مەكتەپ ءبىتىرۋشى سىنىپتارداعى وقۋ پاندەرىنىڭ %70 ءداستۇرلى فورماتتا وقىتىلادى
بۇعان دەيىن باستاۋىش جانە بەسىنشى سىنىپ وقۋشىلارى ءۇشىن اتا-انالاردىڭ وتىنىشتەرى بويىنشا كەزەكشى سىنىپتاردا كۇندىزگى وقۋ ءۇشىن جاعداي جاسالعان بولاتىن. ەندىگى كەزەكتە مەكتەپ ءبىتىرۋشى سىنىپتارعا قاتىستى دەربەس شەشىم قابىلداندى، دەپ حابارلايدى ق ر ب ع م باسپا ءسوز قىزمەتى Telegram كانالىندا.
مەكتەپ ءبىتىرۋشى سىنىپتارداعى وقۋ پاندەرىنىڭ %70 مىندەتتى تۇردە ءداستۇرلى فورماتتا، ال قالعان %30 قاشىقتان وقىتىلاتىن بولادى. مەكتەپتەردە يكەمدەلگەن ساباق كەستەلەرى جاسالادى.
كەزەكشى سىنىپتارداعى وقۋشىلاردىڭ سانى بۇرىنعىداي 15 ادامنان اسپاۋى قاجەت (ماسەلەن، ەگەر سىنىپتا 25 وقۋشى بولسا، وندا سىنىپ ەكى توپقا بولىنەدى).
«مەكتەپ ءبىتىرۋشى سىنىپ وقۋشىلارىنىڭ اتا-انالارى بالالارىنىڭ ءداستۇرلى فورماتتا وقۋىنا رۇقسات بەرۋدى سۇراعان بولاتىن. بۇل ماسەلەنى جەرگىلىكتى جەرلەردەگى باس سانيتارلىق دارىگەرلەر رەتتەيدى. ءبىراق مەكتەپ ءبىتىرۋشى سىنىپتارداعى وقۋشىلار نەگىزگى پاندەردى مىندەتتى تۇردە مەكتەپ قابىرعاسىندا وقۋلارى ءتيىس. قانداي پاندەر ءداستۇرلى فورماتتا وقىلادى، ال قايسىسى قاشىقتان جۇرگىزىلەتىنىن ءار مەكتەپتىڭ اكىمشىلىگى ءوزى شەشەدى. سونىمەن قاتار بارلىق ءبىلىم بەرۋ ۇيىمىنا ادىستەمەلىك ۇسىنىمدار جولداندى. بيىلعى وقۋ جىلىندا مەكتەپ ءبىتىرۋشى سىنىپ وقۋشىلارىنىڭ سانى 440 مىڭنان اساتىنىن اتاپ وتكىم كەلەدى»، - دەدى ق ر مەكتەپكە دەيىنگى ءبىلىم جانە ورتا ءبىلىم كوميتەتىنىڭ ءتورايىمى مايرا مەلدەبەكوۆا.