بيىل قازاقستان 71 ميلليون توننا مۇناي ەكسپورتتاماقشى
ەنەرگەتيكا ءمينيسترى بولات اقشولاقوۆ ۆەدومستۆونىڭ كەڭەيتىلگەن القا ماجىلىسىندە وسىلاي دەدى.
«2023-جىلى مۇناي ءوندىرۋدى 90,5 ميلليون توننا دەڭگەيىندە، ال مۇناي ەكسپورتىن 71 ميلليون توننا دەڭگەيىندە قامتاماسىز ەتۋ جوسپارلانۋدا. مۇناي اينالىمىن باقىلاۋ ءۇشىن مۇناي مەن گاز كوندەنساتىن ەسەپكە الۋدىڭ اقپاراتتىق جۇيەسى ىسكە قوسىلدى. ول بۇگىنگى تاڭدا مۇناي اينالىمىنىڭ %95 ىن باقىلاۋعا مۇمكىندىك بەرەدى»، - دەدى مينيستر.
ونىڭ سوزىنە قاراعاندا، مۇناي ءوندىرۋ سالاسىندا ەلىمىزدىڭ 3 نەگىزگى كەن ورنىندا ءىرى جوبالاردى ىسكە اسىرۋ جۇمىستارى جالعاسا بەرەدى.
«تەڭىز كەن ورنىنداعى كەلەشەك كەنىشىن كەڭەيتۋ جوباسى جۇزەگە اسىرىلۋدا. ۇڭعىما ەرنەۋىنىڭ قىسىمىن باسقارۋ جوباسىن 2023-جىلى اياقتاۋ جانە كەلەشەكتى كەڭەيتۋ جوباسىن 2024-جىلى اياقتاۋ جوسپارلانۋدا. ول مۇناي ءوندىرۋدى جىلىنا 12 ميلليون تونناعا ۇلعايتۋعا مۇمكىندىك بەرەدى. جۇمىستاردىڭ جالپى ىلگەرىلەۋى - %96»، - دەدى بولات اقشولاقوۆ.