يزرايلدە 70 جىل بۇرىن ورماندى القاپ مۇلدەم بولماعان
ەل اۋماعىنىڭ ۇشتەن ەكى بولىگىن ءشول دالا الىپ جاتقان مەملەكەت مۇنداي جەتىستىككە قالاي قول جەتكىزدى؟ يزرايلدە 70 جىل بۇرىن ورماندى القاپ مۇلدەم بولماعان. ەلدىڭ بارلىق اۋماعىن ءشول مەن ساز باتپاق الىپ جاتقان. دەگەنمەن، مەملەكەت 70 جىلدىڭ ىشىندە ءشول دالانى ادام تانىماستاي ەتىپ وزگەرتتى. ياعني، كوگالداندىرۋدا كەرەمەت جەتىستىكترگە قول جەتكىزدى.
ەلي حافۋتا، ورمان شارۋاشىلىعى وكرۋگىنىڭ باسشىسى:
- قازىر يزرايل اۋماعىنىڭ % 8- ءىن ورمان الىپ جاتىر. 70 جىل بۇرىن جاسىل جەلەك ءتىپتى بولماعان. مەملەكەت بۇعان وزىق تەحنولوگيا مەن تىنىمسىز ەڭبەكتىڭ ارقاسىندا قول جەتكىزدى. سالىستىرمالى تۇردە ايتساق مىسىردىڭ 7 پايىز جەرىندە عانا ورمان بار.
ال مۇنداي جەتىستىككە جەتۋدىڭ قۇپياسى قاراپايىم: كوشەتتەردى وتىرعىزىپ، سۋعارۋ. ورماندى القاپتى كەڭەيتۋ مەملەكەتتىك ماڭىزى بار باعدارلامانىڭ ءبىرى. يزرايلدە ورمانداردىڭ ءوسۋ كورسەتكىشى كانادادان دا جوعارى. قازىر ولاردى باقىلاۋ دروندارمەن دە جۇزەگە اسىرىلادى.
سامۋيل سپرينتسىن، ورمان شارۋاشىلىعى وكرۋگىنىڭ ينجەنەرى:
- ءبىز ۇنەمى جوسپار بويىنشا جۇمىس ىستەيمىز. كوشەتتەر وتىرعىزىلماس بۇرىن بارلىق تابيعي فاكتورلار زەرتتەلەدى. مىسالى، توپىراقتى، اۋا رايىن تەكسەرەمىز. يزرايلدە نەگىزىنەن يەرۋساليمدىك قاراعاي وتىرعىزىلادى. بۇل ەرەكشە اعاش. ول جاز ىستىعىندا ۇيىقتاپ، ال قىس كەزىندە جاڭبىردا تەز وسەدى. ونىڭ كوشەتتەرى ارنايى ورىنداردا ءبىر جارىم مەترگە جەتكەنشە ءوسىرىپ، كەيىن قاجەتتى جەرگە وتىرعىزادى. بۇل اعاشتار ءتىپتى ورتكە دە ءتوزىمدى كەلەدى.