الماتى وبلىسىندا جوعالعان 700 گە جۋىق مال يەسىنە قايتارىلدى

تالدىقورعان. قازاقپارات - الماتى وبلىسىنىڭ اۋماعىندا جىل باسىنان بەرى مال ۇرلىعىن كاسىپ قىلعان 59 قىلمىستىق توپتىڭ مۇشەلەرى قۇرىقتالدى. پوليتسەيلەر بۇلتارتپاس ايعاقتار ارقىلى ولاردىڭ 130-دان استام مال ۇرلىعىنا قاتىسى بارىن دالەلدەدى، دەپ حابارلايدى قازاقپارات ءتىلشىسى.

 پوليتسيا تاراتقان اقپاراتقا سايكەس، بيىل وبلىستا مالدىڭ قولدى بولۋ دەرەگى بىلتىرعى جىلمەن سالىستىرعاندا 20 پايىزعا ازايعان. سەبەبى، وبلىس اۋماعىندا ءتارتىپ ساقشىلارى ۇسىنعان «مالشى - مال يەسى - اتقارۋشى ورگان» اتتى الەۋمەتتىك جوباسى ءوز ناتيجەسىن بەرۋدە. اتالعان جوبانىڭ باستى ماقساتى - مال يەسى مەن مالشىنىڭ جاۋاپكەرشىلىگىن ارتتىرۋ جانە بارىمتاشىلار ءۇشىن وڭاي ولجا بولاتىن قاراۋسىز مالدى باقتاشىسىز قالدىرماۋ. وسى كەزگە دەيىن وبلىستا بەس مىڭعا جۋىق ادام باعدارلاما بويىنشا كەلىسىمگە كەلىپ، ءوز مۇلكىنىڭ اماندىعىن قامتاماسىز ەتتى.

«مالشى - مال يەسى - اتقارۋشى ورگان» باعدارلاماسى قابىلدانعالى جايىلىمداعى مالدىڭ جوعالۋ دەرەگى ەداۋىر ازايدى. سالىستىرمالى تۇردە، 2017 -جىلى 460-قا جۋىق دەرەك تىركەلسە، بيىل جايىلىمنان جوعالعان مال بويىنشا 148 فاكتى ورىن الدى. اتالعان قىلمىستارعا قاتىسى بار تۇلعالاردى انىقتاۋ بويىنشا كەڭ اۋقىمدى جۇمىستار اتقارىلۋدا» ، - دەپ اتاپ ءوتتى وبلىستىق پد كريمينالدىق پوليتسيا باسقارماسىنىڭ باستىعى ەرعالي ابىلعازييەۆ.

ايتا كەتەيىك، اۋىل شارۋاشىلىعى ورىستەپ دامىعان وبلىستا بيىل ءتارتىپ ساقشىلارى 700-گە جۋىق قولدى بولعان مالدى يەلەرىنە قايتارىپ، 80 ميلليون تەڭگەگە جۋىق ماتەريالدىق شىعىن وندىرىلگەن.

اۆتور سامال قابىشيەۆا