قازاق كوشىنىڭ انادولى توپىراعىنا جەتكەنىنە 70 جىل تولدى - شەتەلدەگى قازاق ءتىلدى ب ا ق- قا شولۋ

None
None
نۇر- سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

ماۋسىم ايىندا وزبەكستانعا ەڭ كوپ تۋريست كورشى قازاقستاننان كەلگەن - «ءو ز ا»


2022 -جىلدىڭ ماۋسىم ايىندا وزبەكستانعا قانشا تۋريست كەلگەنى جانە ەڭ كوپ كەلۋشىلەر قاي ەلدەن كەلگەنى تۋرالى اقپارات بەرىلدى.

«ءو ز ا» اقپاراتتىق اگەنتتىگى كەلتىرگەن مەملەكەتتىك ستاتيستيكا كوميتەتىنىڭ مالىمەتى بويىنشا، 2022 -جىلدىڭ ماۋسىم ايىندا وزبەكستانعا تۋريستىك ماقساتپەن 493900 شەتەل ازاماتى كەلگەن. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 307,2 مىڭ ادامعا نەمەسە 2,6 ەسەگە كوپ، دەپ حابارلايدى «ءوزا» اقپاراتتىق اگەنتتىگى.

وسى اي ىشىندە وزبەكستانعا ەڭ كوپ تۋريست قازاقستاننان كەلگەن. ولاردىڭ جالپى سانى 178,1 مىڭدى قۇرادى. ماۋسىم ايىندا وزبەكستانعا تەك تۋريستىك ماقساتپەن ازاماتتارى كەلگەن ەلدەردىڭ ءتىزىمى جاريالانعان.

اتاپ ايتار بولساق، قازاقستان (178,1 مىڭ ادام)، قىرعىزستان (123,3 مىڭ ادام)، تاجىكستان (113,2 مىڭ ادام)، رەسەي (53,4 مىڭ ادام)، تۇركيا (7,3 مىڭ ادام)، گەرمانيا (2,2 مىڭ ادام)، ا ق ش (1,5 مىڭ ادام) قاتارلى ەلدەردەن تۋريستەر ساياحاتتاپ كەلگەن.

يران مەن قازاقستان اراسىنداعى ەكونوميكالىق الماسۋ كولەمى 2,5 ەسەگە ارتتى - Parstoday


بۇل تۋرالى وسى اپتادا يراننىڭ Parstoday اقپاراتتىق اگەنتتىگى حابارلاعان بولاتىن.

Parstoday اقپارات اگەنتتىگىنىڭ سارسەنبى كۇنگى مالىمەتىنشە، ي ي ر الماتىداعى باس كونسۋلى موحسەن فاعاني الماتىدا ءجۇز يراندىق ەكونوميكالىق جانە ىسكەر بەلسەندىلەردىڭ قاتىسۋىمەن وتكەن وتىرىستا ەكى ەل اراسىنداعى ساۋدا كولەمىنىڭ ايتارلىقتاي ءوسىپ، 2020 -جىلعى 168 ميلليون دوللاردان 2021 -جىلى 440 ميلليون دوللارعا جەتكەنىن حابارلادى. فاعانيدىڭ ايتۋىنشا، يران مەن قازاقستان اراسىنداعى ەكىجاقتى ساۋدانىڭ ءوسۋى بيىل دا جالعاسىپ، وسى جىلدىڭ (2022) العاشقى 4 ايىندا ەكى ەل اراسىنداعى تاۋار اينالىمى 251 ميلليون دوللارعا جەتكەن. الماتىداعى يراننىڭ باس كونسۋلى يران ازاماتتارى ءۇشىن 14 كۇندىك ۆيزانىڭ جويىلۋىنا بايلانىستى ءوز پىكىرىن ايتقان.

«بۇل ماسەلە يراندىق كاسىپكەرلەردىڭ، ينۆەستورلاردىڭ جانە تۋريستەردىڭ قازاقستانعا كەلۋىن جانە ەكى ەلدىڭ الەۋەتىن ءوزارا مويىنداۋدى ارتتىردى»، - دەيدى ي ي ر الماتىداعى باس كونسۋلى موحسەن فاعاني.

سونداي- اق، وسى اپتادا يراندىق ب ا ق- تا «قازاقستانداعى كۇندەلىكتى ءومىر» دەگەن تاقىرىپتاعى اقپارات تا جارىق كوردى.


Parstoday اگەنتتىگىندە جاريالانعان سۋرەتتى اقپاراتتا قازاقستان تۋرالى قىسقا دا نۇسقا تانىستىرۋ جازىلعان. وندا قازاقستان ورتالىق ازيادا ورنالاسقان جانە 2724900 شارشى شاقىرىم كولەمىمەن دۇنيەجۇزىندەگى توعىزىنشى مەملەكەت ەكەنىن جانە قازاقستان كونە تاريحى بار ەلدەردىڭ ءبىرى بولعانىن تىلگە تيەك ەتەدى.


سونىمەن قاتار، 70 جىل بويى قازاقستاننىڭ استاناسى بولعان الماتى قالاسى تاريحي جىبەك جولىنىڭ بويىندا ورنالاسقاندىقتان وسى ەلدىڭ ەكونوميكالىق، ساۋدا جانە مادەني ورتالىعى بولىپ تابىلادى دەپ مالىمەت بەرەدى. «بۇل قالا كەڭ كوشەلەرىمەن، رەتتى جانە جاسىل كەلبەتىمەن كوز تارتادى»، دەپ جازادى يراننىڭ Parstoday اقپاراتتىق اگەنتتىگى.

قازاق كوشىنىڭ انادولى توپىراعىنا جەتكەنىنە 70 جىل تولدى - TRT


تۇركيانىڭ ستامبۇل قالاسىندا كەزىندە التايدان اۋعان قازاق كوشىنىڭ قاسيەتتى انادولى توپىراعىنا جەتكەنىنە 70 جىل تولۋىنا وراي مەرەيتويلىق ءىس- شارا اتالىپ ءوتتى، دەپ حابارلايدى تۇركيا راديو تەلەديدار اگەنتتىگى.

اتالعان مەرەيتويلىق شاراعا ەۋروپا ەلدەرىندە تۇراتىن قانداستارىمىز قۇرعان ۇيىمداردىڭ وكىلدەرى دە قاتىسقان. اتاپ ايتقاندا، «قوجا احمەت ياساۋي» قورى، نيگدە التاي اۋىلى، مانيسا ساليحلي، كونيا يسميل، كەلن، ۆەنا، پاريج، بەرلين، ميۋنحەن، امستەردام، شۆەتسيا، نورۆەگيا مەن انگلياداعى قوعامدىق بىرلەستىكتەر جانە «قازاقكەنت التاي» قاۋىمداستىعى بىرلەسە ۇيىمداستىرعان يگى شارا كونە شاھار ستامبۇلدا ءوتتى.

تۇركيالىق ب ا ق- تىڭ دەرەگىنشە، حالىقارالىق جيىننىڭ ەكىنشى بولىمىندە ستامبۇلداعى «كەمەربۋرگاز كيرازلىبەنت» دەمالىس ايماعىندا 1 جارىم مىڭداي قازاقتىڭ قاتىسۋىمەن اس بەرىلدى. استا باس قوسقان باۋىرلارعا تاريحي وتانى - قازاقستاننان كەلگەن «اتامەكەن» مۋزىكالىق توبى ءان شاشۋىن تارتۋ ەتىپ، جۇرتقا تاماشا كوڭىل- كۇي سىيلاعان. باسقوسۋ بارىسىندا «قازاقكەنت التاي» قاۋىمداستىعىنىڭ پرەزيدەنتى ەرحان يىلدىز، باعجىلار قالاسىنىڭ مەرى ابدۋللا وزدەمير جانە قازاقستان رەسپۋبليكاسىنىڭ ستامبۇلداعى باس كونسۋلى ءالىم بايەل بۇل مەرەيتويدىڭ تاريحي ماڭىزى زور ەكەنىن اتاپ ءوتىپ، ءتۇبى ءبىر تۇرىك ەلى مەن قازاق حالقىنىڭ باۋىرلاستىعىنا باسا ءمان بەرىپ ءسوز سويلەگەن.

تۇركيا راديو تەلەديدار اگەنتتىگىنىڭ دەرەگىنشە، ەۋروپا ەلدەرىندەگى قانداستار مەن تۇركيا قازاقتارى قاۋىشقان حالىقارالىق جيىندا قازاقستانداعى «وتانداستار قورىنىڭ» پرەزيدەنتى ابزال ساپاربەك ۇلىنىڭ ارنايى جولداعان قۇتتىقتاۋ حاتى وقىلىپ، شەتتەگى اعايىننىڭ ابىرويى ءبىر كوتەرىلىپ قالعان. اتاجۇرتتىڭ اقجارما تىلەگىنەن كەيىن قۇرمەتتى قوناقتارعا قازاقتىڭ ۇلتتىق تاعامدارى تارتىلدى.

بوديبيلدەر ەركەبۇلان بايىت ۇلى ازيا چەمپيونى اتاندى - Kaznews


موڭعوليانىڭ ەردەنەت قالاسىندا تۇراتىن بوديبيلدەر ەركەبۇلان بايىت ۇلى ازيا چەمپيونى اتاندى. بوديبيلدينگتەن 54 رەتكى ازيا چەمپيوناتى مالديۆ ارالىندا وتۋدە.

ازيا چەمپيوناتىنىڭ «Men’s sports physique up to 180 cm» كاتەگورياسى بويىنشا ونەر كورسەتكەن موڭعوليالىق قازاق بوديبيلدەرى ەركەبۇلان بايىت ۇلى توپ جارىپ، التىننان القا تاعىپ موڭعوليا قۇراماسىنىڭ قورجىنىنا العاشقى مەدالدى سالدى، دەپ حابارلايدى موڭعوليالىق Kaznews اقپارات اگەنتتىگى.

ەركەبۇلان بايىت ۇلىنا بۇل جولعى چەمپيوناتتا ءۇندىستان، تايلانديا جانە يران سپورتشىلارى لايىقتى قارسىلاس بولعان. موڭعوليالىق قانداسىمىز ەركەبۇلان بايىت ۇلى (@erke_coach) ءوز قۋانىشىمەن ينستاگرام جەلىسىندە ءبولىستى.

ايتا كەتەيىك، ەركەبۇلان بايىت ۇلى موڭعوليالىق جۋرناليست، بىرنەشە جىر كىتابى مەن عىلىمي ەڭبەكتەرىنىڭ اۆتورى بەلگىلى اقىن قانداسىمىز بايىت قابان ۇلىنىڭ بالاسى ەكەنى بەلگىلى بولدى. بۇل تۋرالى اقىن الەۋمەتتىك جەلىدەگى پاراقشاسىندا جازدى.

«بالام ەركەبۇلان بايىت ۇلى ازيا بىرىنشىلىگىنەن التىن مەدال الىپ ازيا چەمپيونى بولعان قۋانىشتى حاباردى بەسسالانىڭ باسىندا ءجۇرىپ ەستىدىم. اللاعا ءتاۋبا، اياماي توككەن اشى تەر مەن ەرىنبەي ەتكەن ەڭبەكتىڭ جەمىسى. ءبىز سەنىمەن ماقتانامىز، بالام»، دەپ جازدى بەلگىلى اقىن قانداسىمىز Facebook-تەگى پاراقشاسىندا.

ستامبۇلدا احمەت بايتۇرسىن ۇلىنىڭ 150 جىلدىعىنا ارنالعان سيمپوزيۋم ءوتتى - TRT


ستامبۇلدا قازاقتىڭ اتاقتى اعارتۋشىسى احمەت بايتۇرسىن ۇلىنىڭ 150 جىلدىعىنا ارنالعان سيمپوزيۋم ءوتتى. ستامبۇل ۋنيۆەرسيتەتىندەگى «فارابي» ەۋرازيا زەرتتەۋ ورتالىعى ۇيىمداستىرعان عىلىمي جيىن «5- حالىقارالىق تۇرىك الەمى تاريح جانە مادەنيەت سيمپوزيۋمى» دەپ اتالادى.

سيمپوزيۋمعا ازەربايجان، قازاقستان، قىرعىزستان، تۇركيا، گاگاۋزيا، بولگاريادان عالىمدار كەلدى، دەپ حابارلايدى تۇركيا راديو تەلەديدار اگەنتتىگى.

«تۇرىكتىڭ جازباشا تاريحى» دەگەن تاقىرىپپەن وتكەن عىلىمي جيىنعا تۇرىكسوي باس حاتشىسىنىڭ ورىنباسارى بيلال چاكىدجى، ستامبۇل ۋنيۆەرسيتەتى رەكتورى پروفەسسور ماحمۋت اك، ءال- فارابي ۋنيۆەرسيتەتىنىڭ رەكتورى جانسەيىت تۇيمەبايەۆ، ستامبۇل ۋنيۆەرسيتەتى تۇركيات ينستيتۋتىنىڭ باسشىسى مۇستافا بالدجى، ءال- فارابي ۋنيۆەرسيتەتى فيلولوگيا فاكۋلتەتى قازاق ءتىلى كافەدرا مەڭگەرۋشىسى انار سالقىنباي، ۇلى بريتانيا «شىڭعىس ايتماتوۆ» اكادەمياسى باسشىسى راحيما ابدۋاليەۆا قاتىستى. اتالعان عىلىمي جيىندا «ا. بايتۇرسىن ۇلى جانە تۇرىك جازباشا تاريحى»، «تۇرىك الەمىندە جازۋ ءتىلى جانە ا. بايتۇرسىن ۇلى»، «ا. بايتۇرسىن ۇلىنىڭ پرينتسيپتەرى جانە زاماناۋي جازۋ جۇمىستارى»، «تۇركى تانۋ جانە شىعىستانۋ زەرتتەۋلەرىندە ءتىل» سەكىلدى باياندامالار وقىلدى.

ايتا كەتەيىك، سيمپوزيۋم شەڭبەرىندە ايىرىقشا «شىڭعىس ايتماتوۆتىڭ تۋىندىلارى مەن زامانداس قىرعىز پوەزياسىنان اۋدارمالار» اتتى دوڭگەلەك ۇستەل جينالىسى دا ۇيىمداستىرىلدى.

يران ەلشىسى قازاقستاننىڭ ەكولوگيا، گەولوگيا جانە تابيعي رەسۋرستار مينيسترىمەن كەزدەستى - Parstoday


يراننىڭ قازاقستانداعى ەلشىسى مادجيد سابەر مەن قازاقستاننىڭ ەكولوگيا، گەولوگيا جانە تابيعي رەسۋرستار ءمينيسترى كەزدەسۋدە كاسپي تەڭىزىنىڭ قورشاعان ورتاسىن تالقىلادى.

Parstoday اقپارات اگەنتتىگىنىڭ سەيسەنبى كۇنگى حابارلاۋى بويىنشا، مادجيد سابەر جانە سەرىكقالي برەكەشيەۆتىڭ كەزدەسۋىندە ەكى ەلدىڭ قورشاعان ورتانى قورعاۋ ماسەلەلەرى تالقىلاندى. اسىرەسە كاسپي تەڭىزىنىڭ ەكولوگياسى، تاۋ- كەن سالاسىنداعى بىرلەسكەن ءىس- شارالار، گەولوگيالىق بارلاۋ جۇمىستارى، جۇزەگە اسىرىلىپ جاتقان بىرلەسكەن جوبالار مەن تەحنيكالىق جانە ينجينيرينگتىك قىزمەتتەر سالاسىنداعى ەكىجاقتى جانە ايماقتىق قارىم- قاتىناستارى قاراستىرىلعان.

بۇل كەزدەسۋدە يراننىڭ قازاقستانداعى ەلشىسى يراندىق كومپانيالاردىڭ تاۋ- كەن ونەركاسىبى، سۋ رەسۋرستارىنىڭ ءارتۇرلى سالالارىندا جۇزەگە اسىرىپ جاتقان كەيبىر جوبالارىنا توقتالىپ، يراندىق كومپانيالاردىڭ وسى سالالارداعى مۇمكىندىكتەرىن كوبىرەك تانىستىردى. سونداي- اق قازاقستان تاراپى يراندىق كومپانيالاردىڭ كوبىرەك قولداۋىن سۇراعان.

ايتا كەتۋ كەرەك، سەرىكقالي برەكەشيەۆ قازاقستان ۇكىمەتىنىڭ تابيعي رەسۋرستار، تاۋ- كەن ونەركاسىبى جانە جۇزەگە اسىرىلىپ جاتقان ۇلتتىق جوبالار سالاسىنداعى ساياساتىن ءتۇسىندىرۋ ارقىلى يراندىق تەحنيكالىق جانە ينجەنەرلىك كومپانيالاردىڭ قازاقستاندا بولۋى مەن قىزمەتىن قۇپتادى.

قىتاي شىڭجاڭ- قازاقستان كاسىپورىندار ىنتىماقتاستىعى تۋرالى بەينە كەزدەسۋ ءوتتى - «حالىق گازەتى»


اپتا باسىندا قىتايدىڭ «حالىق گازەتى» اقپاراتتىق پورتالىندا وسىنداي تاقىرىپتاعى اقپارات جاريالاندى. 15- شىلدە كۇنى قىتايدىڭ حالىقارالىق ساۋداعا جاردەمدەسۋ كەڭەسىنىڭ شىڭجاڭ ولكەلىك كوميتەتى، قازاقستاننىڭ «اتامەكەن» ۇلتتىق كاسىپكەرلەر قاۋىمداستىعى جانە باسقا دا بولىمشەلەر بىرلەسىپ، قىتاي شىڭجاڭ- قازاقستان كاسىپورىندار ىنتىماقتاستىعى تۋرالى بەينە كونفەرەنسياسىن وتكىزدى، دەپ حابارلايدى قىتايلىق ب ا ق.

«حالىق گازەتى» اقپاراتتىق پورتالىنىڭ كەلتىرگەن دەرەگىنە سۇيەنسەك، بۇل جولعى بەينە كەزدەسۋ تىكەلەي ەفيردە جۇرگىزىلدى. قىتاي مەن قازاقستاننىڭ 80-گە جۋىق كاسىپورىن وكىلدەرى كەزدەسۋگە دەيىن سۇرانىس پەن ۇسىنىستىڭ ناقتى سايكەستىگى، وتىرىس كەزىندەگى ىنتىماقتاستىق نەگىزگە الىندى. جانە كەزدەسۋدەن كەيىنگى جەكە جۇمىس جاعدايىندا توقىما، تىگىن، اۋىل شارۋاشىلىعى ونىمدەرى مەن باسقا سالالارداعى ىنتىماقتاستىقتىڭ وڭتايلى جولدارىن ىزدەستىرۋ جانە ءوزارا تيىمدىلىك پەن تەڭ ۇتىسقا جەتۋ ناتيجەلەرىن تالقىلادى...

كورپوراتيۆتىك كوممۋنيكاتسيا سەسسياسىندا ۋاعدالاستىق قاعيداتتارى بويىنشا سايكەستەندىرىلگەن قىتايلىق جانە قازاقستاندىق كومپانيالار اۋدارماشىلار مەن زاڭگەرلەردىڭ كومەگىمەن جەكە جوبا الماسۋلارىن جۇرگىزدى. كەزدەسۋدەن كەيىن تاپسىرىستار ناقتىلانىپ، ورىندالۋى قاداعالاناتىن بولدى.

قىتايلىق ب ا ق- تىڭ دەرەگىنشە، شىڭجاڭ حالىقارالىق ساۋدانى دامىتۋ كەڭەسى قىتاي مەن قازاقستان كاسىپورىندارى اراسىنداعى الماسۋ مەن ىنتىماقتاستىقتى ودان ءارى دامىتادى. بۇدان كەيىن قوس تاراپ ەكونوميكالىق جانە ساۋدا سالالارىنداعى وندىرىستىك قۋات پەن ىنتىماقتاستىق كەڭىستىگىن كەڭەيتۋدى جالعاستىرماق.


اۆتور: بەيسەن سۇلتان


سوڭعى جاڭالىقتار