قازاقستان پاسپورتى الەمدىك رەيتينگىدە 70-ورىندا تۇر

نۇر- سۇلتان. قازاقپارات - Henley & Partners كونسالتينگىلىك كومپانياسى جىلداعى ءداستۇر بويىنشا ساياحات ءۇشىن ىڭعايلى ءارى ەڭ تارتىمدى پاسپورتتار رەيتينگىن جاريالادى، دەپ حابارلايدى قازاقپارات ءتىلشىسى.

Henley Passport Index رەيتينگى حالىقارالىق اۋە كولىگى قاۋىمداستىعىنىڭ (IATA) ەكسكليۋزيۆتى مالىمەتتەرىنە نەگىزدەلگەن. 199 ەلدىڭ ءتولقۇجاتى مەن 227 تۋريستىك باعىتتى قامتيدى. كەز كەلگەن ەلدە ۆيزالىق ساياساتتىڭ وزگەرتىلۋىنە بايلانىستى رەيتينگ جىل بويى جاڭارتىلىپ وتىرادى.

ءتولقۇجاتتار رەيتينگىنىڭ العاشقى بەستىگىندە جاپونيا، سينگاپۋر، گەرمانيا، وڭتۇستىك كورەيا مەن فينليانديا تۇر. ماسەلەن، جاپونيانىڭ پاسپورتىمەن الەمنىڭ 191 ەلىنە ساياحاتتاۋعا بولادى. ۇزدىك ءتولقۇجاتتار قاتارىندا سونىمەن قاتار يتاليا، ليۋكسەمبۋرگ، يسپانيا، اۆستريا، فرانسيا، يرلانديا ەلدەرى بار. ءتىزىمنىڭ ەڭ سوڭىندا يراك پەن اۋعانستان ورنالاسقان.

ال قازاقستان بيىلعى رەيتينگىدە 70- ورىننان كورىندى. 70- ورىندا سونىمەن قاتار بەلارۋس پەن قىتاي تۇر. قازاقستان مەن اتالعان وسى ەكى ەلدىڭ ازاماتتارى الەمنىڭ 75 ەلىنە ۇشىپ بارا الادى ەكەن.

ەسكە سالا كەتسەك بىلتىرعى رەيتينگتە قازاقستان پاسپورتى 67- ورىننان كورىنگەن ەدى.

اۆتور: ايان بەكەن ۇلى