استانادا 700 ۇلەسكەردىڭ اقشاسىن جىمقىرعان قۇرىلىس كومپانياسىنىڭ باسشىلارى سوتتالدى

نۇر- سۇلتان. قازاقپارات - استانادا 700 ۇلەسكەردىڭ 7 ميلليارد تەڭگەدەن استام اقشالاي سالىمدارىن جىمقىرعان قۇرىلىس كومپانياسىنىڭ باسشىلارى سوتتالدى، دەپ حابارلايدى قازاقپارات ەلوردا پروكۋراتۋراسىنا سىلتەمە جاساپ.

«قالالىق پروكۋراتۋرا «تولەندى» ت ق ك قۇرىلىس سالۋشىلارىنا قاتىستى قىلمىستىق ءىستى سوتقا جولدادى. ا. س. بايجۇمانوۆ، ن. ن. انارقۇلوۆ جانە باسقا دا 7 ادام 2012-2016 -جىلدارى 700 ۇلەسكەردىڭ 7 ميلليارد تەڭگەدەن استام اقشالاي سالىمدارىن «انيسا 1، 2، 3»، «كوكتال-2»، «ابات» جانە «ابايدىڭ 150 جىلدىعى» ت ك قۇرىلىسى كەزىندە ۇرلاعانى ءۇشىن ايىپتالدى»، دەلىنگەن حابارلامادا.

پايشىلاردىڭ اقشالاي قاراجاتى سوتتالعاندارعا جەكە قاجەتتىلىكتەرىنە جۇمسالعان. ايدىن بايجۇمانوۆ ت ق ك ءتوراعاسى بولا وتىرىپ، ءوز تۋىسقاندارى مەن تانىستارىنىڭ پاتەرلەرىن جانە تۇراق ورىندارىن اقىسىز زاڭسىز رەسىمدەگەن، ول تۋرالى سوتتا جابىرلەنۋشىلەردىڭ وزدەرى دە مالىمدەگەن.

سوت تالقىلاۋى ءبىر جىل بويى جالعاستى. سوتتا 500-دەن استام جابىرلەنۋشىدەن جاۋاپ الىندى.

پروكۋروردىڭ مەملەكەتتىك ايىپتاۋىن تيىسىنشە قولداۋ ناتيجەسىندە سوتتالۋشىلاردىڭ كىناسى دالەلدەندى، سوت 5 جىلدان 9 جىلعا دەيىن باس بوستاندىعىنان ايىرۋ جازاسى تاعايىندادى. «قىلمىستىق جولمەن الىنعان بارلىق مۇلىككە جابىرلەنۋشىلەرگە كەلتىرىلگەن زالالدى وتەۋ ماقساتىندا تىيىم سالىندى. ۇكىم زاڭدى كۇشىنە ەندى»، دەلىنگەن حابارلامادا.

ەسكە سالا كەتسەك، 2016 -جىلى «تولەندى» قۇرىلىس كومپانياسىنىڭ ءبىر پاتەردى بىرنەشە ادامعا ساتىپ كەلگەنى انىقتالعان بولاتىن.