ءماجىلىس دەپۋتاتتارىنىڭ 70 پايىزى جاڭاردى - ساراپشى
سەبەبى سايلانعان دەپۋتاتتار مەن ساياسي پارتيالاردىڭ اراسىندا «وڭشىلدار» دا، «سولشىلدار» دا بار.
بۇل پىكىردى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ اعا ساراپشىسى اسحات كەڭەسوۆ كەلتىرىپ وتىر، دەپ حابارلايدى قازاقپارات ءتىلشىسى.
«ءماجىلىس جانە ءماسليحات سايلاۋى ناتيجەسىن مەملەكەت باسشىسىنىڭ باستاماسىمەن جۇزەگە اسىپ جاتقان ساياسي رەفورمالاردىڭ جەمىسى رەتىندە قاراستىرۋعا بولادى. ويتكەنى، اتالعان ساياسي رەفورمالار سايلاۋ جۇيەسى مەن پارتيالىق جۇيەگە وڭ وزگەرىس اكەلدى. ايتالىق، ەكى جاڭا ساياسي پارتيا پايدا بولدى، ماجوريتارلى سايلاۋ جۇيەسى قايتا ەنگىزىلدى، پايىزدىق كەدەرگى %7 دان %5 عا تومەندەتىلدى، «بارلىعىنا قارسىمىن» گرافاسى ەنگىزىلدى، تاعى سول سياقتى. وسىعان وراي، 19-ناۋرىزداعى سايلاۋ قورىتىندىسى ساياسي رەفورمالاردىڭ دۇرىس جانە ۋاقىتىلى ەكەندىگىن كورسەتىپ وتىر»، - دەدى اسحات كەڭەسوۆ.
ساراپشى 7 ساياسي پارتيانىڭ 6 ۋى ماجىلىسكە ءوتىپ، پارلامەنتتىك فراكسيا سانى ەكى ەسە وسكەنىن ايتتى.
ايتۋىنشا، بۇل پارلامەنتتىك پليۋراليزمنىڭ دامۋى مەن ساپالى يدەيالاردىڭ باسەكەلەستىگىنە الىپ كەلەدى.
«الدىڭعى شاقىرىلىمعا قاراعاندا بۇل جولى ءماجىلىس دەپۋتاتتارىنىڭ %70 جاڭاردى. ياعني قۇرام ايتارلىقتاي وزگەردى. بۇل ءوز كەزەگىندە، ساياسي ەليتا مەن ساياسي جۇيەنىڭ جاڭارىپ، جاندانۋىنا الىپ كەلەدى. سونىمەن قاتار، تاجىريبەلى دەپۋتاتتاردىڭ ماجىلىستە بولۋى كادرلار ساباقتاستىعىنىڭ ساقتالۋىن كورسەتەدى. سەبەبى تاجىريبە مەن جاڭاشىلدىق - دامۋدىڭ كەپىلى. سونىمەن قاتار ءماجىلىستىڭ جاڭا قۇرامىندا قوعامدىق پىكىردى قالىپتاستىرىپ وتىرعان ازاماتتار سانى ءوستى. ولار - حالىق اراسىنان شىققان، قوعام مۇددەسىن قورعاۋشى تۇلعالار. بۇل پارلامەنتتەگى قوعامدىق كۇشتەردىڭ بالانسىن رەتتەيدى. ويتكەنى، جاڭا ءماجىلىستىڭ قۇرامىندا كوپتەگەن قوعامدىق سالا وكىلدەرى بار»، - دەيدى ول.
سونىمەن قاتار، مامان ءماجىلىس ءارتۇرلى ساياسي باعىتتاعى پارتيالاردىڭ نەگىزگى كۇرەس الاڭىنا اينالاتىنىن تىلگە تيەك ەتتى.
ونىڭ مالىمدەۋىنشە، سايلانعان دەپۋتاتتار مەن ساياسي پارتيالاردىڭ اراسىندا «وڭشىلدار» دا، «سولشىلدار» دا بار.
سونىمەن قاتار، ۇزاق جىلداردان بەرى بيلىك ءۇشىن كۇرەسكەن وپپوزيتسيالىق پارتيا ماجىلىستەن ورىن الدى.
«ماجىلىستە يدەولوگيالىق پليۋراليزم پايدا بولادى. ءارتۇرلى دەڭگەيدەگى الەۋمەتتىك توپ وكىلدەرى وزدەرىنىڭ مۇددەسى ءۇشىن كۇرەسىپ، يدەيالارىن ورتاعا سالماق. جالپى، پرەزيدەنت باستامالارىنىڭ نەگىزگى باعىتتارى، سايلاۋ ناتيجەسىنەن كورىپ وتىرعانىمىزداي، تولىق جۇزەگە استى دەسەك، قاتەلەسپەيمىز. سەبەبى، جوعارىدا اتالعان رەفورمالاردىڭ ىسكە اسۋ ناتيجەسىندە ازاماتتاردىڭ سۇرانىستارىن قاناعاتتاندىرا الاتىن زاماناۋي پارلامەنت جاساقتالدى. جاڭا ءماجىلىس جاڭا ادامدارمەن بىرگە الداعى بەس جىلداعى بولاشاعىمىزدى انىقتايتىن بولادى»، - دەيدى اسحات كەڭەسوۆ.
ءماجىلىس دەپۋتاتتارىنىڭ تولىق تىزىمىمەن وسى سىلتەمەدە تانىسۋعا بولادى.
سونىمەن قاتار بۇگىن ورتالىق سايلاۋ كوميسسياسى ءماجىلىستىڭ 8-سايلانىم دەپۋتاتتارىن رەسمي تۇردە تىركەدى.
ايتا كەتسەك، ەرتەڭ مەملەكەت باسشىسى قاسىم-جومارت توقايەۆ VIII سايلانعان ق ر پارلامەنتىنىڭ ءبىرىنشى سەسسياسىنىڭ اشىلۋىندا ءسوز سويلەيدى.