قازاقستاننىڭ تەرروريزمگە قارسى كودەكسىنە 70-تەن استام مەملەكەت قول قويدى - ەلباسى
بۇل تۋرالى بۇگىن اقوردادا قازاقستاندا تىركەلگەن ديپلوماتيالىق ميسسيالار مەن حالىقارالىق ۇيىمداردىڭ باسشىلارىمەن كەزدەۋ بارىسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«جاھاندىق باستامالار ارقىلى مەملەكەتىمىزدىڭ بەدەلىن، حالىقارالىق ارەناداعى قازاقستاننىڭ ورنىن ناقتىلاۋ. بۇعان قازاقستاننىڭ ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قىزمەتىنىڭ قورىتىندىلارى دالەل. جىل باسىندا نيۋ-يوركتە ەلىمىزدىڭ قاۋىپسىزدىك كەڭەسىنە ءتوراعالىعى اياسىندا جاپپاي قىرىپ-جويۋ قارۋىن تاراتپاۋ، سەنىم شارالارى تاقىرىبىندا ارنايى وتىرىس وتكىزىلدى. اتالعان ءىس-شارا بارىسىندا ب ۇ ۇ ق ك ءتوراعاسىنىڭ بىرەگەي مالىمدەمەسى قابىلداندى. بۇل قاۋىپسىزدىك كەڭەسىنىڭ جاپپاي قىرىپ-جويۋ قارۋىن تاراتپاۋ اياسىنداعى سەنىم شارالارىن نىعايتۋعا باعىتتالعان تۇڭعىش ساياسي قۇجات بولىپ تابىلادى»، - دەدى نۇرسۇلتان نازاربايەۆ.
ەلباسى قىركۇيەك ايىندا ب ۇ ۇ باس اسسامبلەياسىنىڭ 73 -سەسسياسى بارىسىندا قازاقستان ۇسىنعان تەرروريزمنەن ازات الەمگە قول جەتكىزۋ ءتارتىبى كودەكسىنە قازىرگى كۇنى 70-تەن استام مەملەكەت قول قويعانىن ايتتى. اتالعان كودەكس ب ۇ ۇ-نىڭ تەرروريزمگە قارسى جۇيەسىن نىعايتۋداعى ماڭىزدى قادام رەتىندە تانىلعانىن اتاپ ءوتتى.
«قازاقستان قاۋىپسىزدىك كەڭەسىنىڭ ءبىرقاتار قۇرىلىمدارىنا ءتوراعالىق ەتكەن كەزدە ورتالىق ازيا جانە اۋعانستان ماسەلەلەرىنە باسا نازار اۋداردى. وسىلايشا، ءبىزدىڭ ەلىمىز «الەم - ХХІ عاسىر» مانيفەسىندە جاريا ەتكەن قازىرگى زاماننىڭ وزەكتى پروبلەمالارىن شەشۋ جولدارىنا قاتىستى ۇستانىمىن ناقتى، دايەكتى تۇردە ىلگەرىلەتۋىن جالعاستىرۋدا»، - دەدى ق ر پرەزيدەنتى.