىرى ۇزاق بولادى - 71 جاستاعى جەلاياق

قاراعاندى. قازاقپارات - جەتپىس ءبىر جاسىندا جەلدەي ەسكەن جەلاياق اتا. قاراعاندى وبلىسىندا 93 مارافونعا قاتىسىپ، قازاقستاننىڭ ەسىمىن ايگىلى ەتىپ جۇرگەن قاريا تۇرادى، دەپ حابارلايدى قازاقپارات ءتىلشىسى.

تولەۋتاي جامانبەك جۇلدە ءۇشىن ەمەس، جۇمىر جەردىڭ كارتاسىندا قازاقستان دەگەن ەل بارىن تانىتۋ ماقساتىندا مارافوندارعا قاتىساتىنىن ايتادى. بۇل باستاماسىنا دەمەۋشىلەر دە قولداۋ كورسەتەتىنىنە ريزا. الايدا، كوپ جاعدايدا قارجىنى ءوز قالتاسىنان شىعاراتىنىن جاسىرمادى.

جەلاياق قاريا جاتتىعۋدان ەش قول ۇزگەن ەمەس. قىستا شاڭعى تەۋىپ شىنىقسا، جازدا ۆەلوسيپەد تەبەدى.

«مەنى كوبى جەتپىسكە كەلگەن دەپ ايتپايدى. شاشىم اعارعانىنا قاراماستان، ءارى كەتسە 55 جاستا شىعارسىز دەپ جاتادى. ءتىپتى، اۆتوبۋستا جول ءجۇرۋ كارتامدى تەكسەرەدى، جەكە كۋالىگىمدى سۇرايدى. كەيدە رەنجيمىن، زەينەتكەر ەمەسسىز دەگەندە. ادام ءوزىن جاس سەزىنۋى ءۇشىن كۇتىنۋى كەرەك، جاقسى ۇيىقتاپ، جاقسى تاماقتانىپ، دەنەشىنىقتىرۋمەن اينالىسقانى ءجون»، - دەيدى قاريا.

تولەۋتاي جامانبەك 2006 -جىلى ءۇندىستاندا وتكەن XIV ازيا بىرىنشىلىگىندە قولا جۇلدەگەر اتانعان. حالىقارالىق دارەجەدەگى «ماستەر- اتلەتيك» اتاعى دا بار. جەڭىستىڭ 65 جىلدىعىنا ارنالعان سۋپەر-مارافوندا «قاراعاندى- ماسكەۋ» اراسىنداعى 3700 شاقىرىمدى 18 كۇندە ارتتا قالدىردى. جالپى سانى 4 ەلدەگى 125 قالانى باسىپ ءوتىپتى.

«ول مارافوندا 14 ادام جۇگىردىك. كۇنىنە 250 شاقىرىمنان جۇگىرىپ وتىردىق. تاڭعى التىدا تۇرامىز، سودان كۇن باتقانشا جۇگىرەمىز. نەگە مارافوندى تاڭدادىڭىز دەپ سۇراعاندا ايتاتىنىم، مارافونشى تەك وزىنە قاجىماس قايرات جيناپ قانا قويماي، حالقىنا ماقتانىش سىيلايدى»، - دەيدى سپورتشى.

تولەۋتاي جامانبەك شەت اۋدانىنىڭ تۋماسى. نەگىزگى ماماندىعى - دەنە تاربيەسى ءپانىنىڭ مۇعالىمى. سالاۋاتتى ءومىر سالتىن بەرىك ۇستانعان كەيىپكەرىمىز 25 جىل شاحتادا جۇمىس ىستەگەن.

مارافونشى بۇگىندە قاراعاندى قالاسىنداعى ۇزاق ءومىر ءسۇرۋ ورتالىعىنا ءجيى كەلەدى. مۇندا وزىمەن زامانداس بەلسەندى قاريالارمەن بىرگە ءتۇرلى ۇيىرمەلەرگە قاتىسادى. قازىر تەننيس ارقىلى كورۋ قابىلەتىن قالىپقا كەلتىرىپ جۇرگەنىن ايتادى.

«ماعان كەنيا، ماروككو، ەفيوپيا ەلدەرىنىڭ جەلاياقتارى جىگەر سىيلايدى. كەيدە سولارعا ۇقساعىم كەلەدى دەپ ايتامىن. ايەلىم مەن بالالارىم كەيدە: «كورشىلەردەن ۇيات قوي، قاشانعى جۇگىرە بەرەسىڭ، قويسايشى؟!» - دەپ ايتادى. ءبىراق، ول ءۇشىن ماعان كىسەن سالىپ قويۋ كەرەك شىعار. تىنىش وتىرا المايمىن. مەنىڭشە، ادامنىڭ جانارى جايناپ تۇرسا، ءومىرى ءماندى جانە ۇزاق بولادى»، - دەيدى زەينەتكەر.

تولەۋتاي جامانبەك ورتالىقتاعى بي ۇيىرمەسىنە دە قاتىسادى. اپتاسىنا ەكى رەت وتكىزىلەتىن دارىسكە 40 تان استام زەينەتكەر جينالاتىنىن ايتادى. مارافونشى قاريا - مۇنداعى جالعىز ەر ادام. ولار رەترو اندەرگە دە بيلەپ، كوڭىلدى ۋاقىت وتكىزەدى.

اۆتور

اگاتا مۋحامەدجانوۆا