استانا ماڭىنداعى اۋىلدان 70 جىل بۇرىن جازىلعان قۇندى كىتاپ تابىلدى
قاراوتكەل اۋىلىندا سوعىس ارداگەرى قورعاش قىلىشباي ۇلىنىڭ بالاسى ءادىلحان قىلىشبايەۆپەن كەزدەسكەن «قازاقستان تاريحى» پورتالىنىڭ شىعارۋشى رەداكتورى زاڭعار كارىمحان دەرەك ىزدەپ اقمول اۋىلىنا بارعان. ول اۋىلداعى ب. قىلىشبايەۆتىڭ ۇيىنەن قىزىقتى كىتاپ تابىلعان.
«1949-جىلى جارىق كورگەن «ۆىبورى ۆ ۆەرحوۆنىي سوۆەت كازاحسكوي س س ر 1947 گ.» اتتى كىتاپ «كىرىسپە»، «نەگىزگى ءبولىم»، «ۇلى وتان سوعىسى جىلدارىنداعى قازاقستاندىقتار»، «قازاقستان ونەركاسىبى»، «قازاقستان اۋىل شارۋاشىلىعى»، «مادەنيەت پەن تۇرمىسى»، «قازاقستان جوعارى سوۆەتىنىڭ 1947-جىلعى سايلاۋى» دەگەن بىرنەشە بولىمنەن تۇرادى. جالپى كولەمى - 10 باسپا تاباق، ياعني 160 بەت. «قازوگيز» باسپاسىنان شىعارىلعان. سوعىستان كەيىنگى كەزەڭنىڭ تاريحي كارتيناسىن تولىق سيپاتتايتىن باسىلىمنىڭ ءماتىنى ناقتى، فوتوسۋرەتتەرى جاڭاشا»، - دەيدى ول.
كىتاپتىڭ قۇندىلىعىن ارتتىرىپ تۇرعان تۇسى - تاريحي ساتتەردى قالت جىبەرمەي تۇسىرگەن سۋرەتتەردىڭ كوپتىگىندە. وتان سوعىسى جىلدارىندا ەرلىگىمەن تانىلعان قازاق جانە قازاقستاندىق باتىرلاردىڭ وشپەس كەلبەتى مەن ەسىمى بۇگىنگى تاڭدا ەسكەرۋسىز قالعان دالا ەرجۇرەكتەرىنىڭ تاريحي بەينەسى مەنمۇندالاپ تۇرادى. التاي مەن اتىراۋدىڭ، قىزىلجار مەن تاشكەنتتىڭ اراسىنداعى بايتاق دالانىڭ ورتاق قازانىن قايناتقان، ەگىنىن تولتىرعان، قامباسىن جاساپ، مۇنايىن تاسىتقان ەڭبەك ارداگەرلەرىنىڭ قۇرىشتان جارالعانداي بولمىسى قاپىسىز اڭعارىلادى. سوعىستان كەيىنگى تۇرالاعان ەكونوميكانى كوتەرۋگە سەرپىن بەرگەن ىرگەلى ءوندىرىس وشاقتارى مەن كاسىپورىندار جايلى ستاتيستيكالىق دەرەكتەر قورى دا از قامتىلماعان. وندىرىستەگى ونىمدىلىكتى ارتتىرۋ ءۇشىن ويلاستىرىلعان ستاحانوۆشىلار ءادىسىنىڭ قازاقستان دالاسىنا جاپپاي تارالعانى، ءجۇزىن كۇن ءسۇيىپ، ماڭدايىن جەل وپكەن دالا ەڭبەككەرلەرىنىڭ ەڭبەك مايدانىنداعى تاريحي ساتتەرى تاڭباعا باسىلعان.
«كىتاپتىڭ «مادەنيەت پەن تۇرمىس» اتتى بولىمىندە قازاق ونەرى مەن مادەنيەتىنىڭ مايتالمان تۇلعالارىنىڭ بۇرىن ەش جەردە كەزدەسپەگەن تاريحي سۋرەتتەرى دە وقىرمان نازارىنا ۇسىنىلعان. اسىرەسە، توقسان جاسىندا سىرناي تارتىپ وتىرعان حالىق اقىنى شاشۋبايدىڭ سۋرەتى ەل تاريحى مەن ادەبيەتى ءۇشىن زور ماڭىزعا يە. سونداي-اق ق. ساتبايەۆتىڭ، م. اۋەزوۆتىڭ، س. مۇقانوۆتىڭ، ك. ازىربايەۆتىڭ، ءا. تاجىبايەۆتىڭ، جامبىلدىڭ، م. عابدۋلليننىڭ، ك. بايسەيىتوۆا مەن ش. جيەنقۇلوۆانىڭ سۋرەتتەرى قىزىقتىرارى ءسوزسىز»، - دەيدى زاڭعار كارىمحان.