ورتالىق ازيا ەلدەرىمەن تاۋار اينالىمىن 70 ميلليارد دوللارعا جەتكىزەمىز - شي جينپيڭ
«ءبىز ورتالىق ازيانىڭ ساپالى تاۋارلارى مەن اۋىلشارۋاشىلىق ونىمدەرى ءۇشىن قىتايدىڭ اۋقىمدى ىشكى نارىعىنا كەڭىنەن جول اشۋعا دايىنبىز. ورتالىق ازيا مەن قىتاي اراسىندا ساۋدا فورۋمىن وتكىزسە جاقسى بولار ەدى. ءبىز 2030-جىلعا قاراي قىتاي مەن ورتالىق ازيا ەلدەرى اراسىنداعى تاۋار اينالىمىن 70 ميلليارد دوللارعا دەيىن ارتتىرۋعا كۇش سالامىز. ەلەكتروندى كوممەرتسيا سالاسىندا ارىپتەستىك ورناتۋ بويىنشا ديالوگ تەتىگىن قۇرىپ، قاجەت بولعان جاعدايدا يندۋستريالىق-يننوۆاتسيالىق ارىپتەستىك فورۋمىن وتكىزۋدى ۇسىنامىز»، - دەدى قىتاي باسشىسى.
شارا بارىسىندا ق ح ر ءتوراعاسى قازاقستانداعى قاڭتار تراگەدياسى تۋرالى پىكىر ءبىلدىردى.
«ءبىزدىڭ ءبارىمىز سىرتقى كۇشتەردىڭ ايماقتاعى ءتۇرلى-ءتۇستى توڭكەرىستەردىڭ قولتىعىنا سۋ بۇركىپ، «ادام قۇقىقتارى» سىلتاۋىمەن ىشكى ىستەرىمىزگە ارالاسۋ، حالىقتارىمىزدىڭ تىنىش ءومىرىن بۇزۋ تالپىنىستارىنا ءۇزىلدى-كەسىلدى قارسى تۇرامىز. جاقىندا قازاقستاندا بولعان تارتىپسىزدىكتەر ادام ولىمىنە جانە ماتەريالدىق شىعىندارعا اكەپ سوقتىردى»، - دەدى ول.
ايتا كەتەيىك، مەملەكەت باسشىسى قاسىم-جومارت توقايەۆ «ورتالىق ازيا - ق ح ر» سامميتىنە قاتىسۋدا .
سامميتكە ق ح ر ءتوراعاسى شي جينپيڭ، وزبەكستان پرەزيدەنتى شاۆكات ميرزيەيەۆ، قىرعىزستان پرەزيدەنتى سادىر جاپپاروۆ، تۇرىكمەنستان پرەزيدەنتى گۋربانگۋلى بەردىمۇحامەدوۆ، تاجىكستان پرەزيدەنتى ەمومالي راحمون بەينەكونفەرەنسيا رەجيمىندە قاتىسىپ وتىر.