الەمدەگى ءولىم-ءجىتىمنىڭ 71 پايىزى ءۇش ءتۇرلى عانا سىرقاتتان بولادى - دارىگەر
7 ءساۋىر 12:55

الەمدەگى ءولىم-ءجىتىمنىڭ 71 پايىزى ءۇش ءتۇرلى عانا سىرقاتتان بولادى - دارىگەر

الماتى. قازاقپارات- بۇگىن - دۇنيەجۇزىلىك دەنساۋلىق كۇنى. 2022 -جىلى وسى حالىقارالىق مەرەكەنىڭ ۇرانى بولىپ «ءبىزدىڭ پلانەتا، ءبىزدىڭ دەنساۋلىعىمىز» تاقىرىبى تاڭدالدى، دەپ حابارلايدى قازاقپارات ءتىلشىسى.

كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ باسقارما ءتورايىمى روزا قۋانىشبەكوۆانىڭ ايتۋىنشا، دەنساۋلىق ءۇشىن نەگىزگى قاۋىپ - كوپ قوزعالمايتىن ءومىر سالتى، حولەستەريننىڭ جوعارى دەڭگەيى، تەمەكى شەگۋ، الكوگول تۇتىنۋ.

«جۇرەك-قانتامىر، رەسپيراتورلىق اۋرۋلار مەن قانت ديابەتى الەمدەگى بارلىق ءولىم-ءجىتىمنىڭ %71 ىن قۇرايدى. ولاردىڭ الدىن الۋ كوپ جاعدايدا ادامنىڭ وزىنە بايلانىستى. بۇل - تەك سالاۋاتتى ءومىر سالتى، دەنە قيمىلىنىڭ بەلسەندىلىگى، دۇرىس تاماقتانۋ عانا ەمەس، سونداي-اق دارىگەرگە ۋاقىتىندا قارالۋ، ۇنەمى مەديتسينالىق تەكسەرىلۋدەن ءوتۋ جانە دارىگەردىڭ ۇسىنىمدارىن ورىنداۋ. وسىنىڭ بارلىعى - دەنساۋلىقتى ساقتاۋ جانە ۇزاق ءومىر ءسۇرۋ، اۋرۋلاردىڭ الدىن الۋ ءۇشىن قاجەت»، - دەيدى دارىگەر.

سپيكەردىڭ سوزىنشە، قازاقستاندا 2013 -جىلدان بەرى اۋرۋلاردى باسقارۋ باعدارلاماسى (ا ب ب) بار. بۇل باعدارلاماعا تەك قازاقستاندا عانا ەمەس، سونىمەن قاتار دۇنيەجۇزىندە ەڭ كەڭ تارالعان اۋرۋلار، ياعني ارتەريالىق گيپەرتەنزيا، سوزىلمالى جۇرەك كەمىستىگى، 2 ءتيپتى قانت ديابەتى ەندى. قۇرامىندا ۋچاسكەلىك دارىگەر، مەيىرگەر، الەۋمەتتىك قىزمەتكەر، سالاۋاتتى ءومىر سالتى ورتالىعىنىڭ قىزمەتكەرى جانە پسيحولوگ كىرەتىن ەمحانانىڭ مۋلتيتارتىپتىك توبى پاتسيەنتتى اۋرۋدى اسقىندىرماۋ ءۇشىن ءوز دەنساۋلىعىن باسقارۋعا، ۇيگە شاقىرىلاتىن جەدەل مەديتسينالىق كومەكتىڭ سانىن ازايتۋعا ۇيرەتەدى.

«ق ر دەنساۋلىق ساقتاۋ مينيسترلىگى ءبىزدىڭ ينستيتۋتقا باعدارلامانى ۇيىمداستىرۋ- ادىستەمەلىك سۇيەمەلدەۋ، وڭىرلەردە ونى ەنگىزۋ جونىندەگى ءىس- شارالاردى جۇزەگە اسىرۋ، ابب ينديكاتورلارىنىڭ ەلەكتروندىق بازاسى بويىنشا باعدارلاما ينديكاتورلارىنا مونيتورينگ جۇرگىزۋ ءۇشىن جاۋاپكەرشىلىك جۇكتەگەن»، - دەيدى كارديولوگيا جانە ىشكى اۋرۋلار عىلىمي- زەرتتەۋ ينستيتۋتىنىڭ باسقارما ءتورايىمى روزا قۋانىشبەكوۆا.

سپيكەردىڭ سوزىنشە، بۇگىنگى تاڭدا وسى باعدارلاماداعى پاتسيەنتتەر جاقسى ناتيجەلەرگە قول جەتكىزدى: ولاردىڭ قان قىسىمى تۇراقتاندى، حولەستەرين مەن گليۋكوزا كورسەتكىشتەرى جاقساردى، ولار جەدەل جاردەمدى سيرەك شاقىرىپ جانە اۋرۋحاناعا سيرەك جاتقىزىلاتىن بولدى. «2022 -جىلعى 1-قاڭتارداعى جاعداي بويىنشا باعدارلاماعا قاتىساتىن ارتەريالىق گيپەرتەنزيا، سوزىلمالى جۇرەك كەمىستىگى جانە قانت ديابەت بار پاتسيەنتتەردى قامتۋ %57,4 عا جەتتى. مۇندا ءاربىر پاتسيەنتتىڭ ا ب ب-عا رەسمي تۇردە تارتىلۋى ماڭىزدى. مامانداردى وقىتۋعا دا كوپ كوڭىل ءبولۋ قاجەت. كارديولوگيا جانە ىشكى اۋرۋلار عىلىمي- زەرتتەۋ ينستيتۋتىنىڭ ماماندارى 2021 -جىلدىڭ ىشىندە ارالاس فورماتتا 7 ءوڭىردىڭ مۋلتيتارتىپتىك كوماندالارىنىڭ 665 قىزمەتكەرىن، ولاردىڭ ىشىندە 246 دارىگەر، 419 ورتا مەديتسينا قىزمەتكەرىن وقىتتى. وقىتىلعان ماماندار ءوز كەزەگىندە جۇمىس ورىندارىندا وزدەرىنىڭ ارىپتەستەرىن وقىتادى»، - روزا قۋانىشبەكوۆا.

اۆتور: الما مۇقانوۆا


جاڭالىقتار