قازاقستاندا سوڭعى ايدا 700 دەن استام مەدقىزمەتكەر كوروناۆيرۋس جۇقتىرعان

نۇر- سۇلتان. قازاقپارات – ق ر د س م سانيتارلىق- ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا قازاقستاندا سوڭعى ايدا 747 مەديتسينا قىزمەتكەرى كوروناۆيرۋس جۇقتىرعانىن ءمالىم ەتتى، دەپ حابارلايدى قازاقپارات ءتىلشىسى.

«20 - قازاننان باستاپ 747 مەديتسينالىق قىزمەتكەر اۋرۋدى جۇقتىردى. ەپيدەميولوگيالىق تەرگەۋ ناتيجەلەرى بويىنشا 118 ادام وزدەرىنىڭ كاسىبي قىزمەتىنە بايلانىستى كوروناۆيرۋس ينفەكتسياسىن جۇقتىرعان. قالعان مەديتسينا قىزمەتكەرلەرىنىڭ جۇقتىرۋ جاعدايى كاسىبي قىزمەتىنە بايلانىستى ەمەس»،-دەدى ايجان ەسماعامبەتوۆا.

ەسكە سالا كەتسەك الەكسەي سوي «قازاقستاندا جەلتوقسان نەمەسە قاڭتار ايلارىندا قاتاڭ كارانتين شارالارى ەنگىزىلۋى مۇمكىن بە» دەگەن سۇراققا جاۋاپ بەرگەن بولاتىن.

«اپتا سايىن مالىمەتتەردى زەرتتەپ، الداعى كەزەڭدەرگە دە بولجام جاساپ جاتىرمىز. قازىر كورىپ وتىرعانىمىزداي، قازاقستاندا كارانتين شارالارىن جەلتوقسان نەمەسە قاڭتار ايلارىندا ەنگىزۋ ماسەلەسى جاعدايدى قانشالىقتى باقىلاۋدا ۇستاي الاتىنىمىزعا بايلانىستى بولادى. قازىر كوروناۆيرۋس ورشىگەن كەيبىر وڭىردە جۇقتىرۋ دەڭگەيى تومەندەپ كەلە جاتقانىن بايقاپ وتىرمىز. شىعىس قازاقستاندا ماسەلەن جاعداي رەتتەلىپ، جۇقتىرۋ دەڭگەيىنىڭ تومەندەۋ تەندەنتسياسىن باقىلاۋدامىز»،-دەدى الەكسەي سوي.